مَرْقُس 12 - كِتاب العَهد الجَّديد مِن الكِتاب المُقَدَّس

مَثَل المُزَارِعين البَطّالين

¹ و إبتَدا يَقول ليهُم بِأمثال. ”كان في زول زَرَع جِنينَة العِنَب، و خَتَّ زَريبَه حَواليها و حَفَر حُفرَه لِعَصارَة العِنَب، و بَنى بُرج. و بَعدين أجَّرو لِمُزَارِعين، و سافَر لِبَلَد تانيَه.

² و لَمّا وَكِت الثَّمار جا، رَسَّل لِلمُزارعين خَدّام، عَشان ياخُد مِنَّهُم بَعَض مِن ثِمار الجِّنينَه.

³ و أخَدوهو و ضَرَبوهو شَديد، و رَسَّلَوهو فاضي.

⁴ و بَعدين رَسَّل ليهُم خَدّام تاني. و جَرَحو رَاسو، و شَتَموهو.

⁵ و بَعدين رَسَّل واحِد تاني، و كَتَلوهو. و كِدا آخِرين، ضربو بَعض مِنَّهُم، و كَتَلو بَعض مِنَّهُم.

⁶ و كان لِسَّع عِندو إبن واحِد مَحبوب. و في الآخِر، رَسَّلو ليهُم كَمان، و قال: هُم بِحتَرِمو إبني.

⁷ و لَكِن المُزَارِعين ديلاك قالو بَعضَهُم لِبَعض: دا هو الوارِث. تَعالو، خَلّونا نَكتُلو، و الميراث بِكون لينا.

⁸ و أخَدوهو، و كَتَلوهو، و رَموهو بَرَّه مِن الجِّنينَه.

⁹ سيد الجِّنينَه بيَعمِل شِنو؟ هو بِجي و يَخرَب المُزَارِعين، و بِدّي الجِّنينَه لِناس تانيين.

¹⁰ إنتو ما قَريتو المَكتوب دا؟ الحَجَر الرَّفَضوهو البَنّايين بِقى راس الرُّكُن.

¹¹ دا كان مِن الرَّب، و هو عَجيب في عُيونّا.“

¹² و جَرَّبو يَقبَضو عَليهو، و لَكِن خافو مِن النّاس. عَلَشان هُم فِهمو إنّو قال المَثَل عَليهُم. و كِدا، خَلّوهو و مَرَقو.

الضَّريبَه لِقَيصَر

¹³ و رَسَّلو ليهو بَعَض مِن الفَرِّيسِيِّين و بَعض مِن الهِيرُودُسين عَشان يَقبُضوهو في الكَلام.

¹⁴ و جو ليهو و قالو: ”يا مُعَلِّم، بِنَعرِف إنتَ تَقول الحَق، و ما تَغَيِّر كَلامَك عَشان فِكر النّاس. عَلَشان إنتَ ما تَعمِل فارِق بين النّاس، و لَكِن تَعَلِّم طَريق الله بِالحَق. واجِب عَلينا نَدّي الطُّلبَه لِقَيصَر، ولّا لا؟

¹⁵ نَدّيها ولّا ما نَدّيها؟“ و لَكِن يَسُوع عِرِف نِفاقُم، و قال ليهُم: ”لِشِنو تَجَرِّبوني؟ جيبو لَي دينار عَشان أشوفو.“

¹⁶ و جابوهو ليهو. و قال ليهُم: ”الصّورَه دي صورَة مِنو؟ و الكِتابَه كِتابَة مِنو؟“ قالو ليهو: ”بِتاعَت قَيصَر.“

¹⁷ و يَسُوع قال ليهُم: ”أدفَعو لِقَيصَر حاجات قَيصَر، و لِلَّه حاجات الله.“ و كانو بِستَغرَبو مِنّو.

الزَّواج في القيامَه

¹⁸ و الصَّدّوقيين جو ليهو، اليَقولو ما في قيامَه. و كانو يَسألوهو، و يَقولو:

¹⁹ ”يا مُعَلِّم، مُوسَى كَتَب لينا، إذا أخو زول يَموت و يَسيب مَرَتو، و لَكِن ما عِندو وَلَد، لازِم أخوهو بياخُد مَرَتو و بِجيب لِأخوهو أولاد.

²⁰ و كانو في سَبعَه أخوان. و الأوَّل أخَد مَرَه، و مات، و ما عِندو وَلَد.

²¹ و التّاني أخَدا، و مات، و ما عِندو وَلَد. و التّالِت كَمان عَمَل زي دا.

²² و السَّبعَه أخوان ما عِندَهُم أولاد. و بَعَد كُلُّهُم، المَرَه ماتَت كَمان.

²³ و في القيامَه لَمّا بِقومو، هي بِتكون زوجَة مِنو؟ عَشان السَّبعَه أخَدوها تَكون ليهُم زوجَه.“

²⁴ و يَسُوع قال ليهُم: ”عَلَشان كِدا إنتو ما غَلطانين؟ عَشان ما تَفهَمو الكُتُب، و لا قُوَّة الله؟

²⁵ عَشان لَمّا يَقومو مِن بين المَيِّتين، ما يِتزَوَّجو ولّا يَزَوِّجو، لَكِن يَكونو زي المَلائكَه الفي السَّما.

²⁶ و لَكِن عَن المَيِّتين البِقومو، ما قَريتو في كِتاب مُوسَى عَن الشَّجَرَه الصَّغَيرَه؟ كيف الله قال ليهو: أنا إلَه إِبْرَاهِيم، و إلَه إِسْحَاق، و إلَه يَعْقُوب؟

²⁷ هو ما إلَه المَيِّتين، لَكِن إلَه الحَيين. إنتو غَلطانين جِدّاً.“

الأمر الأكبَر

²⁸ و واحِد مِن مُعَلِّمين القانون قَرَّب ليهو و سِمِعُم يِتكَلَّمو مَعَ بَعض. و لَمّا شاف إنّو رَدَّ عَليهُم تَمام، سَألو: ”ياتو أمر المُهِم مِن الكُل؟“

²⁹ يَسُوع رَدَّ عَليهو و قال: ”الأمر الأوَّل، هو: أسمَع، يا إِسْرَائِيل. الرَّب إلَهنا هو رَب واحِد.

³⁰ و تَحِب الرَّب إلَهَك بِكُلّو قَلبَك، و كُلّو نَفسَك، و كُلّو فِكرَك، و كُلّو قُوَّتَك.

³¹ و دا هو التّاني: تَحِب قَريبَك زي نَفسَك. ما في أمر أكبَر مِن ديل.“

³² و مُعَلِّم القانون قال ليهو: ”سَمِح، يا مُعَلِّم. بِالحَق قُلتَ الله واحِد، و ما في تاني إلّا هو.

³³ و مَحَبَّتو بِكُل القَلب، و بِكُل الفَهم، و بِكُل القُوَّه، و مَحَبَّة القَريب زي نَفسَك، دا أهَمّا مِن كُل الضَّبايح المَحروقَه و الضَّبايح التّانيَه.“

³⁴ و لَمّا يَسُوع شاف هو رَدَّ عَليهو بِحِكمَه، قال ليهو: ”إنتَ ما بَعيد مِن مَلَكوت الله.“ و بَعَد دا، كُلّو واحِد كان خايِف يَسألو سؤَال تاني.

³⁵ و وَكِت ما يَسُوع كان يَعَلِّم في الهيكَل، قال: ”كيف يَقولو مُعَلِّمين القانون أن المَسيح هو إبن دَاوُد؟

³⁶ دَاوُد نَفسو قال بِالرّوح القُدُس: الرَّب قال لِرَبّي: أقعُد عَن يَميني لِغايَة ما بَخُت عُدوانَك تِحِت كِرعينَك.

³⁷ دَاوُد نَفسو يَناديهو رَب. كيف هو يَكون إبنو؟“ و الجَّمَع الكَبير كانو يَسمَعوهو بِفَرَح.

³⁸ و في تَعليمو قال: ”خَلّو بالكُم مِن مُعَلِّمين القانون. هُم بِحِبّو المَشي بِتيبان طَويلَه، و السَّلامات في الأسواق،

³⁹ و الكَراسي الأوّلانيّن في بُيوت الرَّب، و مَحَلّات المُحتَرِمَه في العَزومات.

⁴⁰ هُم بِياكُلو بُيوت الأرامِل، و يَصَلّو صَلَوات وَكِت طَويلَه بِالكِضِب. ديل بِيَقبَلو حُكم أكبَر.“

هَديَّة الأرمَلَه

⁴¹ و يَسُوع قَعَد جَنب الخَزنَه. و كان يَعايِن كيف النّاس كانو يَرمو الفِلوس في الخَزنَه. و ناس غَنيين كَتيرين كانو يَرمو فِلوس كَتير.

⁴² و أرمَلَه مِسكينَه جات و رَمَت مِلّيمين، و دا أقَل مِن تَعريفَه.

⁴³ و يَسُوع نادى ليهو تَلاميذو، و قال ليهُم: ”أقول ليكُم الحَق. الأرمَلَه المِسكينَه دي رَمَت أكتَر مِن كُل النّاس اليَرمو في الخَزنَه.

⁴⁴ عَلَشان كُلَّهُم رَمو مِن كَترَت مالُم، و لَكِن دي مِن إحتياجا رَمَت كُل العِندَها، كُل البِتعيش بيهو.“