رؤيا 1 - كِتاب العَهد الجَّديد مِن الكِتاب المُقَدَّس

سَلامات و حَمد

¹ رؤيا يَسُوع المَسيح الأدّاهو ليهو الله عَشان يَوَرّي لِخَدّامينو الحاجات اللازِم تَحصُل بَعَد شوَيَه. و هو رَسَّل و بِيَّنو بِمَلاكو لِخَدّامو يُوحَنَّا.

² و هو شِهِد بِكِلمَة الله و بِشَهادَة يَسُوع المَسيح بِكُلّو شي الهو شافو.

³ مُبارَك هو البِقرا و هُم البِسمَعو كِلمات النُّبوَّه دي، و يَحفَظو الحاجات المَكتوبَه فيها. عَشان الوَكِت قَريب.

⁴ مِن يُوحَنَّا لِلسَّبعَه كَنايس الفي آسيا: النِّعمَه ليكُم و السَّلام مِنّو المَوجود و الكان مَوجود و الماشي يَجي، و مِن السَّبعَه أرواح الفي قِدّام كُرسيهو.

⁵ و مِن يَسُوع المَسيح الشّاهِد الأمين و البِكر مِن بين المَيِّتين و رَئيس مُلوك الأرض. ليهو البِحِبّنا و أدّانا الحُرّيَّه مِن خَطايانا بِدَمّو.

⁶ وَ عَمَلنا مَلَكوت و قُسُس لِلَّه أبوهو، ليهو المَجد و السُّلطَه لِلأبَد! آمين.

⁷ شوفو! هو جاي مَعَ السَّحاب. و كُلّو عين بِتشوفو، حَتّى ديل الطّعَنوهو. و كُلّو قَبايل الأرض بيبكو عَليهو. أيوَه، خَليهو يَكون كِدا.

⁸ ”أنا البِدايَه و النِّهايَه،“ يَقول الله الرَّب، المَوجود و الكان مَوجود و الماشي يَجي، القادِر عَلى كُلّو شي.

رؤيا المَسيح

⁹ أنا، يُوحَنَّا، أخوكُم و شَريككُم في التَّعب و في المَلَكوت و الصَّبر في يَسوع، كُنتَ في الجَّزيرَه الإسِما بَطمُس عَشان خاطِر كِلمَة الله و شَهادة يَسوع.

¹⁰ و كُنتَ في الرّوح في يوم الرَّب، و سِمِعتَ وَراي صوت عالي زي صوت بوق.

¹¹ و الصّوت قال: ”أكتِب الحاجَه التَّشوفا في كِتاب، و رَسِّلو لِلسَّبعَه كَنايس، لِأفَسُس و لِسِمِيرْنَا و لِبَرْغَامُس و لِثَيَاتِيرَا و لِسَارْدِس و لِفِيلَادَلْفِيَا و لِلاوُدِكِيَّه.“

¹² و إتلَفَتَّ عَشان أشوف الصّوت الإتكَلَّم مَعاي. و لَمّا إتلَفَتَّ، شُفتَ سَبعَه مَناوِر مِن دَهَب.

¹³ و في وَسِط السَّبعَه مَناوِر، واحِد زي إبن إنسان، كان لابِس توب يَمشي تِحِت لِكِرعينو، و مَربوط حَول صَدرو بِحِزام مِن دَهَب.

¹⁴ و رَاسو و شَعرو زي الصّوف الأبيَض و زي التَّلِج. وَ عُيونو زي نار مَوَلَّعَه.

¹⁵ و كِرعينو زي النَّحاس الأصفَر مَوَلَّع في فُرن، و صوتو زي صوت مويَه كَتيرَه.

¹⁶ و في إيدو اليَمين عِندو سَبعَه نُجوم و ماشي مِن خَشمو سيف سَنين، عِندو طَرَفين. و وَشّو يَنَوِّر زي الشَّمِش في قوَتو.

¹⁷ و لَمّا شُفتو، وَقَعتَ عِند كِرعينو زي الزّول المَيِّت. و هو خَتَّ إيدو اليَمين عَلي و قال: ”ما تَخاف. أنا هو الأوَّل و الآخِر.

¹⁸ أنا هو الحَي. و كُنتَ مَيِّت، و شوف، أنا حَي لِلأبَد! و أنا عِندي مَفاتيح الموت و الهاويَه.

¹⁹ عَلَشان كِدا، أكتِب الحاجات الشُّفتَها، و الحاجات المَوجودَه، و الحاجات البِتَحصُل بَعَد دا.

²⁰ سِر السَّبعَه نُجوم الأنتَ شُفتَها في يَميني و السَّبعَه مَناوِر مِن دَهَب، دا هو: السَّبعَه نُجوم، هُم مَلائِكَة السَّبعَه كَنايس، و السَّبعَه مَناوِر، هُم السَّبعَه كَنايس.