مَتَّى 3 - كِتاب العَهد الجَّديد مِن الكِتاب المُقَدَّس

يُوحَنَّا المَعمَدان يَجَهِّز السِّكَّه

¹ و في الأيام ديلاك، يُوحَنَّا المَعمَدان جا يَبَشِّر في خَلا اليَهُودِيَّه

² و يَقول: ”توبو، فِشان مَلَكوت السَّما قَريب.“

³ فِشان دا هو الكَلام النَّبي إِشَعْيَاء قال بِخُصوصو: ”صوت البِكورِك في الخَلا: حَضِّرو طَريق الرَّب، أعمِلو السِّكَك بِتاعتو دُغري.“

⁴ و يُوحَنَّا كان لابِس توب مِن شَعر الجَّمَل، و في وَسطو حِزام مِن جِلِد. و الأكل بِتاعو كان جَراد و عَسَل مِن الغابَه.

⁵ في الوَكِت دا، ناس أُورُشَلِيم و ناس مِن كُل اليَهُودِيَّه و مِن كُلّو مَحَل قَريب مِن بَحَر الأُرْدُنّ مَرَقو

⁶ و إتعَمَّدو مِنّو في الأُرْدُنّ. و كانو يَخَبِّرو بِخَطاياهم.

⁷ و لَمّا شاف كَتير مِن الفَرِّيسِيِّين و الصَّدّوقيين قاعِدين يَجو لِلمَعموديَّه، يُوحَنَّا قال ليهُم: ”يا أولاد الدَّبايب، مِنو خَبَّركُم بِالخَطَر عَشان تَجرو مِن الزَّعل الجّاي؟

⁸ أعمِلو الحاجات البِوَرّو النّاس إنتو تُبتو.

⁹ و ما بِتَفتَكِرو تَقولو في نُفوسكُم: أبونا هو إِبْرَاهِيم. عَشان أقول ليكُم: الله يَقدَر يَطَلِّع أولاد لِإِبْرَاهِيم مِن الحُجار ديل.

¹⁰ و هَسَّع دي خَتّو الفاس عَلى عِرق الشَّجَر. كُلّو شَجَرَه الما تَجيب ثِمار سَمِح، بِقطَعوها و بِرموها في النّار.

¹¹ أنا بَعَمِّدكُم بِمويَه لِلتّوبَه. و لَكِن هو البِجي بَعَدي قَوّي مِنّي. و أنا ما كوَيس حَتّى أشيل جِزَمو. هو بِعَمِّدكُم بِالرّوح القُدُس و النّار.

¹² مُضراياتو في إيدو، و هو بِنَضِّف أرضو، و بِلِم دُرَتو في المَخزَن، و لَكِن القِشر مِن الدُّرَه بِحرِقو بِالنّار الما بِتموت.“

مَعموديَّة يَسُوع

¹³ بَعَد دا، يَسُوع جا مِن الجَّليل لِلأُرْدُنّ لِيُوحَنَّا عَشان يِتعَمَّد مِنّو.

¹⁴ و لَكِن يُوحَنَّا مَنَعو و قال: ”أنا لازِم أتعَمَّد مِنَّك إنتَ، و إنتَ تَجي لَي؟“

¹⁵ لَكِن يَسُوع رَدَّ و قال ليهو: ”خَليهو يَكون كِدا هَسَّع، عَشان دا موافِق أن نَتِم كُلّو بِر.“ بَعَد دا هو أدّاهو إذِن.

¹⁶ و لَمّا يُوحَنَّا عَمَّد يَسُوع، هو طَلَع طَوّالي مِن المويَه. و شوف، السَّما إنفَتَحَت، و هو شاف روح الله نازِل زي حَمامَه، و جاي فوقو.

¹⁷ و شوف، جا صوت مِن السَّما و قال: ”دا هو إبني الحَبيب، و أنا مَبسوط بيهو.“