رؤيا 19 - كِتاب العَهد الجَّديد مِن الكِتاب المُقَدَّس

¹ و بَعَد الحاجات دي، سِمِعتَ زي صوت عالي مِن ناس كُتار في السَّما يَقولو: ”هَلِّلويا! الخَلاص و المَجد و القُدرَه لِإلَهنا،

هَلِّلويا

² عَشان أحكامو حَق و عادِلَه. هو دان الزّانيَه العَظيمَه، الخَرَبَت الأرض بِزِناها، و إنتَقَم لِدَم خَدّامينو مِن إيدا.“

³ و قالو تاني مَرَّه: ”هَلِّلويا! دُخانا يَطلَع لِلأبَد.“

⁴ و الأربَعَه و عِشرين شيخ و الأربَعَه حَيوانات وَقَعو و عَبَدو الله القاعِد عَلى الكُرسي و قالو: ”آمين، هَلِّلويا!“

⁵ و صوت مَرَق مِن الكُرسي اليَقول: ”أحمَدو إلَهنا، يا كُلّو خَدّامينو، إنتو البِخافوهو، الصُّغار و الكُبار.“

⁶ و بَعدين سِمِعتَ زي صوت ناس كُتار، و زي صوت مويَه كَتيرَه و زي صوت رُعود شَديدَه، البِقولو: ”هَلِّلويا! عَشان الرَّب إلَهنا القادِر عَلى كُلّو شي يَمحَق.

⁷ خَلّونا نَفرَح و نَكون مَبسوطين خَلاص و نَمَجِّدو! عَشان عِرِس الحَمَل جا، و عَروستو جَهَّزَت نَفسا.

⁸ و أدّوها أن تَلبَس تيل لامِع و نَضيف.“ عَشان التّيل هو أعمال البِر بِتاعَت القِدِّسين.

⁹ و هو قال لَي: ”أكتِب: مُبارَكين ديل النّادوهُم لِعَشا عِرِس الحَمَل.“ و قال لَي كَمان: ”دي كِلمات الله الصَّحَيحَه.“

¹⁰ و وَقَعتَ عِند كِرعينو عَشان أعبُدو. لَكِن هو قال لَي: ”ما تَعمِل دا أبَداً! عَشان أنا خَدّام مَعاك و مَعَ أخوانَك البِحفَظو شَهادَة يَسُوع. أعبُد الله! عَشان شَهادَة يَسُوع، هي روح النُّبوَّه.“

الرّاكِب فوق الحُصان الأبيَض

¹¹ و بَعدين شُفتَ السَّما مَفتوحَه. و شوف! حُصان أبيَض، و الرّاكِب فوقو إسمو، الأمين و الصّادِق. و هو يَحكُم و يَحارِب بِالعَدل.

¹² و عُيونو زي لَهيب نار، و عَلى رَاسو تيجان كَتيرَه. و عِندو إسِم مَكتوب فوقو، ما في واحِد يَعرِفو إلّا هو.

¹³ و هو لابِس توب مَغَطَّس بِالدَّم، و إسمو، كِلمَة الله.

¹⁴ و جُيوش السَّما تَبَعو، راكبين حَصين بُيُض، لابسين تيل أبيَض و نَضيف.

¹⁵ و سيف سَنين يَمرُق مِن خَشمو عَشان يَضرُب بيهو الأُمَم. و هو بِيَحكُم عَليهُم بِعَصايَه مِن حَديد. و هو بِدوس عَصارَة العِنَب بِتاعَت شِدَّة خَمر غَضَب الله القادِر عَلى كُلّو شي.

¹⁶ و مَكتوب عَلى توبو و فَخدو الإسِم، مَلِك المُلوك و رَب الأرباب.

¹⁷ و شُفتَ مَلاك واقِف في الشَّمِس. و هو كورَك بِصوت عالي، و قال لِكُل الطُيور البِطير في وَسِط السَّما: ”تَعالو، إتلَمّو لِعَشا الله العَظيم.

¹⁸ عَشان تاكلو لَحَم المُلوك و لَحَم رؤساء الجُّيوش و لَحَم الرُّجال القَوّيين، و لَحَم الحَصين و النّاس البِركَبو فوقُم، و لَحَم كُل النّاس، حُرّين و عَبيد، صُغار و كُبار.“

¹⁹ و شُفتَ الوَحَش و مُلوك الأرض و جُيوشُم إتلَمّو عَشان يَحارِبو الرّاكِب فوق الحُصان و جُيوشو.

²⁰ و الوَحَش كان مَقبوض، و مَعاهو النَّبي الكَضّاب الصَنَع العَلامات قِدّامو. و بِالعَلامات دي هو غَشّا ديل، القِبِلو عَلامَة الوَحَش و عَبَدو صَنَمو. و هُم الإتنين إترَمو و هُم حَيين في بِركَة النّار، المَوَلَّعَه بِالكِبريت.

²¹ و باقي النّاس كانو مَكتولين بِسيف الرّاكِب فوق الحُصان. و السّيف دا كان بِمرُق مِن خَشمو. و كُل الطُّيور شَبَعو مِن اللَّحَم بِتاعُم.