مَرْقُس 6 - كِتاب العَهد الجَّديد مِن الكِتاب المُقَدَّس

نَبي بِدون إحتِرام

¹ و مَرَق مِن هِناك و جا لِوَطَنو. و تَلاميذو تَبَعوهو.

² و لَمّا كان يوم السَّبِت، إبتَدا يَعَلِّم في بيت الرَّب. و ناس كُتار لَمّا سِمِعوهو، إستَغرَبو و قالو: ”الرّاجِل دا إتعَلَّم كُلّو دا مِن وين؟ شِنو الحِكمَه الأدّوها ليهو؟ حَتّى يَقدَر يَعمِل الأعمال القَوّيَّه دي بِإيدو!

³ دا ما هو النَّجّار؟ وَلَد مَرْيَم، و أخو يَعْقُوب، و يُوسِي، و يَهُوذَا، و سِمْعَان؟ و أخواتو ما هِنا مَعانا؟“ و بِقو زَعلانين مِنّو.

⁴ و يَسُوع قال ليهُم: ”ما في نَبي بِدون إحتِرام إلّا في وَطَنو و بين أقارِبو و في بيتو.“

⁵ و هو ما قِدِر يَعمِل عَمَل بِقُوَّه و لا واحِد هِناك، إلّا هو خَتَّ إيدينو عَلى ناس عَيّانين قَليلين و شَفاهُم.

⁶ و هو إستَغرَب عَشان هُم كانو بِدون إيمان. و مَشى مِن حِلَّه لِحِلَّه و عَلَّم النّاس.

⁷ و نادى الإتناشَر و بِقى يَرَسِّلُم إتنين إتنين. و أدّاهُم سُلطَه عَلى الأرواح النَّجسَه.

⁸ و أمَرُم ما يَشيلو حاجَه لِلسَّفَر إلّا عَصايَه بَس، لا عيش، و لا كيس، و لا قُروش في حِزامُم.

⁹ لَكِن أمَرُم يَلبَسو جِزَم، و ما يَلبَسو قَميصين.

¹⁰ و قال ليهُم: ”البيت الإنتو تَدخُلوهو، أقعُدو فيهو لِغايَة ما تَمرُقو مِن المَحَل دا.

¹¹ و إذا أي مَحَل ما يَقبَلكُم، و النّاس يابو يَسمَعو ليكُم، هِزّو التُّراب مِن رِجلينكُم لَمّا تَمرُقو، عَشان شَهادَه عَليهُم.“

¹² و مَرَقو، و بِشَّرو أن النّاس لازِم يَتوبو.

¹³ و طَلَّعو شياطين كَتيرَه، و دَهَنو بِزيت ناس عَيّانين كُتار، و شَفوهُم.

موت يُوحَنَّا المَعمَدان

¹⁴ و المَلِك هِيرُودُس سِمِع بيهو، عَلَشان إسم يَسُوع بِقى مَعروف. بَعَض مِن النّاس قالو: ”يُوحَنَّا المَعمَدان قام مِن بين المَيِّتين. و عَلَشان كِدا، القُوّات دي بِشتَغِلو فيهو.“

¹⁵ و لَكِن ناس تانيين قالو: ”هو إِيلِيَّا.“ و بَعض مِنَّهُم قالو: ”هو نَبي، زي واحِد مِن الأنبياء.“

¹⁶ لَكِن لَمّا هِيرُودُس سِمِع دا، هو قال: ”يُوحَنَّا الأنا قَطَعتَ رَاسو، هو قام مِن بين المَيِّتين.“

¹⁷ عَشان هِيرُودُس نَفسو كان رَسَّل و قَبَض عَلى يُوحَنَّا، و رَبَطو في السِّجِن فِشان هِيرُودِيَا، مَرَة فِيلُبُّس أخوهو. عَلَشان هو كان إتزَوَّجا.

¹⁸ فِشان يُوحَنَّا كان قال لِهِيرُودُس: ”ما بِالقانون بِتاخُد مَرَة أخوك.“

¹⁹ كِدا، هِيرُودِيَا كانَت زَعلانَه شَديد في قَلبَها مِن يُوحَنَّا، و كانَت عاوزَه تَكتُلو. و لَكِن ما كانَت تَقدَر.

²⁰ عَشان هِيرُودُس كان خايِف مِن يُوحَنَّا، و عِرِف هو راجِل بار و قُدّوس، و حَرَسو. و لَمّا سِمِع يُوحَنَّا، إتحَيَّر جِدّاً، و لَكِن سِمِعو بِفَرَح.

²¹ و حَصَلَت فُرصَه في يوم ميلاد هِيرُودُس، و هو عَمَل عَزومَه لِلمُحتَرِمين، و رؤساء الجُّيوش و ناس الجَّليل الكُبار.

²² و لَمّا بِت هِيرُودُس دَخَلَت و رَقَصَت، هِيرُودُس و ضُيوفو كانو مَبسوطين جِدّاً. و المَلِك قال لِلبِت: ”أطلُبي مِنّي زي ما عاوزَه، و أنا بَدّيها ليكي.“

²³ و حَلَف و قال: ”بَدّيكي الإنتي بِتَطلُبي مِنّي لِغايَة نُص مَملَكتي.“

²⁴ و مَرَقَت، و قالَت لِأُمَّها: ”بَطلُب شِنو؟“ و هي قالَت: ”راس يُوحَنَّا المَعمَدان.“

²⁵ و طَوّالي دَخَلَت بِسُرعَه لِلمَلِك، و طَلَبَت و قالَت: ”أنا عاوِزاك تَدّيني طَوّالي راس يُوحَنَّا المَعمَدان عَلى صَحَن.“

²⁶ و المَلِك كان حَزنان جِدّاً. و لَكِن عَلَشان حَلَفو و ضُيوفو، ما داير يَرفُضو.

²⁷ و طَوّالي المَلِك رَسَّل عَسكَري مِن الحُرّاس، و أمَرو يَجيب راس يُوحَنَّا. و مَشى و قَطَع رَاسو في السِّجِن،

²⁸ و جاب رَاسو عَلى صَحَن، و أدّاهو لِلبِت. و البِت أدَّتو لِأُمَّها.

²⁹ و لَمّا التَّلاميذ سِمِعو، جو و اَخَدو جِسمو، و خَتّوهو في قَبر.

يَسُوع يَدّي أكل لِلخَمسَة آلاف

³⁰ و الرُّسُل رَجَعو لِيَسُوع، و خَبَّروهو بِكُلّو شي، كُل العَمَلوهو و كُل العَلَّموهو.

³¹ و قال ليهُم: ”تَعالو إنتو بَراكُم لِمَحَل الخَلا، و إستَريحو شوَيَه.“ فِشان الجّايين و الماشين كانو كَتيرين، و ما عِندَهُم فُرصَه عَشان ياكلو.

³² و مَشو في المُركَب لِمَحَل الخَلا بَراهُم.

³³ و ناس كُتار شافوهُم ماشين، و عِرِفوهُم. و جَرو هِناك بِكِرعينُم مِن كُل المُدُن. و وِصلو قُبّال ما هُم وِصلو.

³⁴ و لَمّا يَسُوع طَلَع، هو شاف ناس كُتار، و حَنَّه عَليهُم، فِشان هُم زي خِرفان بِدون راعي. و بِقى يَعَلِّمُم حاجات كَتيرَه.

³⁵ و بَعَد ساعات كَتيرَه، تَلاميذو قَرَّبو ليهو و قالو: ”المَحَل دا خَلا، و الوَكِت فات.

³⁶ كَلَّم النّاس أن يَمشو لِلمَحَلّات حَولينا و الحِلَل و يَشتَرو أكِل لِنُفوسُم.“

³⁷ و لَكِن قال ليهُم: ”إنتو أدّوهُم عَشان ياكُلو.“ و قالو ليهو: ”نَمشي نَشتَري عيش بِمِيَّتين ريال؟ و نَدّيهُم عَشان ياكُلو؟“

³⁸ و قال ليهُم: ”عِندَكُم كَم رَغيف؟ أمشو و شوفو.“ و لَمّا عِرِفو، قالو: ”خَمسَه، و سَمَكتين.“

³⁹ بَعدين أمَر كُلُّهُم يَقعُدو جَماعات جَماعات عَلى القَش الأخدَر.

⁴⁰ و كِدا قَعَدو في جَماعات مِيَّه مِيَّه، و خَمسين خَمسين.

⁴¹ و أخَد الخَمسَه رَغِفان و السَّمَكتين، و عايَن لِلسَّما و بارَك و كَسَّر الرَّغِفان، و أدّاها لِلتَّلاميذ عَشان يَقَدِّموها لِلنّاس. و قَسَّم السَّمَكتين بين كُلَّهُم.

⁴² و كُلُّهُم أكَلو، و كانو شَبعانين.

⁴³ و لَمّو إتناشَر قُفَّه مَليانَه مِن حِتَت الرَغيف و السَّمَك.

⁴⁴ و ديل الأكَلو الرَغِفان كانو خَمسَة آلاف راجِل.

يَسُوع يَمشي عَلى البَحَر

⁴⁵ و طَوّالي يَسُوع دَخَّل تَلاميذو في المُركَب، عَشان يَمشو قُبَّالو لِلطَّرف التّاني لِبيت صَيدا، و هو صَرَف النّاس.

⁴⁶ و بَعَد ما خَلّاهُم، مَشى لِلجِّبال عَشان يَصَلّي.

⁴⁷ و لَمّا بِقى المِسا، المُركَب كانَت في وَسط البَحَر، و هو كان بَراهو عَلى الواطَه.

⁴⁸ و شافُم تَعبانين عَشان كانو بِسوقو المُركَب، عَشان الهَبوب كانَت ضِد المُركَب. و بين السّاعَه تلاتَه و السّاعَه سِتَّه في الصَّباح، يَسُوع قَرَّب ليهُم ماشي عَلى البَحَر. و كان عاوِز يَفوتُم.

⁴⁹ و لَكِن لَمّا شافوهو ماشي عَلى البَحَر، إفتَكَرو كان روح، و كورَكو.

⁵⁰ عَلَشان كُلُّهُم شافوهو و كانو خايفين جِدّاً. لَكِن طَوّالي كَلَّمُم و قال ليهُم: ”شِدّو حيلكُم. أنا هو. ما تَخافو.“

⁵¹ و طَلَع ليهُم جُوَّه المُركَب، و الهَبوب سَكَتَت. و هُم إستَغرَبو كَتير خَلاص.

⁵² عَلَشان هُم ما فِهمو عَن الرَّغِفان، لَكِن قُلوبُم كانَت تَقيلَه.

⁵³ و لَمّا قَطَعو البَحَر، جو لِأرض جَنِّيسَارَت، و رَبَطو المُركَب عِند الطَّرف.

⁵⁴ و لَمّا مَرَقو مِن المُركَب، طَوّالي النّاس عِرِفوهو،

⁵⁵ و جَرو في كُل المَكان دا، و بِقو يَشيلو ناس عَيّانين عَلى بُروشُم لِكُلّو مَحَل الهُم سِمِعو يَسُوع كان في هِناك.

⁵⁶ و في كُلّو مَحَل الهو جا ليهو، إذا حِلَّه، ولّا مَدينَه، ولّا مَحَلّات بَرَّه المُدُن، خَتّو العَيّانين في السّوق، و طَلَبو مِنّو يَخَلّيهُم يَلمَسو طَرف هِدومو بَس. و كُل اللِّمسوهو بِقو شُداد.