مَرْقُس 9 - كِتاب العَهد الجَّديد مِن الكِتاب المُقَدَّس

¹ و قال ليهُم: ”أقول ليكُم الحَق، بَعَض مِن النّاس الواقفين هِنا ما بِضوقو الموت لِغايَة ما بِشوفو مَلَكوت الله جاي بِقُوَّه.“

التَّغيير المَجيد

² و بَعَد سِتَة أيام، يَسُوع أخَد مَعاهو بُطْرُس و يَعْقُوب و يُوحَنَّا. و طَلَع بيهُم لِجَبَل عالي بَراهُم. و شَكلو إتغَيَّر قِدّامُم.

³ و هِدومو بِقى أبيَض، لامِع جِدّاً، ما في واحِد في الدُّنيا يَقدَر يَعمِلو أبيَض زي دا!

⁴ و ظَهَر ليهُم إِيلِيَّا و مُوسَى، و كانو يِتكَلَّمو مَعَ يَسُوع.

⁵ و بُطْرُس رَدَّ و قال لِيَسُوع: ”يا سَيِّد، كوَيس لينا نَكون هِنا. خَلّونا نَصنَع تلاتَه خيام، واحدَه ليك، و واحدَه لِمُوسَى، و واحدَه لِإِيلِيَّا.“

⁶ عَشان هو ما عِرِف يَقول شِنو، عَلَشان هُم كانو خايفين جِدّاً.

⁷ و سَحابَه غَطَّتُم، و صوت جا مِن السَّحابَه و قال: ”دا هو إبني الحَبيب. أسمَعو ليهو.“

⁸ و عَلى غَفلَه لَمّا عايَنو حَواليهُم، هُم ما شافو أي واحِد مَعاهُم بَعَد دا إلّا يَسُوع بَس.

⁹ و وَكِت ما كانو نازِلين مِن الجَّبَل، أمَرُم ما يَخَبِّرو أي واحِد بِالهُم شافوهو، لِغايَة ما إبن الإنسان قام مِن بين المَيِّتين.

¹⁰ عَشان كِدا، حَفَظو الكَلام لِنُفوسُم، و كانو يَسألو بَعضَهُم لِبَعض مَعنى القيامَه مِن بين المَيِّتين.

¹¹ و سألوهو: ”لِشِنو مُعَلِّمين القانون بِقولو إِيلِيَّا لازِم بِجي في الأوَّل؟“

¹² و قال ليهُم: ”صَحيح، إِيلِيَّا يَجي في الأوَّل و بِرَجِّع كُلّو شي. و كيف مَكتوب عَن إبن الإنسان، إنّو يِتعَذَب كَتير، و يَكون مَرفوض؟

¹³ لَكِن أقول ليكُم، إِيلِيَّا جا بِالحَق، و النّاس عَمَلو بيهو زي ما دايرين، زي ما مَكتوب عَنّو.“

شِفا الوَلَد المِتعَذَّب

¹⁴ و لَمّا هُم جو لِلتَّلاميذ التّانيين، شافو ناس كُتار حَواليهُم، و مُعَلِّمين القانون يِتكَلَّمو مَعاهُم.

¹⁵ و طَوّالي كُل النّاس لَمّا شافوهو، إستَغرَبو، و جَرو ليهو و سَلَّمو عَليهو.

¹⁶ و هو سألُم و قال: ”تِتكَلَّمو مَعاهُم عَن شِنو؟“

¹⁷ و واحِد مِن النّاس رَدَّ عَليهو و قال: ”يا مُعَلِّم، جِبتَ ليك وَلَدي، عَشان عِندو روح أبكَم.

¹⁸ و في كُلّو مَحَل الرّوح يَمسِكو، يَرميهو لِلأرض. و هو يَزَبِّد، و يَعُض أسنانو، و يَبقى يابِس. و طَلَبتَ لِتَلاميذَك أن يَطَلِّعوهو، لَكِن ما قِدرو.“

¹⁹ و رَدَّ عَليهُم و قال: ”يا ناس الزَّمَن البِدون إيمان، بَكون مَعاكُم لِمِتين؟ بَصبُر عَليكُم لِمِتين؟ جيبوهو لَي.“

²⁰ و قَدَّمو ليهو الوَلَد. و لَمّا الرّوح شاف يَسُوع، طَوّالي رَمى الوَلَد، و هو وَقَع عَلى الأرض، و إدَّردَق، و إتزَبَّد.

²¹ و يَسُوع سأل أبوهو و قال: ”مِن مِتين هو كان كِدا؟“ و قال: ”مِن الوَكِت الهو كان صَغَيِر.

²² و مَرّات كَتيرَه رَماهو في النّار و في المويَه عَشان يَخرِبو. لَكِن إذا تَقدَر تَعمِل حاجَه، أرحَمنا و ساعِدنا.“

²³ و يَسُوع قال ليهو: ”تَقول: إذا تَقدَر! كُلّو شي مُمكِن لِلزّول البِصَدِّق.“

²⁴ و طَوّالي أبو الوَلَد كورَك و قال: ”أنا بَصَدِّق. ساعِدني في ضُعف إيماني.“

²⁵ و لَمّا يَسُوع شاف النّاس يَجو جاريين سَوا، وَبَّخ الرّوح النَّجِس، و قال ليهو: ”يا الرّوح الأبكَم الأطرَش، أنا بَدّيك أمر اطلَع مِنّو، و لا تَدخُلو مَرَّه تانيَه أبَداً.“

²⁶ و كورَك، و رَماهو بِشِدَّه، و طَلَع مِنّو. و الوَلَد كان زي المَيِّت، و عَلَشان كِدا، كَتير مِن النّاس قالو: ”هو مات.“

²⁷ و لَكِن يَسُوع مَسَكو بِإيدو، و رَفَعو، و هو قام.

²⁸ و لَمّا دَخَل البيت، تَلاميذو سَألو و هُم بَراهُم، و قالو: ”نِحنا ما قِدِرنا نَطَلِّعو لِشِنو؟“

²⁹ و قال ليهُم: ”ما مُمكِن يَطَلِّعو النّوع دا إلّا بِالصَّلاه و الصّوم.“

³⁰ و مَرَقو مِن هِناك و مَرّو بِالجَّليل. و هو ما كان داير واحِد يَعرِف هو وين،

³¹ عَشان كان يَعَلِّم تَلاميذو و يَقول ليهُم: ”إبن الإنسان يَسَلِّموهو لِإيدين النّاس. و هُم بِيَكتُلوهو. و لَمّا يَكتُلوهو، بِقوم بَعَد تَلاتَة أيام.“

³² و لَكِن ما فِهمو كَلامو، و خافو يَسألوهو.

مِنو الأكبَر

³³ و جو لِكَفْرَنَاحُوم. و لَمّا يَسُوع كان في البيت، سألُم و قال: ”كُنتو تِتكَلَّمو مَعَ بَعض في السِّكَّه عَن شِنو؟“

³⁴ و سَكَتو، عَشان كانو يِتكَلَّمو في السِّكَّه بَعضَهُم مَعَ بَعض، في مِنو هو الأكبَر مِنَّهُم.

³⁵ و هو قَنَّب، و نادى الإتناشَر، و قال ليهُم: ”إذا واحِد عاوِز يَبقى الأوَّلاني، لازِم يَبقى آخِر الكُل و خَدّام لِلكُل.“

³⁶ بَعدين أخَد وَلَد، و وَقَّفو في وَسِطُم. و حَضَنو، و قال ليهُم،

³⁷ ”اليَقبَل واحِد مِن الأولاد زي دا فِشان إسمي، يَقبِلني. و اليَقبِلني، ما يَقبِلني، لَكِن هو الرَّسَّلني.“

³⁸ يُوحَنَّا قال ليهو: ”يا مُعَلِّم، شُفنا واحِد يَطَلِّع شياطين بِإسمَك، و مَنَعناهو، عَشان ما يَتبَعنا.“

³⁹ لَكِن يَسُوع قال: ”ما تَمنَعوهو. ما في واحِد يَعمِل بِقُوَّه بِإسمي و طَوّالي يَقدَر يَقول عَلي الشَّر.

⁴⁰ عَشان الما عَلينا، هو مَعانا.

⁴¹ أقول ليكُم الحَق، البِدّيكُم كُبّايَه مويَه بِإسمي عَشان إنتو بِتوع المَسيح، هو ما يَوَدِّر أُجرَتو.

⁴² و اليَكون سَبَب الخَطيَّه لِواحِد مِن الصُّغار ديل البِصَدِّقو بي، أحسَن ليهو إذا رَبَطو مُرحاكَه في رَقَبتو و رَموهو في البَحَر.

⁴³ و إذا إيدَك سَبَب خَطيَّتَك، أقطَعا.

⁴⁴ أحسَن ليك تَدخُل الحَياة بِإيد واحدَه مِن أن تَمشي لِجَهَنَّم لِلنّار الما بِتموت، و عِندَك إيدين.

⁴⁵ و إذا كُراعَك سَبَب خَطيَّتَك، أقطَعا.

⁴⁶ أحسَن ليك تَدخُل الحَياة أعرَج مِن أن يَرموك في الجَهَنَّم و عِندَك كِرعين.

⁴⁷ و إذا عينَك سَبَب خَطيَّتَك، طَلِّعا. أحسَن تَدخُل مَلَكوت الله بِعين واحدَه مِن أن يَرموك في جَهَنَّم و عِندَك عُيون،

⁴⁸ في المَكان الفيهو دودُم ما بِموت، و النّار ما بِتموت.

⁴⁹ عَشان كُلّو واحِد بِتمَلَّح بِالنّار.

⁵⁰ المِلِح كوَيس. لَكِن إذا المِلِح يَبقى مَسيخ، كيف تَرَجِّعو ليهو ضوقو؟ خَلّي يَكون ليكُم مِلِح في نُفوسكُم، و يَكون في سَلام بينكُم.“