فيلِبّي 3 - كِتاب العَهد الجَّديد مِن الكِتاب المُقَدَّس

البِر الحَقيقي

¹ في الآخِر، يا أخوان، أفرَحو في الرَّب. كِتابَة الحاجات دي ما صَعبَه عَلي، لَكِن عَشان تَحفَظكُم.

² خَلّو بالكُم مِن الكِلاب. خَلّو بالكُم مِن اليَعمِلو الشَّر. خَلّو بالكُم مِن اليَقطَعو الجِسم.

³ عَشان نِحنا المُطَهَّرين النَّعبُد الله بِروح. و عِندَنا كِبِر في المَسيح يَسُوع، و ما نَتَّكِل عَلى الجِّسِم.

⁴ مَعَ إنّو لَي سَبَب عَشان أتَّكِل عَلى الجِّسِم كَمان. إذا واحِد تاني يَفتَكِر هو عِندو سَبَب عَشان يَتَّكِل عَلى الجِسم، أنا عِندي زِيادَه مِنّو:

⁵ أنا كُنتَ مُطَهَّر في اليوم التّامِن، مِن جِنس إِسْرَائِيل، مِن قَبيلَة بنْيَامِين، عِبراني مِن العِبرانيين. في خُصوص القانون، فرِّيسي.

⁶ في خُصوص الغيرَه، طارِد الكَنيسَه. في خُصوص البِر الفي القانون، بِدون لوم.

⁷ و لَكِن كُل الكان رِبِح لَي، حَسبتو خَسارَه فِشان المَسيح.

⁸ بِالأكتَر، أحسِب كُلّو شي خَسارَه عَلَشان المَعرِفَه البِتفوت عَن كُلّو شي، يَعني مَعرِفَة المَسيح يَسُوع رَبّي. و فِشانّو، أنا خَسَرتَ كُل الحاجات و أحسِبا زي حاجَه خَربانَه عَشان آخُد المَسيح،

⁹ و عَشان هو يَلقاني فيهو، مُش بِبِرّي المِن القانون، و لَكِن بِالبِر البِالإيمان بِالمَسيح، البِر المِن الله بِالإيمان.

¹⁰ عَشان أعرِفو و قُوَّة قيامَتو، و شَرِكَة أتعابو، و بَكون زيهو في موتو.

¹¹ عَشان إذا مُمكِن، أحَصِّل عَلى القيامَه مِن بين المَيِّتين.

الجَّري لِلقَصِد

¹² أنا ما أخَدتَ دي مِن قَبل، ولّا بِقيت كامِل. و لَكِن أجري طَوّالي عَشان أمسِك دا، الكان السَّبَب المَسيح يَسُوع مَسَكني.

¹³ يا أخوان، أنا لِسَّع ما أحسِب إنّي مَسَكتَ بيهو. و لَكِن أعمِل حاجَه واحدَه بَس: أنسى الحاجات الفي وَرا، و أتقَدَّم بِكُلّو قوَّتي لِلحاجات الفي قِدّام.

¹⁴ و اجري طَوّالي لِلقَصِد عَشان أقبَل الأُجرَه الهو بِالمَسيح يَسُوع ناداني ليها نَحو فوق.

¹⁵ كُلُّنا الكامِلين، خَلّينا نَفتَكِر كِدا. و إذا عِندَكُم فِكر تاني في أي شي، الله يَوَرّيكُم داك كَمان.

¹⁶ لَكِن خَلّينا نَعيش بِالحَق لِلشّي الوِصِلنا ليهو.

¹⁷ يا أخوان، عيشو مَعَ بَعض زي ما أنا بَعيش، و شوفو تَمام هُم البِعيشو بِالمَثَل النِحنا أدّيناهو ليكُم.

¹⁸ عَلَشان، زي ما كَلَّمتَكُم مَرّات كَتيرَه قُبّال، و أقول تاني و أنا أبكي، ناس كُتار يَعِيشو زي عُدوان صَليب المَسيح.

¹⁹ نِهايَتُم هي الخَراب، و إلَهُم هو بُطونُم، و مَجدُم هو خَجَلُم، و فِكرُم في حاجات الدُّنيا.

²⁰ و لَكِن وَطَنّا في السَّما. و نَستَنّا مُخَلِّص مِن هِناك، الرَّب يَسُوع المَسيح.

²¹ هو بِغَيِّر جِسِمنا المِتواضَع، عَشان بِكون زي جِسمو المَجيد. و هو بيَعمِل دا بِنَفس القُوَّه البيها هو بِقدَر يَخُت كُلّو شي تِحِت سُلطتو.