رؤيا 10 - كِتاب العَهد الجَّديد مِن الكِتاب المُقَدَّس

المَلاك و الكِتاب الصَّغَير

¹ و بَعدين شُفتَ مَلاك تاني قَوّي نازِل مِن السَّما. هو كان مَلفوف بِسَحابَه، و عَلى رَاسو قوس سَحاب. و وَشّو زي الشَّمِش، و كِرعينو زي عَمودين مِن نار.

² و في إيدو كِتاب صَغَيِر مَفتوح. و هو خَتَّ كِراعو اليَمين عَلى البَحَر، و الشِّمال عَلى الأرض.

³ و كورَك بِصوت عالي زي صوت الأسَد. و لَمّا هو كورَك، السَّبعَه رُعود إتكَلَّمو بِأصواتُم.

⁴ و لَمّا السَّبعَه رُعود إتكَلَّمو، أنا قَرَّبتَ أكتِب. لَكِن سِمِعتَ صوت مِن السَّما يَقول: ”خُت خِتِم عَلى الحاجات السَّبعَه رُعود إتكَلَّمو بيها، و ما تَكتِبا.“

⁵ و المَلاك الأنا شُفتو واقِف عَلى البَحَر و عَلى الأرض رَفَع إيدو اليَمين لِلسَّما.

⁶ و هو حَلَف بيهو البِعِيش لِلأبَد، الخَلَق السَّما و كُل الفيها، و الأرض و كُل الفيها، و البَحَر و كُل الفيهو. و قال: ”ما بِكون في زَمَن بَعَد دا!

⁷ لَكِن في الأيام لَمّا المَلاك السّابِع يَقَرِّب يَضرُب بِالبوق، في الوَكِت دا، سِر الله بِتِم، زي ما هو بَشَّر بيهو خَدّامينو الأنبياء.“

⁸ بَعدين الصّوت الكُنتَ سِمِعتو مِن السَّما كَلَّمني مَرَّه تانيَه و قال: ”أمشي و أُخُد الكِتاب المَفتوح في إيد المَلاك الواقِف عَلى البَحَر و عَلى الأرض.“

⁹ و مَشيت لِلمَلاك، و سألتو أن يَدّيني الكِتاب الصَّغَير. و هو قال لَي: ”أُخدو و أُكلو، و هو بيَعمِل بَطنَك مُر، لَكِن في خَشمَك بِكون حِلو زي العَسَل.“

¹⁰ و أخَدتَ الكِتاب الصَّغَير مِن إيد المَلاك و أكَلتو. و في خَشمي كان حِلو زي العَسَل، و بَعَد ما أكَلتو، بِقى مُر في بَطني.

¹¹ و بَعَد دا قال لَي: ”واجِب عَليك تِتنِبّى تاني مَرَّه عَن شُعوب و أُمَم و لُغات و مُلوك كُتار.“