مَرْقُس 3 - كِتاب العَهد الجَّديد مِن الكِتاب المُقَدَّس

يَسُوع يَشفي كَتيرين

¹ و دَخَل بيت الرَّب مَرَّه تانيَه. و كان في راجِل هِناك إيدو يابسَه.

² و عايَنو ليهو عَشان يَشوفو إذا كان يَشفيهو في السَّبِت، فِشان كانو عاوِزين يَشتَكوهو.

³ و يَسُوع قال لِلرّاجِل الإِيدو يابسَه: ”قوم في الوَسط.“

⁴ و قال ليهُم: ”بِالقانون بيَعمِل الكَويس في السَّبِت ولّا بيَعمِل البَطّال؟ يَخَلِّص النَّفس ولّا يَكتُلو؟“ لَكِن هُم سَكَتو.

⁵ و عايَن ليهُم و حَوَليهو بِزَعل، و كان حَزين عَلَشان قُلوبُم قَوّيَّه. و قال لِلرّاجِل: ”مِد إيدَك.“ و هو مَدّاها، و إيدو بِقَت طَيبَه.

⁶ و الفَرّيسيّين مَرَقو، و طَوّالي إتكَلَّمو عَليهو مَعَ الهِيرُودُسين كيف يَكتُلوهو.

⁷ يَسُوع مَرَق مَعَ تَلاميذو لِلبَحَر. و ناس كُتار مِن الجَّليل تَبَعوهو. و كَمان مِن اليَهُودِيَّه،

⁸ و أُورُشَلِيم، و أدومِيَّه، و مِن فوق الأُردُن، و مِن حَول صُور و صَيدا، ناس كُتار جِدّاً سِمِعو كُل الهو عَمَل، و جو ليهو.

⁹ و هو كَلَّم تَلاميذو عَشان يَحَضِّرو مُركَب صَغَيرَه بِسَبَب النّاس عَشان ما يَقَرِّبو ليهو.

¹⁰ عَلَشان هو شَفى ناس كُتار، حَتّى كُل العِندَهُم أمراض إتلَمّو قَريب مِنّو لِيَلمَسوهو.

¹¹ و الأرواح النَّجسَه كُلّو وَكِت لَمّا شافوهو، وَقَعو قِدّامو و كورَكو و قالو: ”إنتَ إبن الله.“

¹² و يَسُوع أمَرُم شَديد أن ما يَقولو هو مِنو.

إختِيار الإتناشَر رَسول

¹³ و طَلَع لِلجَّبَل، و نادى ليهو النّاس الهو دايِرُم. و هُم جو ليهو.

¹⁴ و هو إختار مِنَّهُم إتناشَر عَشان يَكونو مَعاهو، و عَشان يَرَسِّلُم لِيَبَشِّرو

¹⁵ و يَكون ليهُم سُلطَه عَشان يَمَرِّقو الشّياطين.

¹⁶ و أهُم ديل الإتناشَر الهو إختارُم: سِمْعَان، الأدّاهو الإسم بُطْرُس،

¹⁷ و يَعْقُوب إبن زَبَدي و يُوحَنَّا أخو يَعْقُوب، الهو أدّاهُم الإسم بُوَانَرْجِس، يَعني أولاد صوت البَرق.

¹⁸ و أنْدَرَاوُس، و فِيلُبُّس، و بَرْثُلَمَاوُس، و مَتَّى، و تُومَا، و يَعْقُوب إبن حَلْفَى، و وَتَدَّاوُس، و سِمْعَان القَانَوِي،

¹⁹ و يَهُوذَا الإِسْخَرْيُوطِي السَّلَّمو.

يَسُوع و بَعلَزَبول

²⁰ بَعدين دَخَلو البيت. و النّاس إتلَمّو مَرَّه تانيَه، حَتّى ما كان مُمكِن ياكُلو.

²¹ و لَمّا أهلو سِمِعو عَن دا، مَرَقو لِيَمسِكوهو، فِشان قالو: ”هو مَجنون.“

²² و مُعَلِّمين القانون النَّزَلو مِن أُورُشَلِيم قالو: ”بَعلَزَبول فيهو. بِرَئيس الشّياطين هو يَمَرِّق الشّياطين.“

²³ و هو ناداهُم و كَلَّمُم بِأمثال: ”كيف الشّيطان يَقدَر يَمَرِّق الشّيطان؟

²⁴ إذا مَملَكَه مِنقَسِمَه عَلى نَفسا، المَملَكَه دي ما بِتَقدَر تَثبُت.

²⁵ و إذا كان بيت إنقَسَم عَلى نَفسو، البيت داك ما بِقدَر يَثبُت.

²⁶ و إذا الشّيطان قام عَلى نَفسو و إنقَسَم، هو ما بِقدَر يَثبُت، لَكِن نِهايَتو جايَه.

²⁷ ما مُمكِن واحِد يَدخُل بيت راجِل قَوّي و يَشيل مالو، إلّا هو بِيَربُط الرّاجِل القَوّي. بَعدين هو بِقدَر يَشيل مالو.

²⁸ الحَق أقول ليكُم، كُل الخَطايا بِتكون مَغفورَه لِأولاد النّاس، و الشَّتايِم اليَشتِمو بيها.

²⁹ و لَكِن اليَجَدِّف عَلى الرّوح القُدُس ما بِكون مَغفور ليهو أبَداً. خَطِيَّتو فوق رَقَبتو لِلأبَد.“

³⁰ عَشان هُم قالو: ”فيهو روح نَجِس.“

³¹ و أُمّو و أخوانو جو، و كانو واقفين بَرَّه. و رَسَّلو واحِد عَشان يَناديهو.

³² و ناس كُتار كانو قاعِدين حَولو، و قالو ليهو: ”أُمَّك و أخوانَك في بَرَّه يَطلُبوك.“

³³ و رَدَّ عَليهُم و قال: ”مِنو أُمّي و أخواني؟“

³⁴ و إتلَفَت لِلنّاس الكانو قاعِدين حَولو و قال: ”أهُم ديل أُمّي و أخواني!

³⁵ هو البيَعمِل إرادَة الله، هو أخوّي، و أُختي، و أُمّي.“