رؤيا 14 - كِتاب العَهد الجَّديد مِن الكِتاب المُقَدَّس

الحَمَل و ال ١٤٤٬٠٠٠

¹ و بَعدين عايَنتَ، و شوف! الحَمَل واقِف عَلى جَبَل صِهيون، و مَعاهو مِيَّه و أربَعَه و أربَعين ألف. و هُم كانو عِندَهُم إسمو و إسم أبوهو مَكتوبين عَلى جَبهاتُم.

² و سِمِعتَ صوت مِن السَّما زي صوت مويَه كَتيرَه و زي صوت رَعد عَظيم. و الصّوت السِّمِعتو كان زي صوت البِضرُبو عَلى الرَّباب.

³ و هُم رَتَّلو تَرتيلَه جَديدَه قِدّام الكُرسي و قِدّام الأربَعَه حَيوانات و الشُّيوخ. و ما في واحِد قِدِر يِتعَلَّم التَّرتيلَه إلّا المِيَّه و الأربَعَه و الأربَعين ألف الكانو مُشتَرين مِن الأرض.

⁴ ديل هُم الما نَجَّسو نُفوسُم مَعَ النِّسوان، عَشان هُم نُضاف. و هُم يَتبَعو الحَمَل لِأي مَحَل الهو يَمشي ليهو. و كانو مُشتَرين مِن بين النّاس، أوَّل ثِمار لِلَّه و لِلحَمَل.

⁵ و ما لِقو كِضِب في خُشومُم، و هُم بِدون عيب.

⁶ و شُفتَ مَلاك تاني يَطير في وَسِط السَّما، و مَعاهو الإنجيل الأبَدي عَشان يَبَشِّر بيهو السّاكنين عَلى الأرض مِن كُلّو أُمَّه و قَبيلَه و لُغَه و شَعب.

⁷ و يَقول بِصوت عالي: ”خافو الله و مَجِّدوهو، عَلَشان ساعَة حُكمو جات. أعبُدو خالِق السَّما و الأرض و البَحَر و عُيون المويَه.“

⁸ و مَلاك تاني تَبَعو و يَقول: ”وَقَعَت! وَقَعَت بابِل المَدينَه الكَبيرَه، العَمَلَت كُل الأُمَم يَشرَبو مِن خَمر غَضَب زِناها.“

⁹ و مَلاك آخِر، التّالِت، تَبَعُم و يَقول بِصوت عالي: ”إذا أي واحِد يَعبُد الوَحَش و صَنَمو و يَقبَل عَلامتو عَلى جَبهَتو ولّا عَلى إيدو،

¹⁰ هو كَمان بِشرَب مِن خَمر غَضَب الله، الإتكَبّى بِدون لَخبَطَه في فِنجان غَضَبو. و بِتعَذَّب بِالنّار و الكِبريت قِدّام المَلائكَه القِدِّسين و قِدّام الحَمَل.

¹¹ و دُخان عَذابُم يَمشي فوق لِلأبَد. و ما عِندَهُم راحَه نَهار ولّا ليل، ديل البِيَعبُدو الوَحَش و صَنَمو، و كُلّو واحِد اليَقبَل عَلامَة إسمو.“

¹² و في دا يَظهَر صَبر القِدِّسين، ديل البِحفَظو أوامِر الله و إيمان بِيَسُوع.

¹³ و سِمِعتَ صوت مِن السَّما يَقول: ”أكتِب: مُبارَكين المَيِّتين، البِموتو في الرَّب مِن هَسَّع!“ ”أيوَه،“ يَقول الرّوح: ”عَلَشانُم بِستَريحو مِن أتعابُم، عَشان أعمالُم بِيَتبَعوهُم.“

حَصاد الأرض

¹⁴ و بَعدين عايَنتَ و شُفتَ سَحابَه بيضَة. و هو القَنَّب عَلى السَّحابَه كان زي إبن إنسان، و عَلى رَاسو تاج مِن الدَّهَب، و في إيدو مَنجَل سَنين.

¹⁵ و مَلاك تاني مَرَق مِن الهيكَل يَكورِك بِصوت عالي لِلقاعِد عَلى السَّحابَه: ”أرمي مَنجَلَك و أحصُد، عَشان ساعَة الحَصاد جات، عَشان حَصاد الأرض يبِس.“

¹⁶ و القاعِد عَلى السَّحابَه رَمى مَنجَلو فوق الأرض، و حَصاد الأرض كان مَحصود.

¹⁷ و مَلاك تاني مَرَق مِن الهيكَل الفي السَّما، و هو كَمان عِندو مَنجَل سَنين.

¹⁸ بَعدين مَلاك تاني مَرَق مِن المَضبَح. و هو كان عِندو سُلطَه عَلى النّار. و نادى المَلاك العِندو المَنجَل السَّنين بِصوت عالي يَقول: ”أرمي مَنجَلَك السَّنين، و لِم عَناقيد العِنَب مِن كَرم الأرض، عَشان عِنَبا بِقى نَجيض.“

¹⁹ و المَلاك رَمى مَنجَلو عَلى الأرض، و جَمَع عِنَبا، و رَماها في العَصارَه الكَبيرَه بِتاعَت غَضَب الله.

²⁰ و داسو العِنَب في العَصارَه بَرَّه مِن المَدينَه. و دَم مَرَق مِن العَصارَه و مَلا الواطَه لِغايَة ما وَصَل لِحَديد اللِّجام بِتاع الحُصان لِمَسافَة ميتين ميل تَقريباً.