فيلِبّي 1 - كِتاب العَهد الجَّديد مِن الكِتاب المُقَدَّس

¹ بُولُس، و تِيمُوثَاوُس، خَدّامين المَسيح يَسُوع، لِكُل المُقَدَّسين في المَسيح يَسُوع الفي فيلِبّي، مَعَ المُلاحِظين و خَدّامين الكَنيسَه.

² نِعمَه ليكُم و سَلام مِن الله أبونا و الرَّب يَسُوع المَسيح.

الشُّكر و الصَّلاه

³ أشكُر إلَهي كُلّو مَرَّه لَمّا أنا أتذَكَّركُم.

⁴ كُلّو وَكِت في كُلّو صَلاتي لِكُلُّكُم، أنا بَطلُب دايماً بِفَرَح.

⁵ و بَشكُر الله عَشان شَرِكَتكُم في الإنجيل مِن اليوم الأوَّل لِغايَة هَسَّع.

⁶ و أنا مِتأكِّد في الحاجَه دي، إن هو الإبتَدا عَمَل كوَيس فيكُم، بِكَمِّلو لِغايَة يوم المَسيح يَسُوع.

⁷ و دا تَمام لَي أن أفتَكِر كِدا عَن كُلُّكُم، عَلَشان أحفَظكُم كُلُّكُم في قَلبي. فِشان كُلُّكُم تَشارِكوني في نِعمَة الله، إذا أنا في جَنازِير ولّا أحرِس الإنجيل و أوَرّي إنّو هو الحَق.

⁸ عَشان الله شاهِد لَي كيف أنا عاوِز أشوف كُلُّكُم بِمَحَبَّة يَسُوع المَسيح.

⁹ و أهي دي الصَّلاه بِتاعي: أن مَحَبَّتكُم تَزيد أكتَر و أكتَر في المَعرِفَه و في كُلّو فَهم،

¹⁰ عَشان تَفهَمو الأحسَن في الحاجات، و تَكونو نُضاف و بِدون لوم لِغايَة يوم المَسيح.

¹¹ مَليانين مِن ثِمار البِر البِجي بِيَسُوع المَسيح لِمَجد الله و حَمدو.

جَنازِير بُولُس يَساعِد البِشارَه

¹² و عاوِزكُم تَعرِفو، يا أخوان، الحَصَل لَي، هو السَّبَب الإنجيل إتقَدَّم.

¹³ عَلَشان دا، بِقى مَفهوم لِكُلّو حُرّاس الحَكومَه و لِكُلّو ناس تانيين إنّي مَحبوس فِشان المَسيح.

¹⁴ و أكتَر الأخوان بِقو مِتأكِّدين في الرَّب بِسَبَب جَنازِيري. و عِندَهُم شَجاعَه أكتَر عَشان يِتكَلَّمو بِكِلمَة الله بِدون خوف.

¹⁵ صَحيح، ناس تانيين يَبَشِّرو بِالمَسيح مِن حَسَد و شَكَل، و لَكِن تانيين يَبَشِّرو مِن سُرور.

¹⁶ هُم يَعمِلوهو مِن مَحَبَّه، عَشان هُم عارفين الله خَتّاني هِنا عَشان أحرِس الإنجيل.

¹⁷ التّانيين يَبَشِّرو بِالمَسيح مِن شَكَل، مُش بِإخلاص. و هُم يَفتَكِرو يَزيدو الوَجَع بِتاعي وَكِت أنا مَحبوس.

¹⁸ مَعليش. الشّي المُهِم هو أن يَبَشِّرو بِالمَسيح، إذا بِسَبَب كاضِب ولّا بِسَبَب حَقيقي. و بِدا، أنا فَرحان. أيوَه، و أنا بَفرَح كَمان.

¹⁹ عَلَشان أنا عارِف نِهايَة الحَصَل لَي بِكون لِخَلاصي، عَلَشان صَلاتكُم و مُساعَدَة روح يَسُوع المَسيح.

²⁰ أنتَظِر و عِندي رَجاء إنّي ما بَكون خَجلان أبَداً، و لَكِن بِكون عِندي شَجاعَه حَتّى المَسيح بِكون مُحتِرَم في جِسمي هَسَّع، زي في كُلّو وَكِت، إذا بِالحَياة ولّا بِالموت.

²¹ عَشان الحَياة لَي هي المَسيح، و الموت هو رِبِح.

²² و لَكِن إذا الحَياة في الجِّسم تَجيب ثِمار مِن عَمَلي، أنا ما عارِف أختار شِنو.

²³ أنا مَربوط بين الإتنين. أنا داير أمرُق و بَكون مَعَ المَسيح، عَشان دا أحسَن بِكَتير.

²⁴ و لَكِن ضَروري جِدّاً بَقعُد في الجِّسم عَشانكُم.

²⁵ و عَلَشان أنا مِتأكِّد في دا، أنا عارِف إنّي بَقعُد و أستَمِر مَعَ كُلُّكُم، عَشان تِتقَدَّمو و تَفرَحو في الإيمان.

²⁶ و عَشان يَزيد فَخرَكُم في المَسيح يَسُوع بِواسطَتي لَمّا أجي ليكُم تاني.

²⁷ عَلى كِدا، عيشو بِطَرِيقَه مُستَحِقَّه إنجيل المَسيح. كِدا، إذا بَجي أشوفكُم ولّا إذا أنا ما في، بَسمَع عَنكُم إنَّكُم ثابِتين في روح واحِد، و إنَّكُم تَتعَبو بِنَفس واحدَه لِإيمان الإنجيل،

²⁸ و ما خايفين في أي شي مِن عُدوانكُم. دي شَهادَه ليهُم عَلى الخَراب، و لَكِن ليكُم عَلى الخَلاص. و داك مِن الله.

²⁹ عَشان كِدا، الله، فِشان المَسيح، أدّا ليكُم مُش أن تَآمِنو فيهو بَس، لَكِن أن تِتوَجَّعو عَشان خاطِرو كَمان،

³⁰ و ليكُم نَفس التَّعب الإنتو شُفتوني فيهو، و هَسَّع تَسمَعو إنّي فيهو.