مَرْقُس 7 - كِتاب العَهد الجَّديد مِن الكِتاب المُقَدَّس

نَضيف و ما نَضيف

¹ و الفَرّيسيّين إتلَمّو ليهو، هُم و بَعض مِن مُعَلِّمين القانون الجّو مِن أُورُشَلِيم.

² و شافو بَعض مِن تَلاميذو ياكُلو عيش بِإيد وَسخانَه، يَعني بِدون ما يَغَسِّلو إيدينُم.

³ عَلَشان الفَرِّيسِيِّين و كُل اليَهود ما ياكُلو إلّا يَغَسِّلو إيدينُم حَتّى الكوعين، عَشان يَحفَظو عادَة الشُّيوخ.

⁴ و لَمّا بِجو مِن السّوق، ما ياكُلو إذا ما يِتغَسَّلو في الأوَّل. و يَحفَظو عَوايِد تانيَه كَتيرَه: زي غَسيل الكُبايات، و البُرام، و حِلَل النَّحاس.

⁵ و الفَرّيسيّين و مُعَلِّمين القانون سألوهو و قالو: ”لِشِنو تَلاميذَك ما بِعيشو بِعادَة الشُّيوخ؟ و لَكِن بَدَل مِن دا ياكلو عيش بِإيد وَسخانَه؟“

⁶ و قال ليهُم: ”نُبُوَّة إِشَعْيَاء كانَت مَظبوطَه لَمّا إتنَبّأ عَنكُم، إنتو المُنافِقين، زي ما مَكتوب: النّاس ديل يَحتَرِموني بِخُشومُم، و لَكِن قُلوبُم بَعيدين مِنّي.

⁷ يَعبُدوني بِدون فايدَه، و يَعَلِّمو تَعاليم أوامِر النّاس.

⁸ إنتو تَخَلّو أمر الله، و تَحفَظو عادَة النّاس.“

⁹ و قال ليهُم: ”عِندَكُم تَرتيب كوَيس أن تَرفُضو أمر الله عَلَشان تَحفَظو عادَتكُم!

¹⁰ عَشان مُوسَى قال: إحتَرِم أبوك و أُمَّك، و، اليَشتِم أبوهو ولّا أُمّو، خَليهو يَموت الموت.

¹¹ لَكِن إنتو تَقولو: إذا واحِد يَقول لِأبوهو ولّا أُمّو، الفايدَه الكان عِندَك مِنّي، هي تَقدِمَه، يَعني هَدِيَّه لِلَّه،

¹² إنتو ما تَخَلّوهو يَعمِل حاجَه لِأبوهو او أُمّو بَعَد دا.

¹³ و إنتو تَبَطِّلو كَلام الله بِعادَتكُم الإنتو خَبَّرتو النّاس بيهو. و إنتو تَعمِلو حاجات كَتيرَه زي دي.“

¹⁴ و نادى ليهو النّاس مَرَّه تانيَه، و قال ليهُم: ”أسمَعو لَي كُلُّكُم، و أفهَمو.

¹⁵ ما في حاجَه بَرَّه مِن الإنسان إذا تَدخُل فيهو تَقدَر تَنَجِّسو. لَكِن الحاجات التَّمرُق مِن الإنسان، هي تَنَجِّسو.

¹⁶ إذا واحِد عِندو إضنين لِلسَّمَع، خَليهو يَسمَع.“

¹⁷ و لَمّا يَسُوع خَلّى النّاس و دَخَل البيت، تَلاميذو سألوهو عَن المَثَل.

¹⁸ و قال ليهُم: ”إنتو كَمان ما فاهمين؟ ما تَفهَمو اليَدخُل الإنسان مِن بَرَّه ما بِقدَر يَنَجِّسو؟

¹⁹ عَشان ما يَدخُل قَلبو، لَكِن بَطنو، و يَطلَع مِن جِسمو.“ و بِالكَلام دا، خَبَّر النّاس إنّو كُل الأكِل نَضيف.

²⁰ و قال: ”اليَمرُق مِن الإنسان، هو اليَنَجِّس الإنسان.

²¹ عَشان مِن جُوَّه، مِن قُلوب النّاس، بِتَمرُق الأفكار الشَّرّيرَه، و الفُجور، و السِّرقَه، و الكَتل، و الزِّنا،

²² و الطَّمَع، و الشَّر، و الغِش، و السَّفاهَه، و العين الشَّرّيرَه، و الكِضِب عَلى زول، و الكِبِر، و العَمَل البَليد.

²³ كُل الحاجات الشَّرّيرَه دي تَمرُق مِن جُوَّه الزّول، و تَنَجِّسو.“

إيمان المَرَه مِن ناس إغريقيين

²⁴ و يَسُوع قام مِن هِناك، و مَشى لِمَحَل صُور و صَيدا. و دَخَل في بيت، و ما كان عاوِز أي واحِد يَعرِف. لَكِن ما قِدِر يَكون مَدسوس مِنَّهُم.

²⁵ لَكِن طَوّالي، مَرَه سِمِعَت عَنّو، و ليها بِت صَغَيرَه فيها روح نَجِس. و المَرَه جات و وَقَعَت قِدّام كِرعينو.

²⁶ و هي كانَت مَرَه مِن ناس إغريقيين، جِنسا فينيقِيَّه سُورِيَّه. و طَلَبَت مِنّو يَطَلِّع الشّيطان مِن بِتّا.

²⁷ و قال ليها: ”خَلّي الأولاد بِيَشبَعو في الأوَّل، عَشان ما كوَيس ياخُد عيش الأولاد و يَرميهو لِلكِلاب الصُّغار.“

²⁸ لَكِن هي رَدَّت و قالَت ليهو: ”أيوَه، يا رَب، لَكِن الكِلاب تِحِت الطَّرَبيزَه ياكلو مِن فَتافيت الأولاد.“

²⁹ و قال ليها: ”عَشان الكِلمَه دي، أمشي. الشّيطان طَلَع مِن بِتِّك.“

³⁰ و مَشَت لِبيتا و لِقَت البِت راقدَه فوق العَنقَرِيب، و الشّيطان كان مَرَق.

³¹ بَعَد شوَيَه، يَسُوع مَرَق مِن مَحَل صُور، و مَشى بِدَرِب صَيدا لِبَحَر الجَّليل، في وَسط مَحَل المُدُن العَشَرَه.

³² و جابو ليهو راجِل أطرَش، و صَعب ليهو يتكَلَّم. و طَلَبو مِنّو يَخُت إيدو عَليهو.

³³ و اَخَدو مِن الجَّماعَه بَراهو، و خَتَّ أصابِعو في إضنينو، و بَزَق، و لَمَس لِسانو.

³⁴ و عايَن لِلسَّما، و إتنَفَّس، و قال ليهو: ”افَّاتَا،“ يَعني: ”كون مَفتوح.“

³⁵ و إضنينو بِقو مَفتوحَه، و لِسانو إتفَكَّ، و هو بِقى يتكَلَّم مَظبوط.

³⁶ و أمَرُم ما يَكَلِّمو واحِد. لَكِن بِقَدُر ما أمَرُم، هُم كانو يَخَبِّرو النّاس زِيادَه بِكَتير.

³⁷ و النّاس كانو بِستَغرَبو جِدّاً جِدّاً، و قالو: ”هو عَمَل كُلّو شي تَمام. هو يَعمِل الطُّرُش يَسمَعو و البُكُم يِتكَلَّمو!“