مَرْقُس 5 - كِتاب العَهد الجَّديد مِن الكِتاب المُقَدَّس

شِفا الرّاجِل العِندو روح نَجِس

¹ و وِصلو لِلجَّمب التّاني مِن البَحَر، لِبَلَد الجَدَريّين.

² و لَمّا طَلَع مِن المُركَب، طَوّالي راجِل ليهو روح نَجِس جا مِن القُبور و قابَلو.

³ و هو كان قَعَد في القُبور. و ما كان في واحِد يَقدَر يَربُطو، و لا بِجَنزير.

⁴ مَرّات كَتيرَه كان مَربوط بِجَنازِير لِرِجلينو و سَلاسِل، و لَكِن قَطَّع الجَّنازِير و كَسَّر السَّلاسِل. و ما في واحِد عِندو قُوَّه يَغلِبو.

⁵ و كُلّو يوم ليل و نَهار كان بِكورِك في القُبور و في الجِّبال، و كان يَقطَع نَفسو بِحُجار.

⁶ و لَمّا شاف يَسُوع مِن بَعيد، جَرى و عَبَدو.

⁷ و كورَك بِصوت عالي و قال: ”مالي و مالَك، يا يَسُوع، إبن الله العالي؟ أطلُب مِنَّك بِالله، ما تَتَعِّبني.“

⁸ عَلَشان يَسُوع قال ليهو: ”اطلَع مِن الزّول، يا روح نَجِس!“

⁹ و يَسُوع سَألو و قال: ”إسمَك شِنو؟“ قال: ”إسمي لِجِيون، فِشان نِحنا كَتيرين.“

¹⁰ و طَلَب كَتير مِن يَسُوع ما يَطرُدُم بَرَّه مِن البَلَد.

¹¹ و كان في هِناك عِند الجَّبَل مُراح كَبير مِن الكَداريك بياكُل.

¹² و طَلَبو ليهو و قالو: ”رَسِّلنا لِلكَداريك عَشان نَدخُل فيهُم.“

¹³ و يَسُوع أدّاهُم إذن. و الأرواح النَّجسَه مَرَقو مِنّو، و دَخَلو في الكَداريك. و المُراح جَرى مِن الطَّرف لِلبَحَر و غِرِق في البَحَر. و كان في إتنين ألف كَدروك تَقريباً.

¹⁴ و الرُعاه هَرَبو، و خَبَّروهو في المَدينَه و بَرَّه مِن المَدينَه كَمان. و النّاس جو عَشان يَشوفو الشّي الحَصَل.

¹⁵ و جو لِيَسُوع، و شافو الزّول، الكان فيهو شياطين، قاعِد، و لابِس هِدوم، و عاقِل. و هو الكان ليهو أرواح كَتيرَه. و النّاس كانو خايفين.

¹⁶ و النّاس الشّافوهو كَلَّمو عَن الشّي الحَصَل لِلزّول الكانَت فيهو شياطين و عَن الكَداريك.

¹⁷ و بِقو يَطلُبو مِن يَسُوع يَسيب بَلَدُم.

¹⁸ و وَكِت كان يَدخُل المُركَب، الزّول الفيهو شياطين طَلَب مِنّو يَكون مَعاهو.

¹⁹ و لَكِن ما خَلّاهو، و قال ليهو: ”أمشي لِبيتَك، و لِأهلَك، و خَبِّرُم بِالحاجَه العَمَلا بيك الرَّب، و كيف وَرّا ليك رَحمَتو.“

²⁰ و مَرَق و بِقى يَنادي في المُدُن العَشَرَه الحاجات العَمَل يَسُوع بيهو. و كُل النّاس إستَغرَبو.

بِت مَيِّتَه و مَرَه عَيّانَه

²¹ و لَمّا يَسُوع مَرَّه تانيَه قَطَع البَحَر في المُركَب لِلجَّمب التّاني، ناس كُتار إتلَمّو ليهو. و هو كان في طَرف البَحَر.

²² بَعدين واحِد مِن رؤساء بيت الرَّب جا، إسمو يَايِرُس. و لَمّا شاف يَسُوع، وَقَع قِدّام كِرعينو،

²³ و قال: ”بِتّي الصَّغَيرَه قَريبَه مِن الموت. تَعال مِن فَضلَك، و خُت إيدَك عَليها عَشان تَكون طَيبَه، و تَحيى.“

²⁴ و مَشى مَعاهو. و ناس كُتار تَبَعوهو و قَرَّبو ليهو.

²⁵ و كانَت في مَرَه، الدَّم نَزَل مِنَّها لِمُدَّة إتناشَر سَنَه.

²⁶ و هي تِعِبَت كَتير مِن حُكَما كَتيرين. و صَرَفَت كُل القُروش العِندَها. و هي ما بِقَت طَيبَه، لَكِن العَيى زادَت.

²⁷ و لَمّا سِمِعَت بِالخَبَر عَن يَسُوع، جات مِن وَراهو في وَسط الجَّماعَه و لَمَسَت هِدومو.

²⁸ فِشان قالَت: ”إذا ألمَس هِدومو بَس، بَكون طَيبَه.“

²⁹ و طَوّالي نُزول دَمّا وَقَف. و هي عِرِفَت في جِسِما إنَّها بِقَت طَيبَه.

³⁰ و يَسُوع عِرِف في نَفسو القُوَّه طَلَعَت مِنّو. و طَوّالي إتلَفَت في وَسط الجَّماعَه و قال: ”مِنو لَمَس هِدُومي؟“

³¹ و تَلاميذو قالو ليهو: ”إنتَ تَشوف النّاس يَلِزّوك، و تَقول: مِنو لَمَسني؟“

³² و كان يَعايِن حَولو عَشان يَشوف الواحدَه العَمَلَت دا.

³³ و المَرَه عِرِفَت الشّي الحَصَل ليها، و كانَت خايفَه و رَجَعَت، و جات و وَقَعَت قِدّامو، و كَلَّمَتو بِالحَق كُلّو.

³⁴ و قال ليها: ”يا بِتّي، إيمانِك شَفاكي. أمشي بِالسَّلام. كوني طَيبَه مِن العَيى.“

³⁵ و وَكِت ما يَسُوع يتكَلَّم لِسَّع، ناس جو مِن رَئيس بيت الرَّب، و قالو: ”بِتَّك ماتَت. لِشِنو إنتَ لِسَّع تَتَعِّب المُعَلِّم؟“

³⁶ و يَسُوع سِمِع الكَلام الهُم قالو: و قال لِرَئيس بيت الرَّب: ”ما تَخاف. صَدِّق بَس.“

³⁷ و هو ما خَلّى أي واحِد يَتبَعو إلّا بُطْرُس، و يَعْقُوب، و يُوحَنَّا أخو يَعْقُوب.

³⁸ و لَمّا وِصلو لِبيت رَئيس بيت الرَّب، يَسُوع شاف الدَوشَه، و النّاس يَبكو و يَكورِكو كَتير جِدّاً.

³⁹ و لَمّا دَخَل، هو قال ليهُم: ”لِشِنو تَعمِلو دَوشَه و تَبكو؟ البِت ما مَيِّتَه لَكِن نايمَه.“

⁴⁰ و ضِحِكو عَليهو. لَكِن هو مَرَّق كُلَّهُم بَرَّه، و أخَد أبو البِت و أُمَّها و الكانو مَعاهو، و مَشى لِلمَحَل الكانَت فيهو البِت.

⁴¹ و مَسَك البِت بِإيدا، و قال ليها: ”طَلِيثَا قوم.“ يَعني: ”يا بِت، أقول ليكي: قومي.“

⁴² و طَوّالي البِت قامَت و مَشَت، عَشان عُمُرا كان إتناشَر سَنَه. و طَوّالي إستَغرَبو جِدّاً.

⁴³ و هو أمَرُم شَديد ما يَخَلّو واحِد يَعرِف بِدا. و كَلَّمُم يَدُّوها عَشان تَاكُل.