رؤيا 13 - كِتاب العَهد الجَّديد مِن الكِتاب المُقَدَّس

الوَحَش مِن البَحَر

¹ و شُفتَ وَحَش طالِع مِن البَحَر، عِندو عَشَرَه قُرون و سَبعَه روسين. و عِندو عَلى قرونو عَشَرَه تيجان، و عَلى روسينو إسم تَجديف.

² و الوَحَش الشُّفتو كان زي النِّمر، لَكِن أقدامو زي أقدام الدُّب، و خَشمو زي خَشُم الأسَد. و التّنين أدّا لِلوَحَش قُوَّتو و كُرسيهو، و سُلطَه عَظيمَه.

³ و واحِد مِن روسينو ظَهَر إنّو كان مَجروح لِلموت، لَكِن جَرَحو الكان لِلموت، بِقى طَيب. و كُلّو ناس الأرض مَشو وَرا الوَحَش و إتعَجَّبو.

⁴ و النّاس عَبَدو التّنين، عَلَشانو أدّا الوَحَش سُلطتو. و هُم عَبَدو الوَحَش و قالو: ”مِنو يَشبَه الوَحَش؟ و مِنو يَقدَر يَحارِبو؟“

⁵ و أدّوهو خَشُم يتكَلَّم بِكِلمات مِتكَبِّرَه و بِتَجديف. و أدّو ليهو سُلطَه عَشان يِستَمِر إتنين و أربَعين شَهَر.

⁶ و هو فَتَح خَشمو بِالتَّجديف عَلى الله و عَلى إسمو و عَلى مَسكَنو، يَعني عَلى السّاكِنين في السَّما.

⁷ و أدّو ليهو أن يَحارِب القِدِّسين و يَغلِبُم. و أدّو ليهو سُلطَه عَلى كُلّو قَبيلَه و شَعب و لُغَه و أُمَّه.

⁸ و كُلّو سُكّان الأرض بِيَعبُدو الوَحَش، يَعني كُلّو واحِد إسمو ما كان مَكتوب مِن خَليقَة الدُّنيا في كِتاب الحَياة بِتاع الحَمَل الكان مَكتول.

⁹ العِندو أضان، خَليهو يَسمَع.

¹⁰ إذا أي واحِد بِكون لِلقَبَض، لِلقَبَض يَمشي. و إذا أي واحِد بِكتُل بِالسّيف، بِالسّيف يَكتُلوهو. و في دا القِدِّسين بِحتاجو لِلصَّبر و الإيمان.

الوَحَش مِن الأرض

¹¹ بَعدين شُفتَ وَحَش تاني طالِع مِن الأرض. و هو كان عِندو قَرنين زي حَمَل و يتكَلَّم زي تنين.

¹² و هو يَشتَغِل قِدّامو بِكُلّو سُلطات الوَحَش الأوَّل، و يَعمِل الأرض و السّاكِنين فيها يَعبُدو الوَحَش الأوَّل البِقي طَيب مِن جَرَحو الكان لِلموت.

¹³ و هو يَعمِل عَلامات عَظيمَه، حَتّى يَنَزِّل نار مِن السَّما لِلأرض قِدّام النّاس.

¹⁴ و يَغِش سُكّان الأرض بِالعَلامات الأدّو ليهو أن يَعمِل قِدّام الوَحَش. و يأمُر سُكّان الأرض أن يَصنَعو صَنَم لِلوَحَش الكان عِندو جَرَح السّيف و حِيى.

¹⁵ و أدّو ليهو أن يَدّي روح لِصَنَم الوَحَش عَشان يتكَلَّم، و يَعمِل كُل النّاس الما بِيَعبُدو صَنَم الوَحَش يَكونو مَكتولين.

¹⁶ و هو كَمان يَعمِل كُل النّاس أن يَقبَلو عَلامَه في إيدُم اليَمين ولّا في جَبهاتُم. أدّوها لِلصُّغار و الكُبار، الغَنيين و المَساكين، الحُرّين و العَبيد.

¹⁷ و عَلَشان كِدا، ما في واحِد بِقدَر يَشتَري ولّا يَبيع إلّا إذا كانَت عِندو العَلامَه، و هي إسم الوَحَش ولّا عَدَد إسمو.

¹⁸ و هِنا في حِكمَه. هو العِندو فَهم، خَليهو يَحسِب عَدَد الوَحَش، عَشان هو عَدَد زول. و عَدَدو سُتُّميَه و سِتَّه و سِتّين.