رؤيا 17 - كِتاب العَهد الجَّديد مِن الكِتاب المُقَدَّس

المَرَه القاعِدَه عَلى وَحَش

¹ و واحِد مِن السَّبعَه مَلائكَه العِندَهُم السَّبعَه حِلَل جا و كَلَّمني و قال: ”تَعال و بَوَرّيك دينونَة الزّانيَه الكَبيرَه البِتَقعُد عَلى مويَه كَتيرَه.

² و مُلوك الأرض عَمَلو زِنا مَعاها، و السّاكنين عَلى الأرض سَكَرو مِن خَمر زِناها.“

³ و المَلاك شَالني بِالرّوح لِلخَلا. و شُفتَ مَرَه قاعِدَه عَلى وَحَش أحمَر. و الوَحَش كان مَليان أسامي تَجديف، و عِندو سَبعَه رؤوس و عَشَرَه قُرون.

⁴ و المَرَه كانَت لابِسَه بَنَفسَجي و أحمَر، و مَزيَنَه بِالدَّهَب و الحُجار الغاليَه و اللّولي. و عِندَها فِنجان مِن دَهَب في إيدا، مَليان مِن الحاجات الشَّرّيرَه و النَّجسَه بِتاعَت زِناها.

⁵ و مَكتوب عَلى جَبهَتا إسم سِرّي: ”بابِل العَظيمَه، أُم الزّانين و الحاجات المَكروهَه في الأرض.“

⁶ و شُفتَ المَرَه كانَت سَكرانَه مِن دَم القِدِّسين و مِن دَم شاهِدين يَسُوع. و لَمّا شُفتَها، كُنتَ مُستَغرَب جِدّاً.

⁷ و المَلاك قال لَي: ”تِستَغرَب لِشِنو؟ أنا بَخَبِّرَك بِسِر المَرَه و الوَحَش البِشيلا، العِندو السَّبعَه رؤوس و العَشَرَه قُرون.

⁸ و الوَحَش الأنتَ شُفتو، هو كان مَوجود و هَسَّع ما مَوجود. و هو ماشي يَطلَع مِن الحُفرَه الغَريقَه جِدّاً و يَمشي لِلخَراب. و السّاكنين عَلى الأرض بِستَغرَبو، ديل الأساميهُم ما مَكتوبين في كِتاب الحَياة مِن خَليقَة الدُّنيا. هُم بِستَغرَبو لَمّا يَشوفو الوَحَش، عَلَشان هو كان مَوجود و هَسَّع ما مَوجود و بِجي.

⁹ و دا عاوِز الفَهم مَعَ الحِكمَه. السَّبعَه رؤوس، هُم سَبعَه جِبال الفوقُم المَرَه بِتَقعُد. و هُم كَمان سَبعَه مُلوك.

¹⁰ خَمسَه مِنَّهُم وَقَعو، و واحِد مَوجود، و التّاني لِسَّع ما جا. و لَمّا بِجي، لازِم يِستَنّى وَكِت قَليل.

¹¹ و الوَحَش الكان مَوجود و ما مَوجود هَسَّع، هو تامِن مَلِك. و هو مِن السَّبعَه، و يَمشي لِلخَراب.

¹² و السَّبعَه قُرون الأنتَ شُفتُم، هُم عَشَرَه مُلوك، اللِّسَّع ما قِبِلو مَملَكَه. لَكِن بِياخدو سُلطَه زي المُلوك لِساعَه واحدَه مَعَ الوَحَش.

¹³ و ديل عِندَهُم فِكِر واحِد و يَدّو لِلوَحَش قُدرَتُم و سُلطَتُم.

¹⁴ و ديل بِحارِبو الحَمَل. و الحَمَل بِغلِبُم، عَلَشان هو رَب الأرباب و مَلِك المُلوك. و ديل الناداهُم، مُختارين و أُمَنا، بِكونو مَعاهو.“

¹⁵ و المَلاك قال لَي: ”المويَه الأنتَ شُفتَها، المَحَل الزّانيَه بِتَقعُد فوقو، هي شُعوب و جَماعات و أُمَم و لُغات.

¹⁶ و العَشَرَه قُرون الأنتَ شُفتَها، و الوَحَش، هُم بِيَكرَهو الزّانيَه. و هُم بِخرَبوها و يَخَلّوها عَريانَه، و بِياكُلو لَحَما و يَحرِقوها بِالنّار.

¹⁷ عَشان الله خَتَّ في قُلوبُم أن يَكَمِّلو فِكرو. و هُم يَتَّفِقو أن يَدّو لِلوَحَش سُلطَة مَملَكَتُم لِغايَة ما كِلمَة الله تَتِم.

¹⁸ و المَرَه الإنتَ شُفتَها، هي المَدينَه العَظيمَه و هي بِتَحكُّم عَلى مُلوك الأرض.“