رؤيا 2 - كِتاب العَهد الجَّديد مِن الكِتاب المُقَدَّس

لِلكَنيسَه في أفَسُس

¹ أكتِب لِمَلاك الكَنيسَه الفي أفَسُس: هو اليَمسِك السَّبعَه نُجوم بِيَمينو، و الماشي في وَسِط السَّبعَه مَناوِر مِن دَهَب، بِقول الحاجات دي.

² أنا بَعرِف أعمالَك و تَعبَك و صَبرَك، و إنتَ ما تَقدَر تِتحَمَّل الشَّرّيرين. و إنتَ جَرَّبتُم البِسَمّو نُفوسُم رُسُل، لَكِن هُم مُش رُسُل، و لِقيتُم كاضِبين.

³ و عِندَك صَبر و إتحَمَّلتا التَّعب عَشان خاطِر إسمي و ما بِقيت تَعبان.

⁴ لَكِن أنا عِندي حاجَه عَليك، إنتَ خَلّيت مَحَبَّتَك الكانَت عِندَك في الأوَّل.

⁵ عَلَشان كِدا إتزَكَّر مِن وين وَقَعتَ، و توب، و أعمِل الأعمال زي في الأوَّل. و إلّا، أنا بَجيك و بَشيل مَنارتَك مِن مَحَلّها إذا ما تَتوب.

⁶ و لَكِن إنتَ عِندَك الحاجَه الكوَيسَه دي، إنتَ بِتَكرَه أعمال ناس نُقُلاوي و أنا كَمان بَكرَها.

⁷ العِندو أضان، خَليهو يَسمَع البِقولو الرّوح لِلكَنايس. ليهو اليَغلِب، أنا بَدّيهو أن ياكُل مِن شَجَرَة الحَياة الفي جَنَّة الله.

لِلكَنيسَه في سِميرنا

⁸ و أكتِب كَمان لِمَلاك الكَنيسَه الفي سِميرنا: ديل الحاجات البِقولو الأوَّل و الآخِر، هو الكان مَيِّت و رَجَع لِحَياة تاني.

⁹ أنا بَعرِف تَعبَك و إحتياجَك، لَكِن إنتَ غَني. و بَعرِف تَجديف ديل البِقولو هُم يَهود و هُم مُش يَهود، لَكِن هُم مَجمَع الشّيطان.

¹⁰ ما تَخاف مِن الحاجات الأنتَ ماشي تِتوَجَّع بيها. شوف، الشّيطان قَرَّب يَرمي بَعض مِنَّكُم في السِّجِن عَشان يِمتَحِنكُم. و بِكون عِندَكُم ضيق عَشَرَة أيام. كون أمين لِغايَة الموت، و أنا بَدّيك تاج الحَياة.

¹¹ العِندو أضان، خَليهو يَسمَع البِقولو الرّوح لِلكَنايس. و هو البِغلِب، الموت التّاني ما بِضُرّو.

لِلكَنيسَه في بَرْغَامُس

¹² و أكتِب كَمان لِمَلاك الكَنيسَه الفي بَرْغَامُس: ديل الحاجات البِقولو العِندو السّيف السَّنين العِندو طَرَفين.

¹³ أنا بَعرِف المَحَل الأنتَ ساكِن فيهو، و كُرسي الشّيطان في المَحَل دا. لَكِن إنتَ ماسِك بِإسمي. و إنتَ ما نَكَرتَ الإيمان بي، حَتّى في أيام أَنْتِيبَاس، شاهِدي الأمين. و هو كان مَكتول بينكُم، في المَحَل الشّيطان بِسكُن فيهو.

¹⁴ و لَكِن أنا عِندي حاجات قَليلَه عَليك. إنتَ عِندَك هِناك ناس ماسكين بِتَعليم بَلعام الكان بِعَلِّم بالاق أن يَكون سَبَب لِلخَطيَّه لِبَني إِسْرَائِيل. هو عَلَّمُم أن ياكلو مِن الأكل الكان مَضبوح لِلأصنام و يَعمِلو الزِّنا.

¹⁵ و إنتَ كَمان عِندَك ناس ماسكين بِتَعليم النُّقُلاويين.

¹⁶ عَلَشان كِدا، توب، و إلّا أنا بَجيك قَوام و بَحارِبُم بِسيف خَشمي.

¹⁷ العِندو أضان، خَليهو يَسمَع البِقولو الرّوح لِلكَنايس. ليهو اليَغلِب، أنا بَدّيهو مِن المَنّا المَدسوس. و بَدّيهو حَجَر أبيَض، مَكتوب عَليهو إسم جَديد، ما في واحِد يَعرِفو إلّا البِقبَلو.

لِلكَنيسَه في ثِيَاتِيرَا

¹⁸ و أكتِب كَمان لِمَلاك الكَنيسَه الفي ثِيَاتِيرَا: ديل الحاجات البِقولو إبن الله العِندو عُيون زي لَهيب نار، و كِرعينو زي النَّحاس الأصفَر اللَّامَع.

¹⁹ أنا بَعرِف أعمالَك و مَحَبَّتَك و إيمانَك و خِدمَتَك و صَبرَك. و بَعرِف أعمالَك الأخيرَه أكتَر مِن الفي الأوَّل.

²⁰ لَكِن أنا عِندي حاجَه عَليك. إنتَ تَدّي إذن لِلمَرَه إيزابَل البِتقول هي نَبيَّه. و هي تَعَلِّم و تَغِش خَدّاميني حَتّى يَعمِلو الزِّنا و ياكلو مِن الأكل الكان مَضبوح لِلأصنام.

²¹ و أنا أدّيت ليها وَكِت عَشان تَتوب، و لَكِن هي ما عاوزَه تَتوب مِن زِناها.

²² شوف، أنا بَرميها في عَنقَرِيب الوَجَع، و اليَزنو مَعاها في تَعب شَديد إذا ما يَتوبو مِن أعمالا.

²³ و بَكتُل أولادا بِالموت. و كُل الكَنايس بِيَعرِفو أنا هو البَمتَحِن الأفكار و القُلوب، و بَدفَع لِكُلّو واحِد مِنَّكُم حَسَب أعمالو.

²⁴ و لَكِن بَقول دا ليكُم، التّانيين في ثِيَاتِيرَا، كُل الما مَسَكتو بِالتَعليم دا. و إنتو ما بِتَعرِفو الحاجات الغَريقَه بِتاعَت الشّيطان زي ما بِقولو. أنا ما بَخُت عَليكُم حِمِل تاني.

²⁵ لَكِن تَمسِكو بِالحاجَه العِندَكُم لِغايَة ما بَجي.

²⁶ و ليهو البِغلِب و بِحفَظ أعمالي حَتّى النِّهايَه، أنا بَدّيهو سُلطَه عَلى الأُمَم.

²⁷ و هو يَملِك عَليهُم بِعَصايَه مِن حَديد، زي ما يَكسَرو بُرَم مِن طين، مِثِل ما أبوي أدّاني سُلطَه.

²⁸ و بَدّيهو كَمان نَجمَة الصَّباح.

²⁹ العِندو أضان، خَليهو يَسمَع البِقولو الرّوح لِلكَنايس.