رؤيا 18 - كِتاب العَهد الجَّديد مِن الكِتاب المُقَدَّس

¹ و بَعَد دا أنا شُفتَ مَلاك تاني نازِل مِن السَّما. هو كانَت عِندو سُلطَه عَظيمَه. و الأرض إتنَوَّرَت مِن مَجدو.

² و هو كورَك بِصوت عالي و قال: ”وَقَعَت! وَقَعَت بابِل العَظيمَه! هي بِقَت بيت لِلشّياطين، و سِجِن لِكُلّو روح نَجِس، و سِجِن لِكُلّو طير نَجِس و مَكروه،

وقوع بابِل

³ عَشان كُل الأُمَم شِرِبو مِن خَمر غَضَب زِناها. و مُلوك الأرض زَنو مَعاها، و تُجّار الأرض بِقو غَنيين مِن قُوَّة حاجاتا النّاعِمَه.“

⁴ و سِمِعتَ صوت تاني مِن السَّما يَقول: ”أمرُقو مِنَّها، يا شَعبي، عَلَشان ما تَشتَرِكو في خَطاياها، و عَلَشان ما بِتَقبَلو مِن ضَرَباتا.

⁵ عَشان خَطاياها وِصلَت لِلسَّما، و الله إتزَكَّر ذُنوبا.

⁶ رَجِّعو ليها زي ما هي أدَّت، و رَجِّعو ليها مَرَّتين لِكُل العَمَلَتو. لَخبَط ليها مَرَّتين في الفِنجان الهي لَخبَطَتو.

⁷ بِقَدُر ما هي مَجَّدَت نَفسا و عاشَت حَياة ناعِمَه، أدّوها عَذاب و حُزن. عَلَشان في قَلبا هي تَقول: أنا قاعِدَه مَلِكَه، أنا مُش أرمَلَه، و أنا ما بَبكي أبَداً.

⁸ عَلَشان كِدا، في يوم واحِد بِتَجي ليها ضَرَباتا، الموت و البِكى و الجّوع. و بِحرَقوها بِالنّار. عَشان الرَّب الإلَه اليَدينا هو قَوّي.“

⁹ و مُلوك الأرض الزَّنو و عاشو حَياة ناعِمَه مَعاها، لَمّا يَشوفو دُخان حَريقَتا، هُم بِيَبكو و بِكونو حَزنانين.

¹⁰ و بِقيفو بَعيد، خايفين مِن عَذابا و يَقولو: ”يا مُصيبَه! يا مُصيبَه! يا المَدينَه العَظيمَه! بابِل المَدينَه القَوّيَّه! عَشان دينونتِك جات في ساعَه واحدَه!“

¹¹ و تُجّار الأرض بِيَبكو و بِكونو حَزنانين عَليها، عَلَشان ما في واحِد يَشتَري بُضاعَتُم بَعَد دا.

¹² ما في واحِد يَشتَري بُضاعَتُم مِن الدَّهَب و الفِضَّه و الحُجار الغاليَه و اللّولي، و التّيل و قُماش بَنَفسَجي و الحَرير و قُماش أحمَر و كُلّو نوع خَشَب طَيب الرّيحَه، و كُلّو حاجات مَصنوعَه مِن سِن الفيل، و مِن خَشَب غالي و النِّحاس الأصفَر، و الحَديد و الرِّخام،

¹³ بُضاعَه مِن القِرفَه، و البُهارات، و البَخور، و اللُّبان، و الخَمر، و الزِيت، و الدَّقيق النّاعِم و القَمِح، و البَهايِم و الخِرفان، و الحَصين و العَرَبيَات، و عَبيد و نُفوس النّاس.

¹⁴ ”و ثِمار شَهوَة نَفسِك الإنتي كُنتي عاوِزاها مَشى مِنِّك. و كُلّو غِناكي و مَجدِك بِقى خَسارَه ليكي، و النّاس ما يَلقوها أبَداً بَعَد دا.“

¹⁵ و التُّجّار الباعو الحاجات دي و بِقو غَنيين مِنَّها بِقيفو بَعيد خايفين مِن عَذابا. هُم بِيَبكو و بِكونو حَزنانين،

¹⁶ و يَقولو: ”يا مُصيبَه! يا مُصيبَه لِلمَدينَه العَظيمَه. هي كانَت تَلبَس التّيل و القُماش البَنَفسَجي و الأحمَر، و المَزيَنَه بِالدَّهَب و الحُجار الغاليَه و اللّولي!

¹⁷ و في ساعَه واحدَه، الغِنى العَظيم دا بِقى خَراب!“ و كُلّو رَئيس مُركَب و كُلّو واحِد البِسافِر في مُركَب، البَحَّرَه و كُلّو شَغّالين البَحَر وَقَفو مِن بَعيد.

¹⁸ و لَمّا هُم شافو دُخان حَريقَتا، كورَكو و قالو: ”وين المَدينَه زي المَدينَه دي؟“

¹⁹ و رَمو التُّراب عَلى روسينُم، و إبتَدو يَكورِكو و يَبكو و يَقولو: ”يا مُصيبَه! يا مُصيبَه لِلمَدينَه العَظيمَه! عَشان كُل العِندَهُم مَراكِب في البَحَر بِقو غَنيين مِن غِناها. عَشان خَرابا جا في ساعَه واحدَه!

²⁰ أفرَحي بيها، يا سَما! أفرَحو، يا قِدِّيسين و رُسُل و أنبياء! عَشان الله حَكَم عَليها فِشان خاطِركُم.“

²¹ و بَعدين مَلاك قَوّي رَفَع حَجَر زي مُرحاكَه كَبيرَه، و رَماهو في البَحَر، و قال: ”كِدا بِشِدَّه بابِل المَدينَه العَظيمَه مَرميَه، و ما بِلقوها بَعَد دا أبَداً.

²² و أصوات النّاس البِضرُبو الرَّبابَه، و البِرَتِّلو، و البِضرُبو الزُّمبارَه و البوق، ما بِسمَعوها فيكي بَعَد دا أبَداً. و شَغّالين مِن أي صُنعا ما بِلقوهُم فيكي بَعَد دا أبَداً. و صوت المِرحَكَه ما بِسمَعوهو فيكي بَعَد دا أبَداً.

²³ و نور الفانوس ما بِنَوِّر فيكي بَعَد دا أبَداً. و صوت العَريس و العَروسَه ما بِسمَعوهو فيكي بَعَد دا أبَداً. عَشان تُجّارِك كانو الكُبار في الأرض، و بِسِحرك كُل الأُمَم ضَلّو.

²⁴ و إتلَقى فيها دَم الأنبياء و القِدِّسين، و دَم كُل المَكتولين عَلى الأرض.“