فِلِيمُون 1 - كِتاب العَهد الجَّديد مِن الكِتاب المُقَدَّس

¹ مِن بُولُس مَحبوس المَسيح يَسُوع و مِن تِيمُوثَاوُس الأخو لِفِلِيمُون حَبيبنا و العامِل مَعانا.

² و لِأَبْفِيَّه الأُخُت و أَرْخِبُّس العَسكَري مَعانا و لِلكَنيسَه الفي بيتَك.

³ نِعمَه ليكُم و سَلام مِن الله أبونا و الرَّب يَسُوع المَسيح.

الشُّكر و الصَّلاه

⁴ بَشكُر إلَهي دايماً و بَتزَكَّرَك في صَلَواتي.

⁵ عَشان بَسمَع بِمَحَبَّتَك و إيمانَك نَحو الرَّب يَسُوع و لِكُل القِدِّسين.

⁶ بَصَلّي أن شَرِكَة إيمانَك بِتساعِدكُم عَشان تَعرِفو كُل الخير الفينا بِالمَسيح.

⁷ عَشان عِندَنا فَرَح كَتير و تَعزيَه مِن مَحَبَّتَك. عَلَشانَك، يا أخوّي، أدّيت راحَه لِقُلوب القِدِّسين.

⁸ عَلَشان كِدا، عِندي في المَسيح شَجاعَه كَتيرَه أن آمُرَك تَعمِل زي المُستَحِق.

⁹ لَكِن فِشان المَحَبَّه، بَطلُب بِالأكتَر، أنا، بُولُس الشّيخ و هَسَّع مَحبوس المَسيح كَمان.

¹⁰ أطلُب ليك فِشان وَلَدي أُونِسِيمُوس الوَلَدتو في الجَّنازِير.

¹¹ و قُبّال دا، هو ما كان عِندو فايدَه ليك، و لَكِن هَسَّع عِندو فايدَه ليك و لَي.

¹² أنا بَرَجِّعو ليك، و دا زي ما بَرَسِّل ليك قَلبي زاتو.

¹³ و كُنتَ داير أحفَظو مَعاي، عَلَشان يَخدِمني بَدَلَك في جَنازِير الإنجيل.

¹⁴ لَكِن أنا ما عاوِز أسَوّي شي بِدون فِكرَك، فِشان خِيرَك ما بِكون مِن اللازِم تَعمِلو، لَكِن عَشان إنتَ إختِرتو.

¹⁵ يِمكِن هو مَشى مِنَّك لِوَكِت قَليل عَلَشان يَكون ليك لِلأبَد.

¹⁶ و بَعَد دا ما تَفتَكِر هو زي عَبد لَكِن أحسَن مِن عَبد. هو زي أخو مَحبوب، خُصوصاً لَي، و كَم بِالأكتَر ليك، في الجِّسِم و في الرَّب.

¹⁷ و إذا تَحسِبني شَريك، أقبَلو زي نَفسي.

¹⁸ و إذا كان ظَلَمَك في شي، ولّا هو مَديون ليك، أحسِب داك عَلي.

¹⁹ أنا بُولُس بَكتِب دا بِإيدي. أنا بَدفَع. و ما بَقول ليك إنتَ مَديون لَي حَتّى بِنَفسَك كَمان.

²⁰ أيوَه، يا أخوّي، أنا عاوِز فايدَه مِنَّك في الرَّب. أدّيني راحَه لِقَلبي في المَسيح.

²¹ و عَلَشان عِندي تأكيد إنَّك تَطيع، بَكتِب ليك و بَعرِفَك تَعمِل أكتَر مِن البَطلُب.

²² و مَعَ دا، جَهِّز لَي أوضَة الضّيف، فِشان عِندي رَجاء بَرجَع ليكُم بِصَلَواتكُم.

²³ أَبَفْرَاس المَحبوس مَعاي في المَسيح يَسُوع يَسَلِّم عَليك.

²⁴ و كَمان مَرْقُس و أَرِسْتَرْخُس و دِيمَاس و لُوقَا العامِلين مَعاي.

²⁵ نِعمَة الرَّب يَسُوع المَسيح مَعَ روحكُم. آمين.