رؤيا 11 - كِتاب العَهد الجَّديد مِن الكِتاب المُقَدَّس

الشّاهِدين

¹ و أدّوني قَصَب زي عَصايَة القِياس، و قالو لَي: ”قوم و قيس هيكَل الله و المَضبَح و النّاس اليَعبُدو فيهو.

² و سيب الحوش البَرَّه مِن الهيكَل، و ما تَقيسو. عَلَشان أدّوهو لِلأُمَم، و هُم بِدوسو المَدينَه المُقَدَّسَه تِحِت كِرعينُم لِإتنين و أربَعين شَهَر.

³ و أنا بَدّي لِشاهِديني قُوَّه، و هُم بِتنَبّو مُدَّة ألف و ميتين و سِتّين يوم و هُم لابسين شَوال.“

⁴ و ديل هُم شَجَرتين الزّيتون و المَنارتين البِقومو قِدّام رَب الأرض.

⁵ و إذا واحِد عاوِز يَضُرّم، نار بِتَمرُق مِن خُشومُم و بِتاكُل عُدوانُم. و أي واحِد العاوِز يَضُرّم، كِدا لازِم يَموت.

⁶ و الراجلين ديل عِندَهُم سُلطَه يَقفِل السَّما، عَشان المَطَر ما بِنزِل في الأيام لَمّا يِتنَبّو فيها. و عِندَهُم سُلطَه فوق المويَه عَشان يَغَيِّروها لِدَم، و عَشان يَضرُبو الأرض بِكُلّو ضَربَه مَرّات كَتيرَه زي ما بِدورو.

⁷ و لَمّا كَمَّلو شَهادَتُم، الوَحَش البِطلَع مِن الحُفرَه الغَريقَه خَلاص بِحارِبُم و بِيَغلِبُم و يَكتُلُم.

⁸ و أجسامُم المَيِّتين بِكونو عَلى شارِع المَدينَه العَظيمَه، إسِما الرّوحيَّه، سَدوم و مَصر، في المَحَل الفيهو رَبُّم إنصَلَب.

⁹ و ناس مِن الشُّعوب و القَبايل و اللُّغات و الأُمَم بِعاينو لِأجسامُم المَيِّتين مُدَّة تلاتَه أيام و نُص. و هُم بِيابو يَدفِنوهُم في قَبر.

¹⁰ و السّاكنين عَلى الأرض بِيَفرَحو و يَحتَفِلو و يَرَسِّلو هَدايا بَعضَهُم لِبَعض عَلَشان النَّبيين ديل عَذَّبو السّاكنين عَلى الأرض.

¹¹ و بَعَد تَلاتَة أيام و نُص، روح حَياة مِن الله دَخَل فيهُم. و هُم وَقَفو عَلى كِرعينُم. و النّاس الشَّفوهُم خافو خوف شَديد.

¹² و بَعدين سِمِعو صوت عالي مِن السَّما يَقول ليهُم: ”أطلَعو لِهِنا!“ و طَلَعو لِلسَّما في سَحابَه و عُدوانُم عايَنو ليهُم.

¹³ و في السّاعَه ديك كانَت في زَلزَلَه كَبيرَه، و عُشر المَدينَه وَقَع. و سَبعَة آلاف مِن النّاس كانو مَكتولين بِالزَّلزَلَه. و باقي النّاس خافو شَديد خالِص و مَجَّدو إلَه السَّما.

¹⁴ المُصيبَه التّانيَه فاتَت، و شوف! التّالتَه تَجي قَوام.

البوق السّابِع

¹⁵ و المَلاك السّابِع نَفَخ في البوق، و كان في أصوات عاليَه في السَّما يَقولو: ”مَملَكَة الدُّنيا بِقَت مَملَكَه لِرَبَّنا و لِمَسيحو. و هو بِيَحكُم لِلأبَد!“

¹⁶ و الأربَعَه و عِشرين شيخ، الكانو قاعِدين عَلى كَراسيهُم قِدّام الله، وَقَعو عَلى وُشوشُم و عَبَدو الله.

¹⁷ و قالو: ”نَشكُرَك، يا رَب، الإلَه القادِر، المَوجود و الكان مَوجود، عَلَشان إنتَ أخَدتَ قُدرَتَك العَظيمَه و إبتَديت تَملِك.

¹⁸ الأُمَم بِقو زَعلانين، و غَضَبَك جا. و الزَّمَن جا عَشان تَحكُم عَلى المَيِّتين، و تَدّي الأُجرَه لِخَدّامينَك الأنبياء و القِدِّسين البِخافو إسمَك، الصُّغار و الكُبار. و عَشان تَخرَب ديل البِخرَبو الأرض.“

¹⁹ و هيكَل الله الفي السَّما إنفَتَح، و تابوت الإتِّفاق ظَهَر في هيكَل الله. و حَصَل بُروق و أصوات و رُعود و زَلزَلَه و بَرَد تَقيل.