مَتَّى 6 - كِتاب العَهد الجَّديد مِن الكِتاب المُقَدَّس

الهَدايا، الصَّلاه و الصّوم

¹ خَلّو بالكُم عَشان ما تَعمِلو الشُّغل الكَويس قِدّام النّاس عَشان بِشوفوكُم، عَشان كان تَعمِلو كِدا، ما بِتكون عِندَكُم أُجرَه مِن أبوكُم الفي السَّما.

² و كِدا، لَمّا تَدّي لِلمَساكين، ما تَضرُب قِدَّامَك بِالبوق زي ما يَعمِلو المُنافِقين في بِيوت الرَّب و في السِّكَك، عَشان النّاس بِشكُروكُم. بِالحَق أقول ليكُم، هُم اَخَدو الأُجرَه بِتاعَتُم.

³ و لَكِن إنتَ لَمّا تَدّي حاجَه لِلمَساكين، ما تَخَلّي شِمالَك تَعرِف الشُّغل اليَمينَك بِتَعمِل،

⁴ عَلَشان الأنتَ تَدّيهو يَكون بِالسِّر. و أبوك اليَشوف في السِّر بِرَجِّع ليك كوَيس.

⁵ و لَمّا تَصَلّو، ما تَكونو زي المُنافِقين، عَلَشان هُم بِحِبّو يَصَلّو واقفين في بِيوت الرَّب و في مَحَل فاضي جَمب السِّكَك عَشان النّاس يَشوفوهُم. بِالحَق أقول ليكُم، هُم اَخَدو الأُجرَه بِتاعَتُم.

⁶ و لَكِن إنتَ لَمّا تَصَلّي، أدخُل بيتَك، و أقفِل بابَك، و صَلّي لِأبوك الفي السِّر. و أبوك اليَشوف في السِّر بِرَجِّع ليك كوَيس.

⁷ و في صَلَواتكُم، ما تِتكَلَّمو كَلام كَتير ساكِت زي ما يَعمِلو ناس الدُّنيا، عَلَشان يَفتَكِرو الله يَسمَعُم بِكَلامُم الكَتير.

⁸ ما تَكونو زيَهُم، عَشان أبوكُم يَعرِف التَحتاجو ليهو قُبّال ما تَطلُبوهو.

⁹ عَشان كِدا صَلّو زي دا: أبونا الفي السَّما، خَلّي إسمَك يَكون قُدّوس.

¹⁰ خَلّي مَلَكوتَك بِجي. خَلّي إرادَتَك تَكون في الدُّنيا زي ما تَكون إرادَتَك في السَّما.

¹¹ النَّهار دا أدّينا العيش اليومي بِتاعنا.

¹² و أغفِر لينا خَطايانا زي ما نِحنا كَمان غَفَرنا لِليَخطو لينا.

¹³ و ما تَدَخِّلنا في تَجرِبَه، و لَكِن خَلِّصنا مِن الشَّرّير.

¹⁴ عَلَشان إذا تَغفِرو لِلنّاس خَطاياهم، أبوكُم الفي السَّما بِغفِر ليكُم كَمان.

¹⁵ و لَكِن إذا ما تَغفِرو لِلنّاس خَطاياهم، أبوكُم كَمان ما بِغفِر ليكُم خَطاياكُم.

¹⁶ و لَمّا تَصومو، ما تَوَرّو نُفوسكُم زي ناس تَعبانين، زي ما يَعمِلو المُنافِقين، عَشانُم بِغَيِّرو وَشُّم عَشان النّاس بِشوفو إنَّهُم يَصومو. بِالحَق أقول ليكُم، عِندَهُم أُجرَتُم.

¹⁷ و لَكِن لَمّا إنتَ تَصوم، أمسَح راسَك و غَسِّل وَشَّك،

¹⁸ عَشان النّاس ما بِشوفو إنتَ تَصوم، و لَكِن أبوك الفي السِّر بِشوف. و أبوك البِشوف في السِّر بِدّيك أُجرَه.

كُنوز في السَّما

¹⁹ ما تَخزِنو لِنُفوسكُم حاجات غاليَه عَلى الأرض، المَكان الفيهو السّوس و الصَّدا ياكلوها، و الحَراميَه يدخُلو بِالقُوَّه و يَسرِقو.

²⁰ و لَكِن أخزِنو لِنُفوسكُم حاجات غاليَه في السَّما، المَكان الفيهو السّوس و الصَّدا ما ياكلوها، و الحَراميَه ما يدخُلو بِالقُوَّه و يَسرِقو.

²¹ عَشان المَكان الفيهو حاجاتكُم الغاليَه، هِناك قَلبَك بِكون في كَمان.

²² لَمبَت الجِّسم، هي العين. عَشان كِدا إذا كان عينَك بَسيطَه، جِسمَك كُلّو يَكون مَليان نور.

²³ و لَكِن إذا كان عينَك ما بَسيطَه، جِسمَك كُلّو يَكون مَليان ضَلام. و كِدا، إذا كان النّور العِندَك بِكون ضَلام، كَم بِكون الضَّلام.

²⁴ واحِد ما يَقدَر يَخدِم سَيِّدين، عَشان يا بِكرَه الواحِد و بِحِب التّاني، ولّا بِمسِك الواحِد و بيابا التّاني. ما تَقدَرو تَخدِمو الله و المال.

²⁵ عَلَشان كِدا أقول ليكُم، ما تَفَكِّرو كَتير لِحَياتكُم، بِتاكلو شِنو و بِتَشرَبو شِنو، ولّا لِأجسامكُم، بِتَلبَسو شِنو. الحَياة مُش أحسَن مِن الأكل؟ و الجِّسم مُش أحسَن مِن الهِدوم؟

²⁶ شوفو طُيور السَّما، هُم ما بِزرَعو و ما بِقطَعو الدُّرَه، و ما بِلِمّو في المَخازِن، و لَكِن أبوكُم الفي السَّما يَدّيهو أكِل. إنتو ما أحسَن مِنَّهُم بِكَتير؟

²⁷ و مِنو مِنَّكُم إذا بِفَكِّر كَتير يَقدَر يَزيد طول حَياتو بِدَقيقَه واحدَه؟

²⁸ و لِشِنو تَفَكِّرو كَتير في الهِدوم؟ شوفو زُهور الخَلا كيف بِقومو. ما بِتعَبو و ما يَخَيِّطو.

²⁹ و لَكِن أقول ليكُم، سُلَيْمَان نَفسو في كُلّو مَجدو ما كان يَلبَس هِدوم زي واحدَه مِن ديل.

³⁰ و لَكِن إذا كان الله يَلَبِّس زي دا قَش الخَلا، اليَكون في النَّهار دا و بُكرَه بِرموهو في الفُرن، كيف ما داير أكتَر أن يَلَبِّسكُم إنتو، يا قَليلين الإيمان؟

³¹ عَلَشان كِدا، ما تَفَكِّرو كَتير و تَقولو: ناكُل شِنو؟ ولّا: نَشرِب شِنو؟ ولّا: نَلبَس شِنو؟

³² عَلَشان ناس الدُّنيا يَفَتِّشو عَلى كُل الحاجات ديل. و أبوكُم الفي السَّما بِيَعرِف إنتو تَحتاجو لِديل كُلّو.

³³ لَكِن في الأوَّل، أطلُبو مَلَكوت الله و بِرّو، و كُل الحاجات ديل بِجوكُم زِيادَه.

³⁴ عَلَشان كِدا ما تَفَكِّرو كَتير بِبُكرَه، عَشان بُكرَه بِتِتفَكَّر بِنَفسا. خَلّي هُموم اليوم تَكون كِفايَه لِليوم.