رؤيا 5 - كِتاب العَهد الجَّديد مِن الكِتاب المُقَدَّس

الكِتاب و الحَمَل

¹ و شُفتَ بِيَمين القاعِد عَلى الكُرسي، كِتاب مَكتوب مِن جُوَّه و مِن بَرَّه، مَقفول بِسَبعَه أختام.

² و شُفتَ مَلاك قَوّي يَنادي بِصوت عالي: ”مِنو يَكون مُستَحِق يَفتَح الكِتاب و يَفِك أختامو؟“

³ و ما في واحِد في السَّما ولّا عَلى الأرض ولّا تِحِت الأرض القِدِر يَفتَح الكِتاب ولّا يَعايِن فيهو.

⁴ و بَكيت بِكى كَتير عَلَشان هُم ما لِقو واحِد يِستَحِق يَفتَح الكِتاب ولّا يَعايِن فيهو.

⁵ و واحِد مِن الشُّيوخ قال لَي: ”ما تَبكي! شوف، الأسَد المِن قَبيلَة يَهُوذَا، عِرق دَاوُد، هو غَلَب عَشان يَفتَح الكِتاب و أختامو السَّبعَه.“

⁶ و شُفتَ حَمَل واقِف بين الكُرسي و الأربَعَه حَيوانات و في وَسِط الشُّيوخ. و مَنظَر الحَمَل كان زي ما هو مَكتول. و هو كان عِندو سَبعَه قُرون و سَبعَه عُيون، و هُم السَّبعَه أرواح الله المُرَسَّلين لِكُل الأرض.

⁷ و هو جا و أخَد الكِتاب مِن يَمين القاعِد عَلى الكُرسي.

⁸ و لَمّا أخَد الكِتاب، الأربَعَه حَيوانات وَقَعو قِدّام الحَمَل، و كِدا الأربَعَه و عِشرين شيخ كَمان. و كُلّو واحِد مِنَّهُم كانَت عِندو رَبابَه و حَلَّه مِن دَهَب، مَليانَه بَخور، و هو صَلَوات القِدِّسين.

⁹ و هُم يَرَتِّلو تَرتيلَه جَديدَه، و بِقولو: ”إنتَ مُستَحِق تاخُد الكِتاب و تَفِك أختامو، عَلَشان كُنتَ مَكتول، و بِدَمَّك أشتَريت لِلَّه مِن كُلّو قَبيلَه و لُغَه و شَعب و أُمَّه.

¹⁰ و إنتَ عَمَلتُم مَلَكوت و قُسُس لِإلَهنا، و هُم بِيَملِكو عَلى الأرض.“

¹¹ و شُفتَ و سِمِعتَ صوت مَلائكَه كَتيرين حَول الكُرسي و الحَيوانات و الشُّيوخ. و كان عَدَدُم عَشَرَة آلاف في عَشَرَة آلاف و آلاف آلاف.

¹² و يَقولو بِصوت عالي: ”الحَمَل الكان مَكتول مُستَحِق يَقبَل القُدرَه و الغِنى و الحِكمَه و القُوَّه و الإحتِرام و المَجد و البَرَكَه!“

¹³ و كُلّو خَليقَه الفي السَّما و عَلى الأرض و تِحِت الأرض و الفي البَحَر و كُل الفيها سِمِعتُم يَقولو: ”ليهو القاعِد عَلى الكُرسي و لِلحَمَل البَرَكَه و الإحتِرام و المَجد و القُدرَه لِلأبَد!“

¹⁴ و الأربَعَه حَيوانات قالو: ”آمين!“ و الشُّيوخ وَقَعو و عَبَدو.