مَرْقُس 16 - كِتاب العَهد الجَّديد مِن الكِتاب المُقَدَّس

القيامَه

¹ و بَعَد ما يوم السَّبِت فات، مَرْيَم المَجْدَلِيَّه و مَرْيَم أُم يَعْقُوب و سَلومَه إشتَرو ريحَه عَشان يَمشو يَمسَحوها.

² و بَدري جِدّاً في أوَّل يوم مِن الأسبوع، مَشو لِلقَبر بَعَد طُلوع الشَّمِش.

³ و كانو يَقولو مَعَ بَعض: ”مِنو بِدَردِق لينا الحَجَر مِن خَشم القَبر؟“

⁴ و لَمّا عايَنو لِفوق، شافو الحَجَر كان إدَّردَق مِن القَبر، عَشان كان كَبير خالِص.

⁵ و دَخَلو القَبر، و شافو شاب قاعِد عَلى اليَمين، و لابِس توب أبيَض. و خافو جِدّاً.

⁶ و هو قال ليهُم: ”ما تَخافو. إنتو تَطلُبو يَسُوع النّاصِري الكان مَصلوب. هو قام. هو ما هِنا. أهو دا المَحَل الخَتّوهو فيهو.

⁷ لَكِن أمشو، و قولو لِتَلاميذو و لِبُطْرُس، هو ماشي قُبّالكُم لِلجَّليل. هِناك بِتشوفو، زي ما قال ليكُم.“

⁸ و مَرَقو و هَرَبو مِن القَبر، عَشان كانو يَرجِفو و يِستَغرَبو. و ما قالو حاجَه لِأي واحِد، عَشان كانو يَخافو.

ظُهور يَسُوع و طُلوعو لِلسَّما

⁹ و بَعَد ما يَسُوع قام بَدري في أوَّل يوم مِن الأسبوع، ظَهَر في الأوَّل لِمَرْيَم المَجْدَلِيَّه. و قُبّال دا، يَسُوع كان مَرَّق مِنَّها سَبعَه شياطين.

¹⁰ و هي مَشَت، و خَبَّرَت الكانو مَعاهو قُبّال و هُم كانو يَنوحو و يَبكو.

¹¹ و لَمّا سِمِعو يَسُوع حَي، و هي شافَتو، هُم ما صَدَّقو.

¹² و بَعَد دا، ظَهَر في شَكَل تاني لِإتنين مِنَّهُم، وَكِت ما كانو ماشين بَرَّه مِن المَدينَه.

¹³ و ديل رَجَعو، و خَبَّرو التّانيين. و ديل كَمان ما صَدَّقو.

¹⁴ بَعدين، ظَهَر لِلحِداشَر زاتُم و هُم قاعِدين ياكلو. و وَبَّخُم عَشان ما كان عِندَهُم إيمان، و فِشان قُلوبُم كانَت قَوّيَّه، عَشان هُم ما صَدَّقوهُم الشّافوهو بَعَد ما قام.

¹⁵ و قال ليهُم: ”أمشو لِكُل الدُّنيا، و بَشِّرو بِالإنجيل لِكُلّو ناس الدُّنيا.

¹⁶ هو اليَصَدِّق و يِتعَمَّد بِخلَص، و الما يَصَدِّق بِحكُمو عَليهو.

¹⁷ و العَلامات دي تَمشي مَعَ المِصَدِّقين. بِإسمي، يَمَرِّقو شياطين، و يِتكَلَّمو بِلُغات جَديدَه،

¹⁸ و يَرفَعو دَبايب بِإيديهُم، و إذا يَشرَبو أي شي البِكتُل، ما بِجيب ليهُم عَوَجَه أبَداً. و بِخُتّو إيدينُم عَلى العَيّانين، و بِكونو شُداد.“

¹⁹ و بَعَد ما الرَّب يَسُوع كَلَّمُم، إتَّخَد لِلسَّما، و قَعَد عَلى يَمين الله.

²⁰ و لَكِن هُم مَرَقو، و بِشَّرو في كُلّو مَكان. و الرَّب كان يَشتَغِل مَعاهُم و يَثَبِّت الكِلمَه بِالعَلامات الكانَت تَمشي مَعاها.