مَتَّى 5 - كِتاب العَهد الجَّديد مِن الكِتاب المُقَدَّس

البَرَكات

¹ و لَمّا شاف الجَّمَع، طَلَع فوق الجَّبَل. و لَمّا قَعَد، تَلاميذو قَرَّبو ليهو.

² و هو فَتَح خَشمو و إبتَدا يَعَلِّمُم و يَقول:

³ ”مُبارَكين المَساكين بِالرّوح، عَشان ليهُم مَلَكوت السَّما.

⁴ مُبارَكين الحَزنانين، عَشانُم بِكونو مَبسوطين.

⁵ مُبارَكين الوُدَعاء عَشان هُم بِيورَثو الدُّنيا.

⁶ مُبارَكين الجَّعانين و العَطشانين لِلبِر عَشانُم بِكونو شَبعانين.

⁷ مُبارَكين اليَرحَمو التّانيين، عَشان هُم يَلقو الرَّحمَه.

⁸ مُبارَكين النُّضاف القَلب، عَشانُم بِشوفو الله.

⁹ مُبارَكين اليَعمِلو السَّلام، عَشان بِسَمّوهُم أولاد الله.

¹⁰ مُبارَكين المَطرودين عَلَشان البِر، عَشان ليهُم مَلَكوت السَّما.

¹¹ مُبارَكين إنتو لَمّا يَشتِموكُم و يَطرُدوكُم و يَقولو كُلّو كِلمَه بَطّالَه عَليكُم عَشانّي بِالكِضِب.

¹² أفرَحو و كونو مَبسوطين، عَشان أُجرَتكُم كَبيرَه في السَّما. عَشان النّاس كِدا طَرَدو الأنبياء الكانو قُبّالكُم.

مِلِح و نور

¹³ إنتو مِلِح الدُّنيا. و لَكِن إذا المِلِح بِقى مَسيخ، كيف بِكون مالِح تاني؟ ما في فايدَه مِنّو لِأي شي إلّا يَرموهو بَرَّه و النّاس يَدوسوهو.

¹⁴ إنتو نور الدُّنيا. ما مُمكِن يَدِسّو مَدينَه مَوجودَه فوق جَبَل،

¹⁵ ولّا يَوَلِّعو لَمبَه و يَخُتّا تِحِت القُفَّه، لَكِن بِخُتّوها فوق طَرَبيزَة اللَّمبَه، و هي تَنَوِّر لِكُلّو واحِد في البيت.

¹⁶ خَلّو نُوركُم يَنَوِّر كِدا قِدّام النّاس، عَشان يَشوفو أعمالكُم الكوَيسَه، و يَدّو مَجد لِأبوكُم الفي السَّما.

تَعليم عَن القانون

¹⁷ ما تَفتَكِرو أنا جيت عَشان أخرَب القانون، ولّا الأنبياء. ما جيت عَشان أخرَبُم، لَكِن عَشان أتِمُّم.

¹⁸ بِالحَق أنا أقول ليكُم، لِغايَة ما تَفوت السَّما و الأرض، ما يَفوت حَرف واحِد ولّا نُقطَه واحدَه مِن القانون لِغايَة ما الكُل بِتِم.

¹⁹ البِخرَب واحِد مِن أصغَر القَوانين ديل و يَعَلِّم النّاس كِدا، بِيَحسِبوهو أصغَر واحِد في مَلَكوت السَّما. و لَكِن اليَعمِل و يَعَلِّمُم، بِيَحسِبوهو كَبير في مَلَكوت السَّما.

²⁰ عَشان أقول ليكُم، لِغايَة ما بِرَّكُم بِفوت بِر مُعَلِّمين القانون و بِر الفَرِّيسِيِّين، ما تَدخُلو مَلَكوت السَّما أبَداً.

²¹ سِمِعتو هُم قالو لِلنّاس الكانو مِن زَمان: ما تَكتُل. و البِكتُل، هو قَرَّب لِلحُكم.

²² و لَكِن أنا أقول ليكُم، كُل اليَزعَل عَلى أخوهو، هو قَرَّب لِلحُكم. و اليَقَول لِأخوهو: يا بَليد، هو قَرَّب لِلمَجِلس. و اليَقول: يا غَشيم، هو قَرَّب لِنار جَهَنَّم.

²³ عَلَشان دا، إذا إنتَ بِتجيب هَديتَك لِمَحَل الضَّبيحَه، و إنتَ هِناك تِتزَكَّر أخوك عِندو كَلام مَعاك،

²⁴ خَلّي هَديتَك هِناك قِدّام مَحَل الضَّبيحَه. في الأوَّل، أمشي و صالِح مَعَ أخوك، و بَعدين تَعال و قَدِّم هَديتَك.

²⁵ إتَّفَق قَوام مَعَ العَدو بِتاعَك و إنتَ مَعاهو في السِّكَّه، عَلَشان العَدو بِتاعَك ما يَسَلِّمَك لِلقاضي، و القاضي يَسَلِّمَك لِلظّابِط و يَرموك في السِّجِن.

²⁶ بِالحَق أقول ليك، إنتَ ما بِتَمرُق مِن هِناك أبَداً لِغايَة ما تَدفَع آخِر مِليم.

²⁷ سِمِعتو هُم قالو: ما تَعمِل الزِّنا.

²⁸ و لَكِن أنا أقول ليكُم، كُل اليَعاين لِمَرَه بِفِكر بَطّال عَمَل زِنا مَعاها خَلاص في قَلبو.

²⁹ كان عينَك اليَمين تَكون سَبَب خَطيَّه ليك، طَلِّعا و أرميها مِنَّك، عَشان أحسَن ليك أن واحِد عُضو مِن جِسمَك يِتوَدَّر، و هُم ما يَرمو جِسمَك كُلّو في جَهَنَّم.

³⁰ و إذا إيدَك اليَمين تَكون سَبَب خَطيَّه ليك، أقطَعا و أرميها مِنَّك، عَشان أحسَن ليك أن واحِد عُضو مِن جِسمَك يِتوَدَّر، و جِسمَك كُلّو ما بِكون في جَهَنَّم.

³¹ قالو كَمان: البِطَلِّق مَرَتو، خَليهو يَدّيها شَهادَة الطّلاق.

³² و لَكِن أنا أقول ليكُم، كُلّو واحِد بِطَلِّق مَرَتو إلّا بِسَبَب الزِّنا، يَعمِلا تَسَوّي الزِّنا، و البِتزَوَّج المَرَه المَطَلَّقَه يَعمِل الزِّنا.

³³ كَمان سِمِعتو هُم قالو لِلنّاس الكانو مِن زَمان: ما تَحلِف بِالكِضِب، لَكِن أعمِل لِلرَّب زي ما إنتَ حَلَفتَ.

³⁴ و لَكِن أنا أقول ليكُم، ما تَحلِفو أبَداً، ما بِالسَّما عَشان هي كُرسي الله،

³⁵ ولّا بِالأرض عَشان هي بَمبَر كُراعو، ولّا بِأُورُشَلِيم عَشان هي مَدينَة المَلِك الكَبير.

³⁶ و ما تَحلِف بِراسَك، عَشان إنتَ ما تَقدَر تَعمِل شَعرَه واحدَه بيضَة ولّا سودَه.

³⁷ خَلّي كَلامكُم بِكون أيوَه ولّا لا بَس. و الأكتَر مِن داك، هو مِن الشَّرّير.

³⁸ سِمِعتو هُم قالو: عين بِعين و سِن بِسِن.

³⁹ و لَكِن أنا أقول ليكُم، ما تَشاكِلو زول بَطّال. و لَكِن إذا أي واحِد يَضرُبَك في وَشَّك اليَمين، أقلِب ليهو التّاني كَمان.

⁴⁰ و كان أي واحِد عاوِز يَرفَع قَضيَّه عَليك و ياخُد قَميصَك، أَدِّي ليهو التّوب كَمان.

⁴¹ و إذا أي واحِد عَاوِزَك تَمشي مَعاهو واحِد ميل بِقُوَّه، أمشي مَعاهو إتنين.

⁴² اليَطلُب مِنَّك، أدّيهو، و العاوِز يَستَلِف مِنَّك، ما تابا.

⁴³ سِمِعتو هُم قالو: تَحِب القَريب ليك و تَكرَه العَدو بِتاعَك.

⁴⁴ و لَكِن أنا أقول ليكُم، حِبّو عُدوانكُم و صَلّو عَشان اليَطرُدوكُم،

⁴⁵ عَشان تَكونو أولاد أبوكُم الفي السَّما. عَلَشان هو يَعمِل شَمسو تَطلَع عَلى البَطّالين و الكوَيسين، و يَرَسِّل المَطَر عَلى البارين و الشَّرّيرين.

⁴⁶ فِشان إذا إنتو بِتحِبّو البِحِبّوكُم، الأُجرَه بِتاعَتكُم شِنو؟ النّاس البِلِمّو الطُلبَه ما يَعمِلو زي دا كَمان؟

⁴⁷ و إن كان تَسَلِّمو عَلى أخوانكُم بَس، كيف تَعمِلو أحسَن مِن التّانيين؟ ناس الدُّنيا ما يَعمِلو زي دا كَمان؟

⁴⁸ عَلَشان كِدا، كونو كامِلين زي ما أبوكُم الفي السَّما هو كامِل.