رؤيا 6 - كِتاب العَهد الجَّديد مِن الكِتاب المُقَدَّس

الأختام

¹ و شُفتَ لَمّا الحَمَل فَتَح واحِد مِن السَّبعَه أختام. و سِمِعتَ واحِد مِن الأربَعَه حَيوانات يَقول بِصوت زي صوت الرَّعد: ”تَعال!“

² و عايَنتَ، و أهو دا! حُصان أبيَض، و الرّاكِب فوقو كان عِندو قوس، و أدّوهو تاج. و هو مَرَق غالِب و عَشان يَغلِب.

³ و لَمّا فَتَح الخِتِم التّاني، سِمِعتَ الحَيوان التّاني يَقول: ”تَعال!“

⁴ و حُصان تاني أحمَر مَرَق. و أدّو لِلرّاكِب فوقو قُوَّه أن ياخُد السَّلام مِن الأرض، و يَعمِل النّاس يَكتُلو بَعضَهُم بَعض. و أدّو ليهو سيف كَبير.

⁵ و لَمّا فَتَح الخِتِم التّالِت، سِمِعتَ الحَيوان التّالِت يَقول: ”تَعال!“ و عايَنتَ، و أهو! حُصان أسوَد و الرّاكِب فوقو كان عِندو ميزان في إيدو.

⁶ و سِمِعتَ زي صوت في وَسِط الأربَعَه حَيوانات يَقول: ”كيلة دُرَه بِأُجرَة يوميَّه و تلاتَه كيلات شَعير بِأُجرَة يوميَّه. و ما تَضُر الزّيت و الخَمر.“

⁷ و لَمّا فَتَح الخِتِم الرّابِع، سِمِعتَ صوت الحَيوان الرّابِع يَقول: ”تَعال!“

⁸ و عايَنتَ، و أهو دا! حُصان أصفَر، و الرّاكِب فوقو إسمو الموت، و الهاويَه مَشى وَراهو. و أدّوهُم سُلطَه عَلى رُبُع الأرض، عَشان يَكتُلو بِالسّيف و الجّوع و الموت و بِوحوش الأرض.

⁹ و لَمّا فَتَح الخِتِم الخامِس، شُفتَ تِحِت المَضبَح، نُفوس النّاس الكانو مَكتولين عَشان خاطِر كِلمَة الله، و فِشان الشَّهادَه الكانَت عِندَهُم.

¹⁰ و هُم كورَكو بِصوت عالي و قالو: ”يا سَيِّد، القُدّوس و الحَقيقي، لِغايَة مِتين ما تَحكُم و ما تَنتَقِم لِدَمّنا مِن السّاكنين عَلى الأرض؟“

¹¹ و أدّو لِكُلّو واحِد مِنَّهُم توب أبيَض. و قالو ليهُم أن يستَريحو مُدَّه قَليلَه، لِغايَة ما يَتِم عَدَد الخَدّامين شُرَكاهُم و أخوانُم البِكونو مَكتولين زيَهُم.

¹² و شُفتَ لَمّا فَتَح الخِتِم السّادِس. و كانَت في زَلزَلَه كَبيرَه. الشَّمِش بِقَت سودَه زي شَوال أسوَد، و القَمَر كُلّو بِقى زي الدَّم.

¹³ و نُجوم السَّما وَقَعو لِلأرض زي ما شَجَرَة التّين تَرمي التّين الما نَجيض لَمّا الهَبوب الشَّديدَه تَهِزّا.

¹⁴ و السَّما فاتَت زي ما يَلِفّو وَرَقا طَويلَه، و كُلّو جَبَل و كُلّو جَزيرَه إتنَقَلو مِن مَحَلّا.

¹⁵ و مُلوك الأرض و الكُبار و رؤساء الجُّيوش و الغَنيين و الشُّداد و كُلّو عَبد و كُلّو حُر إندَسو في المَغاوير و بين حُجار الجِبال.

¹⁶ و هُم يَقولو لِلجِّبال و الحُجار: ”أقَعو عَلينا، و دِسّونا مِن وَش القاعِد عَلى الكُرسي، و مِن غَضَب الحَمَل.

¹⁷ عَلَشان جا يوم غَضَبُم العَظيم. و مِنو هو اليَقدَر يَقيف؟“