مَرْقُس 8 - كِتاب العَهد الجَّديد مِن الكِتاب المُقَدَّس

يَسُوع يَدّي أكل لِلأربَع آلاف

¹ و في الأيام ديلاك، ناس كُتار إتلَمّو، و ما كان عِندَهُم أكِل. و يَسُوع نادى تَلاميذو و قال ليهُم،

² ”أحِن عَلى النّاس، عَشان هُم قاعِدين مَعاي تلاتَه أيام هَسَّع، و ما عِندَهُم أكِل.

³ و إذا أرَسِّلُم لِبُيوتُم و هُم جَعانين، بِقَعو في السِّكَّه. و بَعَض مِنَّهُم جو مِن بَعيد.“

⁴ و تَلاميذو قالو ليهو: ”كيف واحِد يَلقا عيش كِفايَه لِلنّاس ديل عَشان بِكونو شَبعانين هِنا في الخَلا؟“

⁵ و سألُم و قال: ”عِندَكُم كَم رَغيف؟“ و قالو: ”سَبعَه.“

⁶ و أمَر النّاس يَقعُدو في الواطَه. و أخَد السَّبعَه رَغِفان. و بَعَد ما شَكَر، كَسَّرُم، و أدّاهُم لِتَلاميذو فِشان يَقَدِّمو لِلنّاس.

⁷ و كان عِندَهُم شوَيَه مِن سَمَك صَغَيِر. و بَعَد ما بارَكُم، أمَر أن يَقَدِّمو السَّمَك كَمان.

⁸ و أكَلوها، و كانو شَبعانين. و رَفَعو مِن فَضلَت الأكِل سَبعَه قُفَف مَليانَه.

⁹ و النّاس الأكَلو كانو أربَعَة آلاف تَقريباً.

¹⁰ و بَعدين صَرَفُم. و طَوّالي دَخَل مُركَب مَعَ تَلاميذو، و مَشى لِقِسم دَلمَنوتَه.

¹¹ و الفَرّيسيّين جو و إبتَدو يَسألوهو، و طَلَبو مِنّو عَلامَه مِن السَّما، عَشان يَجَرِّبوهو.

¹² و يَسُوع إتنَفَّس شَديد في نَفسو، و قال: ”ناس الزَّمَن دا يَطلُب عَلامَه لِشِنو؟ أقول ليكُم الحَق، ما يَدّو عَلامَه لِناس الزَّمَن دا.“

¹³ و خَلّاهُم، و دَخَل المُركَب مَرَّه تانيَه، و مَشى لِلطَّرف التّاني.

¹⁴ و التَّلاميذ نِسو ياخُدو العيش. و ما كان عِندَهُم في المُركَب إلّا رَغيف واحِد.

¹⁵ و هو حَزَّرُم و قال: ”خَلّو بالكُم، و أحرِسو مِن خَميرَة الفَرِّيسِيِّين و خَميرَة هِيرُودُس.“

¹⁶ و إتكَلَّمو بَعضَهُم لِبَعض و قالو: ”ما عِندَنا عيش.“

¹⁷ و يَسُوع عِرِف كَلامُم و قال ليهُم: ”لِشِنو تِتكَلَّمو عَلَشان ما عِندَكُم عيش؟ إنتو لِسَّع ما تَشوفو ولّا تَفهَمو؟ قُلوبكُم قَوّيين؟

¹⁸ ليكُم عُيون و ما تَشوفو؟ و عِندَكُم إضنين و ما تَسمَعو؟ و ما تِتزَكَّرو؟

¹⁹ لَمّا كَسَّرتَ الخَمسَه رَغِفان لِلخَمسَة آلاف، رَفَعتو كَم قُفَّه مَليانَه مِن حِتَت الأكِل؟“ قالو ليهو: ”إتناشَر.“

²⁰ ”و لَمّا كَسَّرتَ السَّبعَه رَغِفان لِلأربَعَة آلاف، رَفَعتو كَم قُفَّه مَليانَه مِن باقي الأكِل؟“ و قالو ليهو: ”سَبعَه.“

²¹ قال ليهُم: ”لِسَّع ما تَفهَمو؟“

²² و جو لِبيت صَيدا. و جابو ليهو واحِد عَميان، و طَلَبو مِنّو يَلمَسو.

²³ و أخَد العَميان بِإيدو، و قادو بَرَّه مِن الحِلَّه. و بَعَد ما بَزَق في عينو، و خَتَّ إيدينو عَليهو، سَألو و قال: ”إنتَ تَشوف حاجَه؟“

²⁴ و عايَن لِفوق، و قال: ”أشوف النّاس، لَكِن زي الشَّجَر ماشين.“

²⁵ بَعدين خَتَّ إيدينو عَلى عُيونو مَرَّه تانيَه. و هو عايَن شَديد، و نَظَرو رَجَع، و هو شاف كُلّو شي تَمام.

²⁶ و رَسَّلو لِبيتو، و قال: ”ما تَدخُل الحِلَّه أبَداً.“

إعتِراف بُطْرُس بِالمَسيح

²⁷ و يَسُوع مَرَق، هو و تَلاميذو، لِحِلَل قَيْصَرِيَّه فِيلِبُّس. و وَكِت ما كانو في السِّكَّه، سأل تَلاميذو و قال: ”النّاس بِقولو أنا مِنو؟“

²⁸ و قالو ليهو: ”بِقولو يُوحَنَّا المَعمَدان، و تانيين بِقولو، إِيلِيَّا، و تانيين بِقولو، واحِد مِن الأنبياء.“

²⁹ و سألُم: ”و إنتو بِتقولو أنا مِنو؟“ و بُطْرُس رَدَّ عَليهو و قال: ”إنتَ المَسيح.“

³⁰ و يَسُوع حَزَّرُم أن ما يَكَلِّمو أي زول عَنّو.

يَسُوع يَعَلِّم عَن موتو

³¹ و هو إبتَدا يَعَلِّمُم أن إبن الإنسان لازِم يِتعَذَب كَتير، و الشُّيوخ، و القُسُس الكُبار، و مُعَلِّمين القانون بِيَرفُضوهو، و يَكتُلوهو. و بَعَد تلاتَه أيام هو بِقوم.

³² و كان يَقول دا بِكَلام باين. و بُطْرُس اَخَدو ليهو، و إبتَدا يَوَبِّخو.

³³ و يَسُوع إتلَفَت و عايَن لِتَلاميذو، و وَبَّخ بُطْرُس و قال: ”أمشي بَعيد مِنّي، يا الشّيطان! عَشان إنتَ ما تَهتَم بِحاجات الله، لَكِن بِحاجات النّاس.“

³⁴ و نادى ليهو النّاس مَعَ تَلاميذو، و قال ليهُم: ”إذا أي واحِد عاوِز يَجي وَراي، خَليهو يَنكِر نَفسو، و يَشيل صَليبو، و يَتبَعني.

³⁵ عَشان هو الدّاير يَخَلِّص نَفسو، بِضَيِّعا. و هو اليَضَيِّع نَفسو فِشانّي أنا، و فِشان الإنجيل، بِخَلِّصا.

³⁶ عَشان الفايدَه شِنو لِزول إذا يَحَصِّل عَلى الدُّنيا كُلَّها، و يَخَسِّر نَفسو؟

³⁷ و الزّول بِقدَر يَدّي شِنو فِداء عَن نَفسو؟

³⁸ الزّول البِكون خَجلان مِنّي، و مِن كَلامي بين ناس الزَّمَن الزّاني الخاطي دا، إبن الإنسان بِكون خَجلان مِنّو كَمان، لَمّا بِجي في مَجد أبوهو مَعَ المَلائكَه المُقَدَّسين.“