رؤيا 16 - كِتاب العَهد الجَّديد مِن الكِتاب المُقَدَّس

¹ و سِمِعتَ صوت عالي مِن الهيكَل يَقول لِلسَّبعَه مَلائكَه: ”أمشو و كُبّو السَّبعَه حِلَل بِتاعَت غَضَب الله عَلى الأرض.“

السَّبعَه حِلَل بِتاعَت غَضَب الله

² و المَلاك الأوَّل مَشى و كَبَّ حَلَّتو عَلى الأرض. و النّاس العِندَهُم عَلامَة الوَحَش و البِيَعبُدو صَنَمو كانو مَضروبين بِدَبَر بَطّال، و فيهو وَجَع.

³ و المَلاك التّاني كَبَّ حَلَّتو عَلى البَحَر، و البَحَر بِقى دَم زي دَم المَيِّت. و كُلّو حاجَه حَيَّه مات في البَحَر.

⁴ و المَلاك التّالِت كَبَّ حَلَّتو عَلى البِحار و عَلى عُيون المويَه، و بِقو دَم.

⁵ و سِمِعتَ مَلاك المويَه يَقول: ”إنتَ عادِل في أحكامَك ديل، يا المَوجود و الكان مَوجود، يا قُدّوس.

⁶ عَلَشان هُم كَبّو دَم القِدِّسين و الأنبياء، و إنتَ أدّيتُم دَم عَشان يَشرَبو، عَلَشان هُم مُستَحِقّين!“

⁷ و سِمِعتَ صوت مِن المَضبَح يَقول: ”أيوَه، يا رَب الإلَه القادِر عَلى كُلّو شي، أحكامَك حَق و عادِلَه!“

⁸ و المَلاك الرّابِع كَبَّ حَلَّتو عَلى الشَّمِس، و أدّو لِلشَّمِس أن تَحرَق النّاس بِالنّار.

⁹ و النّاس إنحَرَقو بِحَر شَديد و جَدَّفو عَلى إسم الله العِندو سُلطَه عَلى الضَّرَبات دي. و هُم ما تابو عَشان يَمَجِّدوهو.

¹⁰ و المَلاك الخامِس كَبَّ حَلَّتو عَلى كُرسي الوَحَش. و مَملَكتو بِقَت ضُلُمَّه. و النّاس عَضو عَلى لِساناتُم مِن الوَجَع.

¹¹ و هُم جَدَّفو عَلى إلَه السَّما بِسَبَب أوجاعُم و مِن دَبَرُم. و ما تابو مِن أعمالُم.

¹² و المَلاك السّادِس كَبَّ حَلَّتو عَلى البَحَر الكَبير، الفُرات. و البَحَر بِقى يابِس، عَشان يَجَهِّز سِكَّه لِلمُلوك البِجو مِن الشَّرق.

¹³ و شُفتَ تلاتَه أرواح نَجِسَه مَنظَرُم زي قَعونجَه. و هُم طَلَعو مِن خَشم التّنين و مِن خَشم الوَحَش و مِن خَشم النَّبي الكَضّاب.

¹⁴ عَشان هُم أرواح شياطين بيَعمِلو عَلامات. و يَمرُقو لِمُلوك الدُّنيا كُلَّها عَشان يَلِمّوهُم لِكِتال اليوم الكَبير، يوم الله القادِر عَلى كُلّو شي.

¹⁵ ”شوف! أنا بَجي زي الحَرامي! مُبارَك هو البِحرَس و بِحفَظ هِدومو عَلَشان ما يَمشي عَريان و يَوَرّي عيبو.“

¹⁶ و لَمّوهُم لِلمَكان الإسمو بِالعِبرانيَّه، هَرْمَجِدُّون.

¹⁷ و المَلاك السّابِع كَبَّ حَلَّتو عَلى الهَوا، و جا صوت عالي مِن الهيكَل، مِن الكُرسي، يَقول: ”هو خَلاص!“

¹⁸ و بَعدين حَصَلَت بُروق و أصوات و رُعود و زَلزَلَه كَبيرَه. و ما حَصَلَت زيَها أبَداً مِن وَكِت النّاس كانو عَلى الأرض، زَلزَلَه شَديدَه زي دي.

¹⁹ و المَدينَه العَظيمَه إنقَسَمَت لِتلاتَه أقسام، و مُدُن الأُمَم وَقَعو. و الله إتزَكَّر بابِل العَظيمَه عَشان يَدّيها فِنجان خَمر بِتاع شِدَّة غَضَبو.

²⁰ و كُلّو جَزيرَه هَرَبَت، و الجِّبال ما كانو مَوجودين.

²¹ و بَرَد كَبير مِن السَّما نَزَل عَلى النّاس، وَزِن كُلّو حَجَر كان مِيَّة رَطل تَقريباً. و النّاس جَدَّفو عَلى الله بِسَبَب ضَربَة البَرَد، عَلَشان الضَّربَه كانَت مِخَوِفَه جِدّاً.