مَرْقُس 10 - كِتاب العَهد الجَّديد مِن الكِتاب المُقَدَّس

الطّلاق

¹ و يَسُوع مَرَق، و مَشى لِمَحَل اليَهُودِيَّه و غادي الأُرْدُنّ. و ناس كُتار إتلَمّو ليهو، و كان يَعَلِّمُم كَمان زي عادَتو.

² و الفَرّيسيّين قَرَّبو ليهو عَشان يَجَرِّبوهو و سألوهو: ”بِالقانون لِلرّاجِل يَطَلِّق مَرَتو؟“

³ رَدَّ عَليهُم و قال: ”مُوسَى أمَركُم بِشِنو؟“

⁴ قالو: ”مُوسَى أدّا إذن لِلرّاجِل أن يَكتِب شَهادَة الطّلاق، و يَرَسِّلا مِنّو.“

⁵ و يَسُوع قال ليهُم: ”مُوسَى كَتَب الأمر دا عَلَشان قُلوبكُم قَوّيين.

⁶ لَكِن مِن بِدايَة خَليقَة الدُّنيا، الله خَلَقُم راجِل و مَرَه.

⁷ و فِشان دا، الرّاجِل بِسيب أبوهو و أُمّو، و يَلحَق مَرَتو.

⁸ و الأتنين يَبقو جِسم واحِد. كِدا، هُم ما إتنين بَعَد دا، لَكِن جِسم واحِد.

⁹ عَلَشان كِدا، الجَّمَعو الله، ما تَخَلّي زول يَفَرِّقو.“

¹⁰ و في البيت، تَلاميذو سَألو كَمان عَن دا.

¹¹ و قال ليهُم: ”اليَطَلِّق مَرَتو و بِتزَوَّج مَرَه تانيَه، يَعمِل زِنا عَليها.

¹² و إذا هي تَطَلِّق راجِلا و تَزَوِّج راجِل تاني، هي تَعمِل الزِّنا.“

يَسُوع و الأولاد

¹³ و كانو يَقَدِّمو ليهو أولاد عَشان يَلمَسُم. و لَكِن التَّلاميذ كانو يَوَبِّخو النّاس القَدَّموهُم.

¹⁴ و لَكِن لَمّا يَسُوع شافُم، زِعِل شَديد، و قال ليهُم: ”خَلّو الأولاد بِجو لَي، و ما تَمنَعوهُم. عَشان مَلَكوت الله ليهُم اليَكونو زي الأولاد ديل.

¹⁵ أقول ليكُم الحَق، الما يَقبَل مَلَكوت الله زي وَلَد، ما بِدخُلو أبَداً.“

¹⁶ و أخَدُم في ضِرعاتو و كان يَبارِكُم، و هو يَخُت إيدينو عَليهُم.

الشّاب الغَني

¹⁷ و وَكِت ما كان ماشي في السِّكَّه، واحِد جَرى و رَكَع قِدّامو و سَألو و قال ليهو: ”يا المُعَلِّم الصّالِح، أسَوّي شِنو عَشان أُورَث الحَياة الأبَديَّه؟“

¹⁸ و يَسُوع قال ليهو: ”لِشِنو تَسَمّيني صالِح؟ ما في زول واحِد صالِح إلّا واحِد، و هو الله.

¹⁹ إنتَ تَعرِف الأوامِر: ما تَكتُل، ما تَعمِل الزِّنا، ما تَسرِق، ما تَشهَدو بِالكِضِب، ما تَغِش، إحتَرِم أبوك و أُمَّك.“

²⁰ و قال ليهو، ”يا مُعَلِّم، حَفَظتو دي كُلَّها مِن الزَّمَن الأنا كُنتَ شاب.“

²¹ و يَسُوع عايَن ليهو، و حَبّاهو، و قال: ”ناقصَه ليك حاجَه واحدَه. أمشي، بيع كُلّو مالَك، و أدّيهو لِلمَساكين، و بِكون عِندَك كَنز في السَّما. و تَعال، و أتبَعني.“

²² و هو بِقى ما مَبسوط مِن الكِلمَه دي، و هو مَرَق حَزنان، عَشان كان عِندو أموال كَتيرَه.

²³ و يَسُوع عايَن حَوَليهو و قال لِتَلاميذو: ”كيف بِكون صَعب لِلغَنيين أن يدخُلو مَلَكوت الله!“

²⁴ و التَّلاميذ إستَغرَبو مِن كَلامو. لَكِن يَسُوع قال ليهُم كَمان: ”يا أولادي، دُخول مَلَكوت الله صَعب جِدّاً!

²⁵ أسهَل لِجَمَل أن يَدخُل في عين إبرَه مِن أن راجِل غَني يَدخُل مَلَكوت الله.“

²⁶ و إتعَجَّبو خَلاص، و قالو ليهو: ”كان كِدا، مِنو يَقدَر يَخلَص؟“

²⁷ يَسُوع عايَن ليهُم و قال: ”دا ما مُمكِن لِلنّاس، لَكِن مُمكِن لِلَّه. عَشان كُلّو شي مُمكِن لِلَّه.“

²⁸ و بُطْرُس إبتَدا يَقول ليهو: ”شوف، نِحنا خَلّينا كُلّو شي و تَبَعناك.“

²⁹ يَسُوع قال: ”أقول ليكُم الحَق، ما في واحِد خَلّى بيت، ولّا أخوان، ولّا أخوات، ولّا أُم، ولّا أبو، ولّا أولاد، ولّا زِراعات فِشانّي و فِشان الإنجيل،

³⁰ إلّا يَقبَل مِيَّة مَرَّه هَسَّع في الزَّمَن دا: بُيوت، و أخوان، و أخوات، و أُمَّهات، و أولاد، و زِراعات مَعَ طَرد، و في الزَّمَن الجّاي الحَياة الأبَديَّه.

³¹ و لَكِن كَتير مِن النّاس الفي الأوَّل بِكونو في الآخِر، و الفي الآخِر بِكونو في الأوَّل.“

³² و كانو في السِّكَّه، و يَطلَعو لِأُورُشَلِيم. و يَسُوع كان ماشي قِدّامُم. و كانو يِستَغرَبو، و هُم التَّبَعوهو كانو خايفين. و يَسُوع أخَد الإتناشَر مَرَّه تانيَه، و إبتَدا يَقول ليهُم عَن البِحصَل ليهو.

³³ و قال: ”شوفو، نِحنا نَطلَع لِأُورُشَلِيم. و بِسَلِّمو إبن الإنسان لِلقُسُس الكُبار و مُعَلِّمين القانون. و بِحكُمو عَليهو بِالموت، و بِسَلِّموهو لِلأُمَم.

³⁴ و بِضحَكو عَليهو، و يَبزَقو عَليهو، و يَجلِدوهو، و يَكتُلوهو. و بَعَد تَلاتَة أيام بِقوم.“

طَلَب يَعْقُوب و يُوحَنَّا

³⁵ و يَعْقُوب و يُوحَنَّا أولاد زَبَدي قَرَّبو ليهو و قالو ليهو: ”يا مُعَلِّم، نِحنا دايِرينَك بِتَعمِل لينا كُلّو ما نَطلُب مِنَّك.“

³⁶ و قال ليهُم: ”دايِرينّي أعمِل ليكُم شِنو؟“

³⁷ قالو ليهو: ”أَدِّي لينا نَقَنِّب واحِد عَن يَمينَك، و واحِد عَن شِمالَك في مَجدَك.“

³⁸ لَكِن يَسُوع قال ليهُم: ”إنتو ما تَعرِفو الإنتو تَطلُبو. إنتو تَقدَرو تَشرَبو مِن كُبّايَة الوَجَع الأنا بَشرَب مِنَّها؟ و تِتعَمَّدو بِالمَعموديَّه الأنا أتعَمَّد بيها؟“

³⁹ و قالو ليهو: ”بِنَقدَر.“ و يَسُوع قال ليهُم: ”الكُبّايَه الأنا بَشرَب مِنَّها، إنتو بِتَشرَبو مِنَّها. و المَعموديَّه الأنا بَتعَمَّد بيها، بِتعَمَّدو إنتو.

⁴⁰ و لَكِن القُعاد عَن يَميني ولّا عَن شِمالي ما لَي أن أدّيكُم. لَكِن هو لِلحَضَّر ليهُم الله.“

⁴¹ و لَمّا العَشَرَه سِمِعو، إبتَدو يَزعَلو مِن يَعْقُوب و يُوحَنَّا.

⁴² و يَسُوع ناداهُم ليهو و قال ليهُم: ”إنتو عارفين أن ديل المَعروفين يَكونو حُكّام الأُمَم، هُم يَعمِلو زي السَّيد عَليهُم. و الكُبار يَشتَغِلو بِسُلطَه عَليهُم.

⁴³ و لَكِن ما يَكون بينكُم زي دا. لَكِن العاوِز يَبقى كَبير بينكُم، لازِم يَكون خَدّام ليكُم.

⁴⁴ و العاوِز يَبقى الأوَّل بينكُم، لازِم يَكون عَبد لِلكُل.

⁴⁵ عَلَشان إبن الإنسان ما جا عَشان النّاس يَخدِموهو، لَكِن عَشان يَخدِم النّاس، و عَشان يَدّي نَفسو فِداء عَن ناس كُتار.“

شِفا بَارْتِيمَاوُس العَميان

⁴⁶ و جو لِأَرِيحَا. و وَكِت ما كان يَمرُق مِن أَرِيحَا مَعَ تَلاميذو و ناس كُتار كَمان، بَارْتِيمَاوُس، يَعني وَلَد تِيمَاوُس، و هو مِسكين و عَميان، كان قاعِد في السِّكَّه يَسأل صَدَقَه.

⁴⁷ و لَمّا هو سِمِع إنّو كان يَسُوع النّاصِري، إبتَدا يَكورِك و يَقول: ”يا يَسُوع، إبن دَاوُد، أرحَمني!“

⁴⁸ و ناس كُتار كانو يَوَبِّخوهو، و يَكَلِّموهو عَشان يَسكُت. و لَكِن هو كان يَكورِك زِيادَه: ”يا يَسُوع، إبن دَاوُد، أرحَمني.“

⁴⁹ و يَسُوع وَقَف و قال: ”نادوهو.“ و نادو العَميان و قالو ليهو: ”شِد حيلَك. قوم، هو بِناديك.“

⁵⁰ و رَمى توبو و نَطَّ، و جا لِيَسُوع.

⁵¹ و يَسُوع قال ليهو: ”دايِرني أعمِل ليك شِنو؟“ و العَميان قال ليهو: ”يا سَيِّد، داير أشوف مَرَّه تانيَه.“

⁵² و قال ليهو: ”أمشي، إيمانَك شَفاك.“ و طَوّالي قِدِر يَشوف، و تَبَع يَسُوع في الدَرِب.