مَتَّى 8 - كِتاب العَهد الجَّديد مِن الكِتاب المُقَدَّس

الرّاجِل العِندو جِزام

¹ و لَمّا نَزَل مِن الجَّبَل، ناس كَتيرين تِبِعوهو.

² و شوف! واحِد عِندو الجِّزام قَرَّب ليهو و رَكَع قِدّامو و قال: ”يا رَب، إذا عاوِز، تَقدَر تَنَضِّفني.“

³ و يَسُوع مَدَّ إيدو و لَمَسو و قال: ”أنا عاوِز. كون نَضيف.“ و طَوّالي بِقى نَضيف مِن جِزامو.

⁴ و يَسُوع قال ليهو: ”شوف ما تَقول حاجَه لِأي واحِد. و لَكِن أمشي، وَرّي نَفسَك لِلقَسّيس، و قَدِّم الهَدِيَّه الأمَر بيها مُوسَى زي شَهادَه ليهُم.“

إيمان رَئيس الجّيش

⁵ و لَمّا دَخَل كَفْرَنَاحُوم، رَئيس الجّيش قَرَّب ليهو و طَلَب مِنّو

⁶ و قال: ”يا رَب، خَدّامي راقِد في البيت و هو مَفلوج، و عِندو وَجَع شَديد.“

⁷ و يَسُوع قال ليهو: ”أنا بَجي و بَشفيهو.“

⁸ و لَكِن رَئيس الجّيش رَدَّ عَليهو و قال: ”يا رَب، أنا ما عِندي شَرَف كِفايَه عَشان إنتَ تَدخُل تِحِت راس بيتي. لَكِن قول كِلمَه بَس، و خَدّامي بِكون طَيب.

⁹ عَشان أنا كَمان راجِل تِحِت السُّلطَه، و عِندي عَساكِر تِحِت سُلطَتي. أقول لِدا: أمشي، و هو يَمشي، و لِتاني: تَعال، و هو يَجي، و لِخَدّامي: أعمِل دا، و هو يَعمِلو.“

¹⁰ و لَمّا يَسُوع سِمِعو، إستَغرَب، و قال لِلنّاس الكانو يَتبَعوهو: ”الحَق أقول ليكُم، أنا ما لِقيت و لا واحِد في إِسْرَائِيل عِندو إيمان زي دا.

¹¹ و أقول ليكُم، ناس كُتار بِجو مِن الشَّرق و مِن الغَرب و بِيَقعُدو مَعَ إِبْرَاهِيم و إِسْحَاق و يَعْقُوب في مَلَكوت السَّما.

¹² و لَكِن أولاد المَلَكوت، بِرموهُم بَرَّه في الضُّلُمَّه. هِناك بِيَبكو و بِعَضّو الأسنان.“

¹³ بَعدين يَسُوع قال لِرَئيس الجّيش: ”أمشي. بِكون ليك زي ما صَدَّقتَ.“ و الخَدّام بِقى طَيب في نَفس الوَكِت دا.

¹⁴ و لَمّا يَسُوع جا لِبيت بُطْرُس، شاف أُم المَرَه بِتاعَت بُطْرُس راقدَه في السَّرير و عِندَها حُمَّه.

¹⁵ و لَمَس إيدا، و الحُمَّه خَلَّتا. و هي قامَت و بِقَت تَخدِمو.

¹⁶ و في المِسا جابو ليهو كَتيرين كانو بيهُم شياطين. و هو طَلَّع الشّياطين بِكِلمَه، و شَفى كُل العَيّانين،

¹⁷ عَشان يَتِم الكَلام القالو النَّبي إِشَعْيَاء: ”هو أخَد كُلّو حاجَه البِتخَلّينا ضَعيفين، و شال العَيى بِتاعَتنا.“

¹⁸ و لَمّا يَسُوع شاف ناس كُتار حَولو، أمَرُم يَمشو لِطَرف البَحَر بِجاي.

¹⁹ و مُعَلِّم القانون قَرَّب ليهو و قال: ”يا مُعَلِّم، أنا بَتبَعَك لِأي مَحَل الأنتَ تَمشي ليهو.“

²⁰ و يَسُوع قال ليهو: ”التَّعالِب عِندَهُم مَحَلّات النّوم، و طُيور السَّما عِندَهُم مَحَلّات كَمان، لَكِن إبن الإنسان ما عِندو مَحَل يَخُت رَاسو فيهو.“

²¹ و زول تاني مِن تَلاميذو قال ليهو: ”يا رَب، خَلّيني أمشي في الأوَّل و أدفِن أبوي.“

²² و لَكِن يَسُوع قال ليهو: ”أتبَعني، و خَلّي المَيِّتين يَدفِنو مَيِّتينُم.“

يَسُوع يَسَكِّت الهَبوب

²³ بَعدين دَخَل المُركَب، و تَلاميذو تِبِعوهو.

²⁴ و شوف! جات هَبوب شَديدَه في البَحَر لِغايَة ما المويَه مَشَت فوق المُركَب. لَكِن يَسُوع كان نايِم.

²⁵ و التَّلاميذ قَرَّبو ليهو و قَوَّمو مِن النّوم و قالو: ”خَلِّصنا، يا رَب. نِحنا ماشين نَموت!“

²⁶ و هو قال ليهُم: ”يا ناس الإيمانكُم ناقِص، إنتو خايفين لِشِنو؟“ بَعدين قام و أمَر الهَبوب و البَحَر بِشِدَّه، و هُم سَكَتو بِالتَّمام.

²⁷ و النّاس إستَغرَبو و قالو: ”مِنو الإنسان دا؟! لِغايَة الهَبوب و البَحَر يَسمَعو لِكَلامو!“

²⁸ و لَمّا وِصِل لِلطَّرف التّاني في بَلَد الجَدَريّين، راجلين الكانو فيهُم شياطين قابَلوهو، و هُم جايين مِن القُبور. و كانو مِتوَحِّشين خالِص. عَلَشان كِدا، ما في واحِد كان بِقدَر بِفوت بِالسِّكَّه ديك.

²⁹ و شوف! كورَكو و قالو: ”إنتَ عاوِز شِنو مَعانا، يا إبن الله؟ جيت هِنا عَشان تَتَعِّبنا قُبّال الوَكِت؟“

³⁰ و كان بَعيد مِنَّهُم مُراح كَداريك كَتيرَه بياكُل.

³¹ و الشّياطين طَلَبو مِن يَسُوع و قالو: ”إذا كان تَطرُدنا، رَسِّلنا لِمُراح الكَداريك.“

³² و قال ليهُم: ”أمشو!“ عَشان كِدا، طَلَعو و دَخَلو في الكَداريك. و شوف! المُراح كُلّو وَقَع مِن الطَّرف لِلبَحَر، و مات في المويَه.

³³ لَكِن الرُّعاه هَرَبو، و مَشو لِلمَدينَه و خَبَّرو بِكُلّو شي، و بِكُلّو شي الحَصَل لِلرُّجال الكانو فيهُم الشّياطين.

³⁴ و شوف! كُلّو ناس البَلَد مَرَقو عَشان يَقابِلو يَسُوع. و لَمّا شافوهو، طَلَبو مِنّو يَسيب بَلَدُم.