مَرْقُس 1 - كِتاب العَهد الجَّديد مِن الكِتاب المُقَدَّس

يُوحَنَّا المَعمَدان يَجَهِّز السِّكَّه

¹ بِدايَة إنجيل يَسُوع المَسيح إبن الله.

² زي ما مَكتوب في كِتاب النَّبي إِشَعْيَاء: ”شوف، أنا بَرَسِّل مُرسال قِدَّامَك، البِحَضِّر طَريقَك.

³ صوت بِكورِك في الخَلا، و يَقول: حَضِّرو طَريق الرَّب، و أعمِلو السِّكَّه بِتاعتو عَديلَه.“

⁴ يُوحَنَّا المَعمَدان ظَهَر في الخَلا، و كان يَبَشِّر بِمَعموديَّة التّوبَه لِغُفران الخَطايا.

⁵ و كُل النّاس مِن بِلاد اليَهُودِيَّه مَرَقو ليهو، و كُلّو ناس أُورُشَلِيم. و كانو يِتعَمَّدو مِنّو في بَحَر الأُرْدُنّ، و كانو يَطَلِّعو خَطاياهم.

⁶ و يُوحَنَّا كان يَلبَس هِدوم مِن شَعر الجَّمَل، و يَربُط حِزام مِن جِلد في وَسطو، و ياكُل جِراد و عَسَل الخَلا.

⁷ و كان بِبَشِّر و بِقول: ”بِجي واحِد بَعَدي قَوّي مِنّي، و أنا ما مُستَحِق أدَنقِر و أفِك رَباط جِزَمو.

⁸ أنا عَمَّدتَكُم بِالمويَه، لَكِن هو ماشي يَعَمِّدكُم بِالرّوح القُدُس.“

⁹ و في الأيام ديل، يَسُوع جا مِن نَاصِرَه الفي الجَّليل، و يُوحَنَّا عَمَّدو في الأُرْدُنّ.

¹⁰ و يَسُوع، لَمّا طَلَع مِن المويَه، طَوّالي شاف السَّما مَفتوحَه، و الرّوح نازِل زي حَمامَه فوقو.

¹¹ و صوت جا مِن السَّما و قال ليهو: ”إنتَ إبني الحَبيب، و أنا مَبسوط مِنَّك.“

¹² و طَوّالي، الرّوح قادو لِلخَلا.

¹³ و هو قَعَد في الخَلا أربَعين يوم، و الشّيطان كان بِجَرِّبو. و كان مَعَ حَيوانات الخَلا، و المَلائكَه كانَت تَخدِمو.

إختِيار أربَع تَلاميذ

¹⁴ و بَعَد ما يُوحَنَّا كان مَحبوس، يَسُوع جا لِلجَّليل، و بَشَّر بِإنجيل الله.

¹⁵ و قال: ”الوَكِت كِمِل، و مَلَكوت الله قَرَّب. توبو، و صَدِّقو بِالإنجيل.“

¹⁶ و وَكِت ما يَسُوع كان ماشي جَمب بَحَر الجَّليل، هو شاف سِمْعَان و أنْدَرَاوُس أخو سِمْعَان يَرمو الشَّبَكَه في البَحَر، فِشان هُم كانو صَيادين.

¹⁷ و يَسُوع قال ليهُم: ”تَعالو وَراي، و أنا بَعمِلكُم صَيادين النّاس.“

¹⁸ و طَوّالي خَلّو شَبَكاتُم و مَشو وَراهو.

¹⁹ و هو مَشى قِدّام شوَيَه، و شاف يَعْقُوب وَلَد زَبَدي و يُوحَنَّا أخوهو، و هُم كانو في مُركَبُم بِصَلِّحو شَبَكاتُم.

²⁰ و طَوّالي هو ناداهُم. و هُم سابو أبوهُم زَبَدي في المُركَب مَعَ الشَّغّالين، و مَشو وَراهو.

²¹ و مَشو لِكَفْرَنَاحُوم. و طَوّالي في يوم السَّبِت دَخَل بيت الرَّب و بِقى يَعَلِّم.

²² و إستَغرَبو مِن تَعليمو، عَلَشان هو كان يَعَلِّمُم زي واحِد عِندو سُلطَه، و ما زي مُعَلِّمين القانون.

²³ و طَوّالي كان في بيت الرَّب راجِل ليهو روح نَجِس.

²⁴ و هو كورَك، و قال: ”مالنا و مالَك، يا يَسُوع النّاصِري؟ إنتَ جيت عَشان تَخرِبنا؟ أنا عارِف مِنو إنتَ. إنتَ قُدّوس الله.“

²⁵ و لَكِن يَسُوع قال بِقُوَّه: ”أسكُت، و اطلَع مِنّو!“

²⁶ و روح النَّجِس هَزّو شَديد، و كورَك بِصوت عالي، و طَلَع مِنّو.

²⁷ و كُل النّاس إستَغرَبو جِدّاً جِدّاً، و إتكَلَّمو مَعَ بَعض و قالو: ”دا شِنو؟ تَعليم جَديد! بِسُلطَه هو يأمُر الأرواح النَّجسَه و هُم بِسمَعوهو.“

²⁸ و طَوّالي الخَبَر عَنّو مَشى لِكُلّو بِلاد الجَّليل.

²⁹ و طَوّالي مَرَقو مِن بيت الرَّب، و مَشو لِبيت سِمْعَان و أنْدَرَاوُس، مَعَ يَعْقُوب و يُوحَنَّا.

³⁰ و كانَت أُم مَرَة سِمْعَان راقدَه، عَيّانَه بِحُمَّه. و طَوّالي كَلَّموهو عَنّا.

³¹ و هو جا و مَسَكا بِإيدا و رَفَعا. و الحُمَّه فاتَت مِنَّها. و هي بِقَت تَخدِمُم.

³² و في المِسا، بَعَد المَغرِب، النّاس جابو ليهو كُل العَيّانين و كُل الفيهُم شياطين.

³³ و ناس البَلَد كُلُّهُم إتلَمّو عِند الباب.

³⁴ و هو شَفى ناس كُتار كانو عَيّانين بِأمراض مُختَلِفَه، و مَرَّق شياطين كَتيرَه. و ما خَلّى الشّياطين يِتكَلَّمو، فِشان هُم عِرفو هو مِنو.

³⁵ و يَسُوع قام بَدري في الصَّباح، و الواطَه لِسَّع ضُلُمَّه، و مَرَق و مَشى لِلخَلا. و صَلّى هِناك.

³⁶ و سِمْعَان و الكانو مَعاهو مَشو يَفَتِّشو عَليهو.

³⁷ و لَمّا لِقوهو، قالو ليهو: ”كُل النّاس يَفَتِّشو عَليك!“

³⁸ و هو قال ليهُم: ”خَلّينا نَمشي لِمَحَل تاني، لِلبِلاد القَريبَه، عَشان أبَشِّر هِناك كَمان. فِشان دا أنا جيت.“

³⁹ و مَشى في الجَّليل كُلَّها، و كان يَبَشِّر في بُيوت الرَّب و يَمَرِّق الشّياطين.

الرّاجِل العِندو الجِّزام

⁴⁰ و واحِد عِندو جِزام قَرَّب ليهو و طَلَب مِنّو، و رَكَع و قال ليهو: ”إذا إنتَ عاوِز، إنتَ تَقدَر تَنَضِّفني.“

⁴¹ و يَسُوع حَنَّه عَليهو، و مَدَّ إيدو و لِمسو، و قال ليهو: ”أنا عاوِز. كون نَضيف!“

⁴² و طَوّالي الجِّزام فات مِنّو، و هو بِقى نَضيف.

⁴³ و أمَرو بِشِدَّه و صَرَفو طَوّالي،

⁴⁴ و قال ليهو: ”شوف ما تَكَلِّم أي حاجَه لِأي زول أبَداً. لَكِن أمشي، و وَرّي نَفسَك لِلقَسّيس، و قَدِّم الضَّبيحَه عَلَشانَك بِقيت نَضيف، زي ما أمَر مُوسَى، عَشان شَهادَه لِلنّاس.“

⁴⁵ و لَكِن هو مَرَق و بِقى يَكَلِّم حاجات كَتيرَه عَنّو قِدّام النّاس، و يَخَبِّرُم. و كِدا يَسُوع ما كان بِقدَر يَدخُل مَدينَه، لَكِن قَعَد في الخَلا. و النّاس جو ليهو مِن كُلّو مَحَل.