رؤيا 12 - كِتاب العَهد الجَّديد مِن الكِتاب المُقَدَّس

المَرَه و التّنين

¹ و عَلامَه عَظيمَه ظَهَرَت في السَّما: مَرَه هِدوما الشَّمِش، و تِحِت كِرعينا القَمَر، و تاج مِن إتناشَر نَجمَه عَلى راسا.

² و هي كانَت حامِل و تَكورِك و تِتوَجَّع عَشان قَرَّبَت تَلِد.

³ و عَلامَه تانيَه ظَهَرَت في السَّما: و شوف! تنين أحمَر كَبير، و عِندو سَبعَه روسين و عَشَرَه قُرون، و عَلى روسينو سَبعَه تيجان.

⁴ و ضَنَبو يَجُر تِلت مِن نُجوم السَّما، و رَماهُم لِلأرض. و التّنين وَقَف قِدّام المَرَه القَرَّبَت تَلِد، عَشان يَبلَع وَلَدا لَمّا وِلدَت.

⁵ و وِلدَت إبن، وَلَد، و هو ماشي يَملِك عَلى كُل الأُمَم بِعَصايَه مِن حَديد. و وَلَدا إتمَسَك و إتَّخَد لِلَّه و لِكُرسيهو.

⁶ و المَرَه هَرَبَت لِلخَلا لِلمَحَل الله جَهَّزو ليها عَشان يَهتَمّو بيها هِناك مُدَّة ألف و ميتين و سِتّين يوم.

⁷ و كان في حَرب في السَّما. مِخائيل و مَلائكَتو حارَبو التّنين. و التّنين و مَلائكَتو حارَبو كَمان.

⁸ و لَكِن هُم ما غَلَبوهُم. و بَعَد دا ما كان في مَحَل ليهُم في السَّما.

⁹ و التّنين الكَبير كان مَطرود، هو الدَّبيب القَديم، إسمو إبْلِيس و الشّيطان، البِغِش السّاكنين عَلى الأرض كُلّها. هو و مَلائكَتو مَعاهو إترَمو لِلأرض.

¹⁰ و سِمِعتَ صوت عالي في السَّما يَقول: ”هَسَّع جا الخَلاص و القُدرَه و مَلَكوت إلَهنا و سُلطَة مَسيحو. عَلَشان المُشتَكي عَلى أخوانّا إترَمى، هو البِشتَكي عَليهُم نَهار و ليل قِدّام إلَهنا.

¹¹ و هُم غَلَبوهو بِدَم الحَمَل و بِكِلمَة شَهادَتُم. و ما حَبّو حَياتُم كَتير و ما أبو يَموتو.

¹² عَلَشان كِدا أفرَحو، يا سَمَوات و إنتو السّاكِنين فيها! و مُصيبَه لِلأرض و لِلبَحَر، عَشان إبْلِيس نَزَل ليكُم. و غَضَبو عَظيم، عَلَشانو بِيَعرِف عِندو وَكِت قِصَير!“

¹³ و لَمّا التّنين شاف إنّو إترَمى لِلأرض، هو جَرى وَرا المَرَه الوِلدَت الإبن، الوَلَد.

¹⁴ و أدّو لِلمَرَه جِنحين النَّسر الكَبير عَلَشان تَطير لِلخَلا لِمَحَلّا. و هِناك بِهتَمّو بيها زَمَن و زَمنين و نُص زَمَن، بَعيد مِن وَش الدَّبيب.

¹⁵ و الدَّبيب رَمى مِن خَشمو مويَه زي البَحَر وَرا المَرَه، عَلَشان البَحَر يَشيلا بَعيد.

¹⁶ و الأرض ساعَدَت المَرَه، و فَتَحَت خَشما، و بَلَعَت البَحَر التّنين رَمى مِن خَشمو.

¹⁷ و التّنين غَضَب عَلى المَرَه. و مَشى عَشان يَحارِب باقي أولادا، البِحفَظو أوامِر الله و يَمسِكو بِشَهادَة يَسُوع.

¹⁸ و التّنين وَقَف عَلى رَمل البَحَر.