رؤيا 20 - كِتاب العَهد الجَّديد مِن الكِتاب المُقَدَّس

الألف سَنَه

¹ و شُفتَ مَلاك نازِل مِن السَّما، و مَعاهو مُفتاح الحُفرَه الغَريقَه جِدّاً، و في إيدو جَنزير كَبير.

² و هو قَبَض عَلى التّنين، الدَّبيب القَديم، الهو إبْلِيس و الشّيطان، و رَبَطو لِألف سَنَه.

³ و هو رَماهو في الحُفرَه الغَريقَه جِدّاً، و قَفَل عَليهو و خَتَّ خِتِم عَلى الحُفرَه. و هو عَمَل دا عَشان هو ما بِغِش الأُمَم بَعَد دا حَتّى الألف سَنَه تَخَلَص. و بَعَد دا، لازِم يَفِكّوهو لِوَكِت قَليل.

⁴ و بَعدين شُفتَ كَراسي و ديل القاعِدين فوقُم، و أدّاهُم السُّلطَه عَشان يَحكُمو. و شُفتَ كَمان نُفوس النّاس الرّوسينُم كانو مَقطوعين فِشان شَهادَة يَسُوع و فِشان كِلمَة الله. و هُم ما عَبَدو الوَحَش ولّا صَنَمو، و ما قِبِلو عَلامتو عَلى جَبهاتُم ولّا عَلى إيدينُم. و هُم عاشو تاني مَرَّه و مَلَكو مَعَ المَسيح ألف سَنَه.

⁵ و باقي المَيِّتين ما عاشو تاني مَرَّه لِغايَة ما الألف سَنَه تَخَلَص. دي هي القيامَه الأولي.

⁶ مُبارَك و مُقَدَّس العِندو جُزو في القيامَه الأولي. و الموت التّاني ما عِندو سُلطَه عَليهُم، لَكِن هُم بِكونو قُسُس لِلَّه و لِلمَسيح، و بِملِكو مَعاهو ألف سَنَه.

دينونَة الشّيطان

⁷ و لَمّا الألف سَنَه تَخَلَص، بِفِكّو الشّيطان مِن سِجِنو.

⁸ و هو بِمرُق عَشان يَغِش الأُمَم في أقسام الأرض الأربَعَه، يَعني جوج و ماجوج، و عَلَشان يَلِمُّم لِلحَرب. و عَدَدُم مِثِل رَمل البَحَر.

⁹ و هُم مَشو فوق عُرض الأرض، و لَفّو حَول مُعَسكَر القِدِّسين، و المَدينَه المَحبوبَه. و لَكِن نار نَزَلَت مِن السَّما و أكَلَتُم.

¹⁰ و إبْلِيس، الكان بِغِشُّم، إترَمى في بِركَة النّار و الكِبريت لِلمَكان الفيهو كَمان الوَحَش و النَّبي الكَضّاب. و ماشين يَعَذِّبوهُم نَهار و ليل لِلأبَد.

¹¹ و بَعدين شُفتَ كُرسي كَبير و أبيَض، و شُفتَ القاعِد فوقو. و السَّما و الأرض هَرَبَت مِن وَشّو، و ما لِقو مَحَل.

¹² و شُفتَ المَيِّتين، الكُبار و الصُّغار، واقِفين قِدّام الكُرسي. و فَتَحو الكُتُب. و فَتَحو كِتاب تاني، و هو كِتاب الحَياة. و هو دان المَيِّتين بِحَسَب المَكتوب في الكُتُب، حَسَب أعمالُم.

¹³ و البَحَر سَلّم المَيِّتين الكانو فيهو، و الموت و الهاويَه سَلَّمو المَيِّتين الكانو فيهُم. و هو دان كُلّو واحِد حَسَب أعمالو.

¹⁴ و الموت و الهاويَه إترَمو في بِركَة النّار. و بِركَة النّار، هي الموت التّاني.

¹⁵ و إذا لِقو إسِم أي واحِد ما مَكتوب في كِتاب الحَياة، هو إترَمى في بِركَة النّار.