مَرْقُس 11 - كِتاب العَهد الجَّديد مِن الكِتاب المُقَدَّس

الدُّخول بِالنَّصر

¹ و لَمّا قَرَّبو مِن أُورُشَلِيم و وِصلو بيت فاجي و بيت عَنيا عِند جَبَل الزّيتون، رَسَّل إتنين مِن تَلاميذو،

² و قال ليهُم: ”أمشو لِلحِلَّه القِدّامكُم، و طَوّالي لَمّا تَدخُلو فيها، بِتَلقو جَنى حُمارَه مَربوط، ما في واحِد رِكبو أبَداً. فِكُوهو، و جيبوهو.

³ و إذا واحِد بِقول ليكُم: لِشِنو تَعمِلو كِدا؟ قولو: الرَّب مُحتاج ليهو، و يَرَجِّعو هِنا طَوّالي.“

⁴ و مَرَقو، و لِقو جَنى حُمارَه مَربوط عِند الباب بَرَّه مِن السِّكَّه. و فَكّوهو.

⁵ و بَعض مِن النّاس الكانو واقفين هِناك قالو ليهُم: ”بِتَعمِلو شِنو، و إنتو تَفِكّو جَنى الحُمارَه؟“

⁶ و قالو ليهُم زي ما قال يَسُوع. و النّاس خَلّوهُم ياخدوهو.

⁷ و جابو جَنى الحُمارَه لِيَسُوع، و رَمو هِدُومُم عَليهو. و يَسُوع قَعَد فوقو.

⁸ و ناس كُتار فَرَشو هِدُومُم في السِّكَّه، و تانيين فَرَشو وَرَق مِن الشَّجَر الهُم قَطَعو مِن الزِّراعات.

⁹ و هُم الإتقَدَّموهو و هُم التَّبَعوهو كانو يَكورِكو، و قالو: ”أُوصَنّا! مُبارَك هو الجّاي بِإسم الرَّب!

¹⁰ مُبارَكَه مَملَكَة أبونا دَاوُد الجّايَه! أُوصَنّا في العالي!“

¹¹ و دَخَل لِأُورُشَلِيم و مَشى لِلهيكَل. و لَمّا عايَن حَولو لِكُلّو شي، مَرَق لِبيت عَنيا مَعَ الإتناشَر، عَشان بِقى وَكِت المِسا.

يَسُوع يَنَضِّف الهيكَل

¹² و في الصَّباح، لَمّا مَرَقو مِن بيت عَنيا، يَسُوع كان جَعان.

¹³ و شاف مِن بَعيد شَجَرَة تين، العِندَها وَرَق. و مَشى يَشوف إذا يِمكِن يَلقا فيها حاجَه. و لَمّا وِصِل ليها، ما لِقى حاجَه إلّا وَرَق، عَلَشان ما كان الوَكِت لِلتّين.

¹⁴ و قال ليها: ”ما في واحِد بياكُل مِنِّك ثِمار تاني مَرَّه أبَداً.“ و تَلاميذو سِمِعوهو.

¹⁵ و جو لِأُورُشَلِيم، و دَخَل الهيكَل و إبتَدا يَطرُد النّاس الكانو بِبيعو و بِشتَرو في الهيكَل. و قَلَب طَرَبيزات الصَّرّافين و كَراسي النّاس الكانو بِبيعو الحَمام.

¹⁶ و ما خَلّى أي واحِد يَشيل بُضاعَه في وَسط الهيكَل.

¹⁷ و كان يَعَلِّم و قال: ”ما مَكتوب: يَسَمّو بيتي بيت الصَّلاه لِكُل الأُمَم؟ لَكِن إنتو سَوّيتوهو مَحَل حَراميَّه.“

¹⁸ و القُسُس الكُبار و مُعَلِّمين القانون سِمِعو، و بِقو يَكوسو طَريق عَشان يَكتُلوهو. عَلَشان هُم كانو خايفين مِنّو، عَشان كُل النّاس إتعَجَّبو مِن تَعليمو.

¹⁹ و لَمّا بِقى المِسا، مَرَقو مِن المَدينَه.

شَجَرَة التّين يبسَت

²⁰ و في الصَّباح وَكِت ما كانو ماشين، شافو شَجَرَة التّين يِبسَت لِغايَة عُروقا.

²¹ و بُطْرُس إتزَكَّر و قال ليهو: ”يا سَيِّد، شوف! شَجَرَة التّين الأنتَ لَعَنتَها يِبسَت.“

²² و يَسُوع رَدَّ عَليهُم و قال: ”خَلّي يَكون ليكُم إيمان بِالله.

²³ أقول ليكُم الحَق، أي زول اليَقول لِلجَّبَل دا: أمرُق، و أرمي نَفسَك في البَحَر، و هو ما بِشِك في قَلبو، لَكِن يَصَدِّق الهو يَقولو يَحصُل، دا بِكون عِندو.

²⁴ عَلَشان كِدا، أقول ليكُم، كُل الإنتو تَطلُبوهو في الصَّلاه، صَدِّقو إنَّكُم بِتَقبَلوهو، و يَكون ليكُم.

²⁵ و لَمّا تَقيفو و تَصَلّو، أغفِرو إذا عِندَكُم أي شي عَلى زول، عَشان أبوكُم كَمان الفي السَّما يَغفِر ليكُم خَطاياكُم.

²⁶ و إذا إنتو ما تَغفِرو، أبوكُم الفي السَّما ما يَغفِر خَطاياكُم.“

²⁷ و جو لِأُورُشَلِيم مَرَّه تانيَه. و وَكِت ما هو كان ماشي في الهيكَل، القُسُس الكُبار و مُعَلِّمين القانون و الشُّيوخ جو ليهو،

²⁸ القالو ليهو: ”بِياتا سُلطَه بِتَعمِل الأعمال دي؟ و مِنو أدّاك السُّلطَه دي عَشان تَعمِل الحاجات دي؟“

²⁹ يَسُوع قال ليهُم: ”و أنا كَمان بَسألكُم سؤَال واحِد. رُدّو عَلي، و أنا أقول ليكُم بِياتا سُلطَه بَسَوّي الحاجات دي.

³⁰ مَعموديَّة يُوحَنَّا كانَت مِن السَّما ولّا مِن النّاس؟ رُدّو عَلي.“

³¹ و إتكَلَّمو مَعَ بَعض، و قالو: ”إذا نَقول: مِن السَّما، هو بِقول: لِشِنو ما صَدَّقتوهو؟

³² و لَكِن إذا نَقول: مِن النّاس، ...“ و هُم كانو خايفين مِن النّاس، عَشان كُل النّاس حَسبو إنّو يُوحَنَّا نَبي حَقيقي.

³³ عَشان دا، رَدّو عَلى يَسُوع و قالو: ”ما بِنَعرِف.“ و يَسُوع قال ليهُم: ”و لا أنا بَقول ليكُم بِياتا سُلطَه بَسَوّي الحاجات دي.“