مَرْقُس 13 - كِتاب العَهد الجَّديد مِن الكِتاب المُقَدَّس

عَلامَة آخِر الزَّمَن

¹ و وَكِت ما هو كان يَمرُق مِن الهيكَل، واحِد مِن تَلاميذو قال ليهو: ”يا مُعَلِّم، شوف الحُجار الكُبار ديل! و البِنايات الجَّميلَه دي.“

² و يَسُوع قال ليهو: ”تَشوف البِنايات العَظيمَه دي؟ ما بِخَلّو هِنا حَجَر عَلى حَجَر أبَداً الما يَرموها تِحِت.“

³ و وَكِت ما يَسُوع كان قاعِد عَلى جَبَل الزّيتون مِقابِل الهيكَل، بُطْرُس و يَعْقُوب و يُوحَنَّا و أنْدَرَاوُس سألوهو و هُم بَراهُم، و قالو:

⁴ ”كَلِّمنا، الحاجَه دي بِتكون مِتين؟ و شِنو العَلامَه لَمّا كُل الحاجات دي قَرَّبَت تَتِم؟“

⁵ و يَسُوع إبتَدا يَقول ليهُم: ”خَلّو بالكُم عَشان واحِد ما بِغِشّكُم.

⁶ ناس كُتار بِجو بِإسمي و بِقولو: أنا هو! و هُم بِغِشّو ناس كَتيرين.

⁷ و لَمّا تَسمَعو عَن حُروب و خَبَر حُروب، ما تَخافو. لازِم الحاجات دي تَحصَل. لَكِن لِسَّع ما تَكون النِّهايَه.

⁸ عَشان أُمَّه بِتقوم عَلى أُمَّه و مَملَكَه عَلى مَملَكَه. و بِتكون في زَلازِل في مَحَلّات مُختَلِفَه. و بِكون جوع. دي بِدايَة الأوجاع.

⁹ لَكِن إنتو، خَلّو بالكُم لِنُفوسكُم، عَشان هُم بِسَلِّموكُم لِلمَحاكِم، و يَضرُبوكُم في بُيوت الرَّب. و بِتقومو قِدّام مُديرين و مُلوك فِشانّي أنا، عَشان تَكونو شَهادَه ليهُم.

¹⁰ و في الأوَّل لازِم بِبَشِّرو بِالإنجيل لِكُل الأُمَم.

¹¹ و لَمّا بِسوقوكُم لِلقَضيَّه، و يَسَلِّموكُم، ما تَفَكِّرو كَتير قُبّال الوَكِت عَن الإنتو بِتقولوها. لَكِن إتكَلَّمو زي ما الله بِدّي ليكُم في السّاعَه ديك، عَشان ما إنتو المِتكَلِّمين، لَكِن الرّوح القُدُس.

¹² و الأخو بِسَلِّم أخوهو لِلموت، و الأبو وَلَدو. و الأولاد بِقومو عَلى والِدينُم و بِكونو السَّبَب عَشان يَكتُلوهُم.

¹³ و النّاس كُلّو بِكرَهوكُم عَشان خاطِر إسمي. لَكِن اليِتحَمَّل لِغايَة الآخِر بِيَخلَص.

¹⁴ و لَمّا تَشوفو الشّي النَّجِس اليَخرَب، واقِف في المَحَل الما لازِم يَكون في، (خَلّي اليَقرا يَفهَم)، في الوَكِت دا،

¹⁵ خَلّوهُم الفي يَهُودِيَّه يَهرُبو لِلجِّبال، و هو الفي بَرَّه مِن بيتو ما يَرجَع و يَدخُل بيتو عَشان يَشيل حاجَه.

¹⁶ و هو الفي الزِّراعَه ما يَرجَع عَشان ياخُد توبو.

¹⁷ و حُزن لِلحامِلين و اليَرَضِّعو أولادُم في الأيام ديك!

¹⁸ و صَلّو إنّو ما يَحصُل في الخَريف.

¹⁹ عَلَشان الأيام ديك بِتكون أيام الضّيق. و ما كان في ضيق زي دا مِن وَكِت ما الله خَلَق الدُّنيا لِغايَة هَسَّع، و ما بِكون ضيق زي دا أبَداً.

²⁰ و إذا الرَّب ما كان قَصَّر الأيام، ما في واحِد كان يَخلَص. و لَكِن فِشان المُختارين الإختارُم، هو قَصَّر الأيام.

²¹ و في الوَكِت داك، إذا واحِد بِقول ليكُم: شوفو! أهو دا المَسيح! ولّا: شوفو! هو هِناك! ما تَصَدِّقوهو.

²² عَشان مُسَحَه كَضّابين و أنبياء كَضّابين بِقومو، و بيَعمِلو عَلامات و عَجايِب حَتّى يَغِشّو المُختارين (إذا مُمكِن).

²³ و لَكِن خَلّو بالكُم، أنا خَبَّرتَكُم بِكُلّو شي مِن قُبّال.

²⁴ و لَكِن في الأيام ديلاك، بَعَد الضّيق داك، الشَّمِش بِتكون ضُلُمَّه،

²⁵ و القَمَر ما بِدّي نورو. و النُّجوم بِيَقَعو مِن السَّما، و القُوّات الفي السَّما بِتهَزّو.

²⁶ في الوَكِت داك، بِشوفو إبن الإنسان جاي في سَحاب بِقُوَّه كَبيرَه و بِمَجد.

²⁷ و في الوَكِت داك بِرَسِّل المَلائكَه، و بِلِم المُختارين مِن المَحَلّات التَّجو مِنَّها الأربَعَه أرياح، و مِن آخِر الدُّنيا لِآخِر السَّما.

²⁸ مِن شَجَرَة التّين، إتعَلَّمو المَثَل. أوَّل ما الفَرَع يَبقى لَيِّن، و الوَرَق يَطلَع، إنتو بِتَعرِفو الخَريف قَريب.

²⁹ و كِدا كَمان، لَمّا تَشوفو الحاجات دي تَحصُل، بِتَعرِفو هو قَريب، عَلى الباب.

³⁰ أقول ليكُم الحَق، ناس الزَّمَن دا ما بِفوتو لِغايَة ما يَحصُل كُلّو دا.

³¹ السَّما و الأرض بِفوتو، و لَكِن كَلامي ما بِفوت.

³² لَكِن بِخُصوص اليوم داك و السّاعَه ديك، ما في واحِد يَعرِف عَنّو، و لا المَلائكَه الفي السَّما، و لا الإبن، إلّا الأبو.

³³ خَلّو بالكُم، و أحرِسو، و صَلّو. عَشان إنتو ما بِتَعرِفو الوَكِت.

³⁴ هو زي زول مِسافِر. لَمّا يَسيب بيتو، يَدّي لِخَدّامينو السُّلطَه، لِكُلّو واحِد في شُغلو. و يأمُر البَوّاب أن يَحرَس.

³⁵ عَلَشان دا، أحرِسو، عَشان إنتو ما بِتَعرِفو الوَكِت البِجي فيهو رَب البيت، إذا في المِسا، ولّا في نُص اللّيل، ولّا وَكِت كوراك الدّيك، ولّا في الصَّباح.

³⁶ إذا بِجي بِدون خَبَر، ما تَخَلّوهو يَلقاكُم نايمين.

³⁷ و الأنا بَقولو ليكُم، بَقولو لِلكُل: أحرِسو.“