مَتَّى 4 - كِتاب العَهد الجَّديد مِن الكِتاب المُقَدَّس

تَجرِبَة يَسُوع

¹ بَعدين الرّوح ساق يَسُوع لِلخَلا عَلَشان إبْلِيس يَجَرِّبو.

² و بَعَد ما صام أربَعين يوم و أربَعين ليلَه، هو كان جَعان.

³ و المُجَرِّب قَرَّب ليهو و قال: ”إذا إنتَ إبن الله، أَدِّي أمر لِلحُجار ديل أن يَبقو عيش.“

⁴ لَكِن هو رَدَّ و قال ليهو: ”مَكتوب في الكِتاب: الإنسان ما يَعيش بِالعيش بَس، لَكِن بِكُلّو كِلمَه البِتَطلَع مِن خَشم الله.“

⁵ بَعدين إبْلِيس اَخَدو لِلمَدينَه المُقَدَّسَه، و خَتّاهو فوق مَحَل عالي في الهيكَل.

⁶ و قال ليهو: ”إذا إنتَ إبن الله، أرمي نَفسَك لِتِحِت، عَلَشان مَكتوب: يأمُر مَلائكَتو بِخُصوصَك، و مَكتوب، هُم بِرفَعوك عَلى إيدينُم، عَشان رِجلَك ما تَدُق حَجَر.“

⁷ يَسُوع قال ليهو: ”مَكتوب كَمان: ما تَجَرِّب الرَّب إلَهَك.“

⁸ مَرَّه تانيَه إبْلِيس اَخَدو لِجَبَل عالي جِدّاً و وَرّاهو مَمالِك الدُّنيا كُلَّها و المَجد بِتاعتا.

⁹ و قال ليهو: ”بَدّيك كُلّو دا إذا بِتَركَع و بِتَعبُدني.“

¹⁰ بَعدين يَسُوع قال ليهو: ”أمشي، يا شيطان، عَشان مَكتوب: أعبُد الرَّب إلَهَك، و إشتَغِل ليهو بَس.“

¹¹ بَعدين إبْلِيس سابو. و شوف، مَلائكَه جو و ساعَدوهو.

يَسُوع يَبتَدي يَبَشِّر

¹² و لَمّا يَسُوع سِمِع أن يُوحَنَّا كان مَحبوس، مَشى مِنَّهُم لِلجَّليل.

¹³ و خَلّى النّاصِرَه، و مَشى و قَعَد في كَفْرَنَاحُوم الجَّمب البَحَر في طَرف زَبولون و نَفتالي،

¹⁴ عَشان يَتِم الكَلام القالو النَّبي إِشَعْيَاء:

¹⁵ ”أرض زَبولون و أرض نَفتالي، طَريق البَحَر، الطَّرف التّاني مِن الأُرْدُنّ، جَليل ناس الدُّنيا.

¹⁶ النّاس الكانو قاعِدين في الضَّلام شافو نور كَبير، و لِلقَاعِدين في مَحَل الموت و ضُلّو، النّور إتنَوَّر.“

¹⁷ مِن الوَكِت داك يَسُوع إبتَدا يَبَشِّر، و يَقول: ”توبو، علشان مَلَكوت السَّما قَريب.“

إختِيار التَّلاميذ الأوَّلانيين

¹⁸ و وَكِت ما يَسُوع كان ماشي عِند بَحَر الجَّليل، شاف أخوين، سِمْعَان الإسمو بُطْرُس، و أنْدَرَاوُس أخوهو. كانو يَرمو شَبَكَه في البَحَر، فِشان كانو صَيادين.

¹⁹ و هو قال ليهُم: ”تَعالو وَراي و أنا بَعمِلكُم صَيادين النّاس.“

²⁰ طَوّالي خَلّو شَبَكاتُم و تِبِعوهو.

²¹ و مَشى مِن هِناك و شاف أخوين تانيين، يَعْقُوب إبن زَبَدي و يُوحَنَّا أخوهو، في المُركَب مَعَ زَبَدي أبوهُم. كانو قاعِدين بِصَلِّحو شَبَكاتُم. و هو ناداهُم.

²² طَوّالي خَلّو مُركَبُم و أبوهُم، و تِبِعوهو.

يَسُوع يَشفي العيانين

²³ و يَسُوع كان ماشي في كُل الجَّليل، و بِعَلِّم في بِيوت الرَّب، و بِبَشِّر بِشارات المَلَكوت، و يَشيل كُلّو عَيى مِنَّهُم و كُلّو ضُعف في وَسط النّاس.

²⁴ و الخَبَر عَنّو مَشى لِكُلّو سُورِيَّه. و جابو ليهو كُل العَيّانين، و العِندَهُم أمراض مِن كُلّو نوع، و أوجاع، و الفيهُم شياطين، و النّاس العِندَهُم العَيى البِرميهُم، و المَفلوجين. و عَمَلُم طَيبين.

²⁵ و ناس كَتيرين تِبِعوهو مِن الجَّليل و العَشَرَه مُدُن، و أُورُشَلِيم و اليَهُودِيَّه و مِن فوق الأُرْدُنّ.