مَرْقُس 2 - كِتاب العَهد الجَّديد مِن الكِتاب المُقَدَّس

يَسُوع يَشفي المَفلوج

¹ و بَعَد أيام قَليلَه، رَجَع لِكَفْرَنَاحُوم، و النّاس سِمِعو هو في البيت.

² و ناس كَتيرين إتلَمّو، و كِدا ما فِضِل أي مَحَل، و لا حَول الباب. و كان يَبَشِّرُم بِالكِلمَه.

³ و ناس جو جايبين ليهو زول مَفلوج، و أربَعَه رُجال يَشيلوهو.

⁴ و لَمّا ما قِدِرو يَقَرِّبوهو لِيَسُوع عَلَشان كَترَت النّاس، فَتَحو راس البيت فوق المَحَل الكان فيهو يَسُوع. و لَمّا فَتَحوهو، نَزَّلو البِرِش الكان راقِد فوقو المَفلوج.

⁵ و لَمّا يَسُوع شاف إيمانُم، هو قال لِلمَفلوج: ”يا وَلَدي، خَطاياك مَغفورَه ليك.“

⁶ و بَعَد مِن مُعَلِّمين القانون كانو قاعِدين هِناك يَفَكِّرو في قُلوبُم،

⁷ ”الرّاجِل دا بِكَلِّم كِدا لِشِنو؟ هو يَجَدِّف! مِنو يَقدَر يَغفِر الخَطايا إلّا الله بَس؟“

⁸ و طَوّالي يَسُوع، و هو عِرِف في روحو إنَّهُم فَكَّرو كِدا في نُفوسُم، قال ليهُم: ”لِشِنو تَفَكِّرو كِدا في قُلوبكُم؟

⁹ ياتو أسهَل؟ بَقول لِلمَفلوج: خَطاياك مَغفورَه ليك؟ ولّا بَقول: قوم، شيل بِرِشَك و أمشي؟

¹⁰ و لَكِن عَشان تَفهَمو إنّو إبن الإنسان عِندو سُلطَه في الدُّنيا لِيَغفِر الخَطايا،“ قال لِلمَفلوج:

¹¹ ”أقول ليك، قوم، شيل بِرِشَك و أمشي لِبيتَك.“

¹² و هو قام و طَوّالي شال بِرِشو و مَرَق قِدّام كُلُّهُم. و كُل النّاس إستَغرَبو جِدّاً، و مَجَّدو الله، و قالو: ”ما شُفنا حاجَه زي دي أبَداً!“

إختِيار مَتَّى

¹³ و مَرَق مَرَّه تانيَه لِجَمب البَحَر. و كُل النّاس جو ليهو، و هو كان يَعَلِّمُم.

¹⁴ و وَكِت هو كان ماشي، شاف لَاوِي وَلَد حَلْفَى قاعِد في مَكتَب الضَّريبَه. و قال ليهو: ”أتبَعني.“ و هو قام و تَبَعو.

¹⁵ و لَمّا هو كان قاعِد ياكُل في الطَّرَبيزَه في بيت لَاوِي، كَتير مِن النّاس البِلِمّو الضَّريبَه و الخاطيين كانو قاعِدين مَعَ يَسُوع و تَلاميذو. عَلَشان النّاس التَّبَعوهو كانو كُتار.

¹⁶ و لَمّا مُعَلِّمين القانون مِن الفَرِّيسِيِّين شافو هو كان ياكُل مَعَ الخاطيين و البِلِمّو الضَّريبَه، قالو لِتَلاميذو: ”لِشِنو هو ياكُل و يَشرَب مَعَ البِلِمّو الضَّريبَه و الخاطيين؟“

¹⁷ و لَمّا يَسُوع سِمِع، قال ليهُم: ”النّاس الشُّداد ما يَحتاجو لِلحَكيم، لَكِن العَيّانين. أنا ما جيت عَشان أنادي البارين، لَكِن الخاطيين.“

¹⁸ و تَلاميذ يُوحَنَّا و الفَرّيسيّين كانو صايمين. و النّاس جو و قالو ليهو: ”لِشِنو تَلاميذ يُوحَنَّا و تَلاميذ الفَرِّيسِيِّين بِصومو، و لَكِن تَلاميذَك ما بِصومو؟“

¹⁹ و يَسُوع قال ليهُم: ”مُمكِن ناس العِرِس يَصومو و العَريس مَعاهُم؟ وَكِت ما العَريس مَعاهُم، ما مُمكِن يَصومو.

²⁰ و لَكِن الأيام بِجو لَمّا ياخُدو العَريس مِنَّهُم. في اليوم داك بِصومو.

²¹ ما في زول يَخَيِّط حِتَّه مِن قُماش جَديد عَلى قُماش قَديم. إذا يَعمِل كِدا، حِتَّت القُماش الجَّديد تَشرُط القَديم، و الشَّرط بِكون أكعَب.

²² و ما في زول يَكُب خَمرَه جَديدَه في قِربَه قَديمَه. إذا يَعمِل كِدا، الخَمرَه تَشرُط القِربَه القَديمَه، و الخَمرَه و القِربَه بِخرَبو. لَكِن الخَمرَه الجَديدَه يَخُتّوها في قِربَه جَديدَه.“

رَب السَّبِت

²³ و في يوم السَّبِت، كان ماشي في وَسط الزُّروع. و وَكِت ما هُم ماشين، تَلاميذو بِقو يَقطَعو روسين الدُّرَه.

²⁴ و الفَرّيسيّين قالو ليهو: ”شوف، لِشِنو يَعمِلو الما بِالقانون أن يَعمِلو في يوم السَّبِت؟“

²⁵ و قال ليهُم: ”ما قَريتو أبَداً العَمَلو دَاوُد لَمّا كان جَعان و كان في إحتِياج، هو و الكانو مَعاهو؟

²⁶ كيف دَخَل بيت الله في أيام أَبِيأَثَار، رَئيس القُسُس، و أكَل عيش التَّقدِمَه المَمنوع لِلنّاس أن ياكلوهو، لَكِن القُسُس بَس ياكلوهو؟ و أدّاهو لِلكانو مَعاهو كَمان؟“

²⁷ و قال ليهُم: ”يوم السَّبِت كان مَعمول فِشان بَني آدَم، و ما بَني آدَم فِشان السَّبِت.

²⁸ و كِدا، إبن الإنسان هو رَب السَّبِت.“