مَرْقُس 15 - كِتاب العَهد الجَّديد مِن الكِتاب المُقَدَّس

يَسُوع قِدّام بِيلاطُس

¹ و طَوّالي في الصَّباح، القُسُس الكُبار، مَعَ الشُّيوخ و مُعَلِّمين القانون، و كُل المَجلِس إتكَلَّمو مَعَ بَعض. و رَبَطو يَسُوع، و قادوهو، و سَلَّموهو لِبِيلاطُس.

² و بِيلاطُس سَألو و قال: ”إنتَ مَلِك اليَهود؟“ و رَدَّ عَليهو و قال: ”إنتَ تَقول.“

³ و القُسُس الكُبار كانو يَشتَكو عَليهو بِحاجات كَتيرَه.

⁴ و بِيلاطُس سَألو مَرَّه تانيَه و قال: ”ما تَرُد عَليهُم بِحاجَه؟ شوف كَم حاجَه يَشتَكو عَليك.“

⁵ و لَكِن يَسُوع لِسَّع ما رَدَّ عَليهو بِحاجَه. و بِيلاطُس إستَغرَب.

⁶ و في العيد، كانَت العادَه يَفِك مَحبوس واحِد الطَّلَبو النّاس.

⁷ و كان في راجِل إسمو بَراباس. و كان في السِّجِن مَعَ ناس الفِتنَه الكانو عَمَلو كَتل في الفِتنَه.

⁸ و النّاس طَلَعو، و إبتَدو يَطلُبو مِن أن يَعمِل زي ما كان يَعمِلو كُلّو عيد.

⁹ و رَدَّ عَليهُم و قال: ”عاوِزينّي أفِك ليكُم مَلِك اليَهود؟“

¹⁰ عَشان هو كان يَعرِف القُسُس الكُبار سَلَّموهو مِن الحَسَد.

¹¹ لَكِن القُسُس الكُبار حَرَّكو النّاس عَشان يَطلُبو مِن بِيلاطُس يَفِك ليهُم بَراباس بِدالو.

¹² و مَرَّه تانيَه بِيلاطُس رَدَّ عَليهُم و قال: ”و كِدا، بَعمِل شِنو لِلزّول الإنتو تَسَمّوهو مَلِك اليَهود؟“

¹³ و كورَكو و قالو: ”أصلُبو!“

¹⁴ و بِيلاطُس قال ليهُم: ”لِشِنو؟ خَطِيَّتو شِنو؟“ و لَكِن كورَكو زِيادَه: ”أصلُبو.“

¹⁵ و بِيلاطُس كان داير يَبسِط النّاس. و عَشان دا، فَكَّ ليهُم بَراباس. و بَعَد ما جَلَد يَسُوع، سَلَّمو عَشان يَصلُبوهو.

¹⁶ و العَساكِر قادوهو في جُوَّه الحوش، يَعني بيت المُدير، و لَمّو كُل الجّيش.

¹⁷ و لَبَّسوهو جَلّابيَّه حَمرَه، و عَمَل تاج مِن شوك، و خَتّوهو عَليهو.

¹⁸ و إبتَدو يَسَلِّمو عَليهو و يَقولو: ”السَّلام، يا مَلِك اليَهود.“

¹⁹ و كانو يَضرُبو رَاسو بِعَصايَه، و يَبزُقو عَليهو، و يَركَعو قِدّامو عَشان يَعبُدوهو.

²⁰ و بَعَد ما ضِحِكو عَليهو، قَلَعو مِنّو الجَلّابيَّه الحَمرَه، و لَبَّسوهو هِدومو، و قادوهو بَرَّه عَشان يَصلُبوهو.

يَسُوع عَلى الصَّليب

²¹ و واحِد إسمو سِمْعَان القِرَواني، أبو ألِسكَندَر و روفُس، كان بِفوت، و هو جاي مِن الزِّراعَه. و أخَدوهو بِقُوَّه عَشان يَشيل صَليبو.

²² و قادوهو لِلمَحَل اليَسَمّوهو جُلجُتَه، يَعني مَحَل جُمجُمَه.

²³ و قَدَّمو ليهو خَمرَه، مَلَخبَتَه بِحاجَه مُرَّه. لَكِن أبى ياخُدا.

²⁴ و صَلَبوهو، و قَسَمو هِدومو بِينُم و رَمو القُرَع عَليهو، عَشان يَشوفو كُلّو واحِد ياخُد شِنو.

²⁵ و كانَت السّاعَه تِسعَه في الصَّباح لَمّا صَلَبوهو.

²⁶ و الشَّكوى العَليهو الكان مَكتوب قال: ”مَلِك اليَهود.“

²⁷ و صَلَبو مَعاهو إتنين حَراميَّه، واحِد عَن يَمينو و التّاني عَن شِمالو.

²⁸ و الكِتاب كِمِل اليَقول: ”حَسَبوهو مَعَ اليَكَسِّر القانون.“

²⁹ و النّاس الكانو بِفوتو شَتَموهو، و هُم يَهِزّو روسينُم و يَقولو: ”هيي، إنتَ البِتَخرَب الهيكَل و تَبنيهو في تَلاتَة أيام،

³⁰ خَلِّص نَفسَك، و أنزِل مِن الصَّليب!“

³¹ و كِدا كَمان، القُسُس الكُبار كانو يَضحَكو عَليهو بَعضَهُم بَعض مَعَ مُعَلِّمين القانون، و يَقولو: ”هو خَلَّص ناس تانيين، لَكِن هو ما يَقدَر يَخَلِّص نَفسو.

³² خَلّي المَسيح دا، مَلِك إِسْرَائِيل، يَنزِل مِن الصَّليب هَسَّع دي عَشان نَشوف و نَصَدِّق.“ و كانو المَصلوبين مَعاهو يَشتِموهو كَمان.

موت يَسُوع

³³ و السّاعَه إتناشَر، كانَت في ضُلُمَّه عَلى الأرض كُلَّها لِغايَة السّاعَه تلاتَه.

³⁴ و السّاعَه تلاتَه، يَسُوع كورَك بِصوت عالي، و قال: ”إلوي، إلوي، لَما شَبَقتَني؟“ يَعني: ”إلَهي، إلَهي، لِشِنو سيبتَني؟“

³⁵ و بَعَض مِن الواقفين هِناك سِمِعو و قالو: ”أسمَعو، هو يَنادي إِيلِيَّا.“

³⁶ و واحِد مِنَّهُم جَرى، و مَلا سِفِنجَه بِخَل، و خَتّاها عَلى عَصايَه طَويلَه، و أدّاهو ليهو عَشان يَشرَبو، و قال: ”إستَنّى، نَشوف إذا إِيلِيَّا بِجي يَنَزِّلو.“

³⁷ و يَسُوع كورَك بِصوت عالي، و سَلّم روحو.

³⁸ و القُماش الكَبير الفي الهيكَل إتشَرَّط لِإتنين، مِن فوق لِتِحِت.

³⁹ و رَئيس الجّيش كان واقِف قِدّام يَسُوع. و لَمّا شاف إنّو كورَك و سَلّم روحو كِدا، قال: ”بِالحَق الإنسان دا كان إبن الله.“

⁴⁰ و كانو في نِسوان كَمان يَعاينو مِن بَعيد. و بِينُم كانو مَرْيَم المَجْدَلِيَّه، و مَرْيَم أُم يَعْقُوب الصَّغَير و يُوسِي، و سَلومَه.

⁴¹ و لَمّا يَسُوع كان في الجَّليل، النِّسوان ديل كانو تَبَعوهو و خَدَموهو. و كَمان نِسوان تانيات كَتيرات الجّو مَعاهو لِأُورُشَلِيم كانو هِناك.

دَفن يَسُوع

⁴² و كان يوم الإستِعداد، يَعني، اليوم قُبّال السَّبِت. و لَمّا بِقى المِسا،

⁴³ يُوسِف مِن الرَّامَه جا. و هو عُضو مُحتِرَم في المَجِلس، و كان يَنتَظِر مَلَكوت الله. و شَدّا حيلو، و مَشى لِبِيلاطُس، و طَلَب مِنّو جِسِم يَسُوع.

⁴⁴ و بِيلاطُس إستَغرَب لَمّا سِمِع هو مات طَوّالي كِدا. و نادى رَئيس الجّيش، و سَألو إذا مات مِن مُدَّه.

⁴⁵ و لَمّا عِرِف دا مِن رَئيس الجّيش، أدّا الجِّسم لِيُوسِف.

⁴⁶ و يُوسِف إشتَرى قُماش تيل، و نَزَّل جِسم يَسُوع، و لَفّاهو بِالتّيل، و خَتّاهو في قَبر مَقطوع مِن حَجَر. و دَردَق حَجَر كَبير عَلى دُخول القَبر.

⁴⁷ و مَرْيَم المَجْدَلِيَّه و مَرْيَم أُم يُوسِي شافو المَكان الخَتّوهو فيهو.