رؤيا 21 - كِتاب العَهد الجَّديد مِن الكِتاب المُقَدَّس

أُورُشَلِيم الجَديدَه

¹ و بَعدين شُفتَ سَما جَديدَه و أرض جَديدَه. عَشان السَّما الأولي و الأرض الأولي فاتو، و ما كان في بَحَر بَعَد دا.

² و شُفتَ المَدينَه المُقَدَّسَه، أُورُشَلِيم الجَديدَه، نازِلَه مِن السَّما مِن الله. و هي كانَت مَجَهَّزَه زي عَروسَه مَزيَنَه لِعَريس.

³ و سِمِعتَ صوت عالي مِن الكُرسي يَقول: ”شوف! مَسكَن الله مَعَ النّاس، و هو بِسكُن مَعاهُم. و هُم بِكونو شَعب ليهو، و الله نَفسو بِكون مَعاهُم، و بِكون إلَه ليهُم.

⁴ و الله بِمسَح كُلّو دَمعَه مِن عُيونُم. و ما بِكون في موت بَعَد دا ولّا حُزن ولّا بِكى ولّا وَجَع، عَشان الحاجات المِن الأوَّل فاتو.“

⁵ و القاعِد عَلى الكُرسي قال: ”شوف! أنا بَسَوّي كُلّو شي جَديد.“ و قال لَي كَمان: ”أكتِب، عَشان الكِلمات دي صادِقَه و أمينَه.“

⁶ و هو قال لَي كَمان: ”هو كِمِل. أنا الألِف و الياء، البِدايَه و النِّهايَه. أنا بَدّي لِلعَطشان مِن عين مويَة الحَياة مَجّاناً.

⁷ الزّول البِغلِب، هو يورَث الحاجات دي، و أنا بَكون ليهو إلَه و هو بِكون لَي وَلَد.

⁸ لَكِن الخَوافين و الما مؤمِنين و المَكروهين و الكاتِلين و الزّانيين و البيَعمِلو السِّحِر و البِيَعبُدو الأصنام و كُل الكَضّابين، مَحَلُّم بِكون في البِركَه المَوَلَّعَه بِالنّار و الكِبريت. و دا هو الموت التّاني.“

⁹ و جا واحِد مِن السَّبعَه مَلائكَه الكانو عِندَهُم السَّبعَه حِلَل مَليانَه مِن السَّبعَه ضَرَبات الأخيرَه، و قال لَي: ”تَعال، بَوَرّيك العَروسَه، مَرَة الحَمَل.“

¹⁰ و هو شَالني في الرّوح لِجَبَل كَبير و عالي. و هو وَرّاني المَدينَه المُقَدَّسَه، أُورُشَلِيم، نازِلَه مِن السَّما مِن الله.

¹¹ و عِندَها مَجد الله، و نورا كان زي لَمعان حَجَر غالي جِدّاً، زي حَجَر يَشَب صافي، زي قِزاز بَلّور.

¹² و عِندَها حيطَه كَبيرَه و عاليَه و إتناشَر باب، و عِند الأبواب إتناشَر مَلاك. و أسامي الإتناشَر قَبيلَة بَني إِسْرَائِيل كانو مَكتوبين عَلى الأبواب.

¹³ و لِلشَّرق كانو في تلاتَه أبواب، و لِلشِّمال تلاتَه أبواب، و لِلجَّنوب تلاتَه أبواب، و لِلغَرب تلاتَه أبواب.

¹⁴ و حيطَة المَدينَه عِندَها إتناشَر أساس، و عَليهُم أسامي رُسُل الحَمَل الإتناشَر.

¹⁵ و المَلاك البِكَلِّمني كانَت عِندو عَصايَة القِياس مِن دَهَب عَشان يَقيس المَدينَه و أبوابا و الحيطَه.

¹⁶ و المَدينَه كانَت مَرَبَّعَه، طولا بِقَدُر العُرض. و هو قاس المَدينَه بِالعَصايَه، و كانَت خَمَستاشَر ألف ميل في الطّول. و طولا و عُرضا و إرتِفاعا واحِد.

¹⁷ و هو قاس الحيطَه كَمان، و كانَت ميتين و سِطّاشَر قَدَم حَسَب قِياس الزّول، القِياس العَمَل بيهو المَلاك.

¹⁸ و الحيطَه كانَت مَصنوعَه مِن حَجَر اليَشَب، و المَدينَه مِن دَهَب نَضيف زي القِزاز الصّافي.

¹⁹ و أساسات حيطَة المَدينَه كانَت مَزيَنَه بِكُلّو حَجَر غالي و لامِع. الأساس الأوَّل كان حَجَر يَشَب أخدَر، و التّاني حَجَر لامِع لونو أزرَق، و التّالِت حَجَر أخدَر، و الرّابِع أخدَر لامِع،

²⁰ و الخامِس أحمَر و أبيَض، و السّادِس أحمَر، و السّابِع أصفَر، و التّامِن أخدَر فَاتح، و التّاسِع أصفَر، و العاشِر أخدَر فَاتح، و الحِداشَراوي بُرتُقاني، و الأتناشَراوي بَنَفسَجي.

²¹ و الإتناشَر باب كانو إتناشَر لولي، كُلّو باب كان لولي واحِد. و شارِع المَدينَه كان مِن الدَّهَب النَّضيف زي القِزاز الصّافي.

²² و ما شُفتَ هيكَل فيها، عَشان الرَّب الله القادِر عَلى كُلّو شي و الحَمَل، هُم هَيكَله.

²³ و المَدينَه ما مُحتاجَه لِلشَّمِس ولّا لِلقَمَر عَشان يَنَوِّرو فيها. عَلَشان مَجد الله بِدّيها نور، و الحَمَل فانوسا.

²⁴ و الأُمَم بِمشو بِنورا، و مُلوك الأرض بِجيبو مَجدُم ليها.

²⁵ و أبوابا ما بِتكون مَقفولَه بِالنَّهار. و ما بِكون في ليل هِناك.

²⁶ و الأُمَم بِجيبو مَجدُم و شَرَفُم ليها.

²⁷ و ما في شي نَجِس بِدخُل فيها أبَداً، ولّا أي واحِد اليَعمِل الحاجَه البِتَخجَل ولّا الكِضِب. لَكِن بَس النّاس الأساميهُم مَكتوبين في كِتاب الحَياة بِتاع الحَمَل يدخُلو.