مَتَّى 25 - كِتاب العَهد الجَّديد مِن الكِتاب المُقَدَّس

مَثَل العَشَرَه بَنات

¹ في الوَكِت دا، مَلَكوت السَّما بِكون زي عَشَرَه بَنات اَخَدو لَمباتُم، و مَشو يَقابِلو العَريس.

² خَمسَه مِنَّهُم بَليدات، و خَمسَه مِنَّهُم شاطرات.

³ كِدا، لَمّا البَليدات اَخَدو لَمباتُم، ما اَخَدو زيت مَعاهُم.

⁴ و لَكِن الشّاطرات اَخَدو زيت في عِلبَه مَعَ لَمباتُم.

⁵ و العَريس إتأخَّر، و كُلَّهُم بِقو تَعبانات و نامو.

⁶ و في نُص اللّيل، كان في كوراك: أهو دا العَريس! تَعالو قابِلوهو.

⁷ بَعدين كُل البَنات قامو و جَهَّزو لَمباتُم.

⁸ البَليدات قالو لِلشّاطرات: أدّو لينا مِن جازكُم، عَشان لَمباتنا بِموتو.

⁹ و لَكِن الشّاطرات قالو ليهُم: لا، يِمكِن ما بِكون كِفايَه لينا و ليكُم كَمان. و لَكِن أمشو لِلتُّجّار، و إشتَرو لِنُفوسكُم.

¹⁰ و وَكِت ما مَشو يَشتَرو، العَريس وِصِل. و البَنات الجّاهِزات، دَخَلو مَعاهو لِلعِرِس. و الباب كان مَقفول.

¹¹ بَعدين التّانيات جو كَمان، و قالو: يا سَيِّد، يا سَيِّد، أفتَح لينا!

¹² و لَكِن هو رَدَّ عَليهُم و قال: أقول ليكُم الحَق، أنا ما عارِفكُم.

¹³ عَشان دا، خَلّو بالكُم، عَشان إنتو ما عارفين اليوم ولّا السّاعَه.

مَثَل التّلاتَه خَدّامين

¹⁴ عَشان بِكون زي راجِل مَسافِر. و نادى خَدّامينو و سَلّم ليهُم أموالو.

¹⁵ و أدّا لِواحِد خُمسُمِيَّة جِنيه، و لِتاني ميتين جِنيه، و لِتاني مِيَّة جِنيه، زي ما كُلّو واحِد عِندو قُدرَه. بَعدين هو سافَر.

¹⁶ و هو القِبِل الخُمسُمِيَّة جِنيه مَشى طَوّالي و إشتَرى و تاجَر بيهو، و زادو بِخُمسُمِيَّة جِنيه تاني.

¹⁷ و كِدا، الأخَد الميتين جِنيه زادو بِميتين تاني.

¹⁸ و لَكِن الأخَد المِيَّة جِنيه، مَشى و حَفَر في الأرض و دَسَّ فِضَّة سيدو.

¹⁹ و بَعَد وَكِت طَويل، سيد الخَدّامين ديلاك رَجَع و عَمَل الحِساب مَعاهُم.

²⁰ و الأخَد الخُمسُمِيَّة جِنيه قَرَّب ليهو و جاب خُمسُميَّه تانيَه و قال: يا سَيِّد، سَلَّمتَ لَي خُمسُمِيَّة جِنيه. و أهي دي خُمسُميَّه تانيَه الأنا زِدتا فوقا.

²¹ و سيدو قال ليهو: عَمَلتَ كوَيس، يا الخَدّام الطَّيب الأمين. كُنتَ أمين في القَليل. كِدا بَعمِلَك مَسؤول عَلى الكَتير. أدخُل لِفَرَح سيدَك.

²² بَعدين الأخَد المِيَّتين جِنيه قَرَّب ليهو و قال: يا سَيِّد، سَلَّمتَ لَي ميتين جِنيه. أهي دي ميتين تانيَه الأنا زِدتَ فوقا.

²³ و سيدو قال ليهو: عَمَلتَ كوَيس، يا الخَدّام الطَّيب الأمين. كُنتَ أمين في القَليل. كِدا بَعمِلَك مَسؤول عَلى الكَتير. أدخُل لِفَرَح سيدَك.

²⁴ بَعدين القِبِل المِيَّة جِنيه قَرَّب ليهو كَمان و قال: يا سَيِّد، عِرِفتَ إنتَ راجِل شَديد، و تَقطَع في المَحَل الأنتَ ما زَرَعتَ فيهو، و تَلِم في المَحَل الأنتَ ما رَميت فيهو التّيراب.

²⁵ كِدا، أنا كُنتَ خايِف، و مَشيت و دَسيت المِيَّة جِنيه في الأرض. شوف، أهو دا حَقَّك.

²⁶ و سيدو رَدَّ عَليهو و قال: يا الخَدّام الشَّرّير الكَسلان! عِرِفتَ أنا بَقطَع في المَحَل الأنا ما زَرَعتَ فيهو، و بَلِم في المَحَل الأنا ما رَميت فيهو التّيراب؟

²⁷ عَشان دا، كان لازِم إنتَ تَسَلِّم فِضَّتي لِلبَنك، عَشان لَمّا أنا جيت، كُنتَ قِبِلتَها مَعَ رِبِح.

²⁸ أُخدو مِنّو المِيَّة جِنيه، و أدّيهو لِلعِندو الألف جِنيه.

²⁹ عَشان لِكُلّو واحِد العِندو يَدُّوهو، و بِكون ليهو كَتير. و لَكِن الما عِندو بياخُدو مِنّو العِندو.

³⁰ و لَكِن الخَدّام البَطّال، أرموهو لِلضُّلُمَّه الفي بَرَّه. هِناك بِكون البِكى و عَض السِّنون.

الخِرفان و الغَنَم

³¹ لَمّا إبن الإنسان بِجي في مَجدو، و كُل المَلائكَه مَعاهو، في الوَكِت داك بِيَقعُد عَلى كُرسي مَجدو.

³² و كُلّو ناس الدُّنيا بِتلِمّو قِدّامو. و هو بِفَرِّقُم واحِد مِن التّاني، زي ما الرّاعي يَفَرِّق الخِرفان مِن الغَنَم.

³³ و بِخُت الخِرفان عَن يَمينو، و الغَنَم عَن الشِّمال.

³⁴ بَعدين المَلِك بِقول لِلنّاس الفي يَمينو: تَعالو، يا مُبارَكين مِن أبوي. أُخُد المَلَكوت المَجَهَّز ليكُم مِن بِدايَة الدُّنيا.

³⁵ عَشان أنا كُنتَ جَعان، و إنتو أدّيتوني أكل. كُنتَ عَطشان، و أدّيتوني شَراب. كُنتَ غَريب، و عَزَمتوني لِبِيوتكُم.

³⁶ ما كان عِندي هِدوم، و إنتو لَبَّستوني. كُنتَ عَيّان، و إنتو زُرتوني. كُنتَ في السِّجِن، و إنتو جيتو لَي.

³⁷ بَعدين البارين بِقولو ليهو: يا رَب، مِتين شُفناك جَعان و أدّيناك أكل؟ ولّا مِتين كُنتَ عَطشان و أدّيناك شَراب؟

³⁸ و مِتين شُفناك غَريب، و عَزَمناك؟ و مِتين شُفناك بِدون هِدوم و أدّيناك هِدوم؟

³⁹ و مِتين شُفناك عَيّان ولّا في السِّجِن و جينا ليك؟

⁴⁰ و المَلِك بِرُد و بِقول ليهُم: أقول ليكُم الحَق، زي ما إنتو عَمَلتوهو لِواحِد مِن أخواني ديل الأصغَر، عَمَلتوهو لَي.

⁴¹ بَعدين هو بِقول لِلنّاس في شِمالو: أمشو مِنّي، يا مَلعونين، لِلنّار الأبَديَّه المَجَهَّزَه لِإبْلِيس و مَلائكَتو.

⁴² عَشانّي كُنتَ جَعان، و إنتو ما أدّيتوني أكل. كُنتَ عَطشان، و ما أدّيتوني شَراب.

⁴³ كُنتَ غَريب، و إنتو ما عَزَمتوني. كُنتَ عَريان، و ما لَبَّستوني. كُنتَ عَيّان و في السِّجِن و ما جيتو تَزوروني.

⁴⁴ و بَعدين هُم كَمان بِرُدّو و بِقولو ليهو: يا رَب، مِتين شُفناك جَعان ولّا عَطشان؟ ولّا مِتين كُنتَ غَريب، ولّا عَريان، ولّا عَيّان، ولّا في السِّجِن و ما ساعَدناك؟

⁴⁵ و بَعدين هو بِقول ليهُم: أقول ليكُم الحَق، زي ما إنتو ما عَمَلتوهو لِواحِد مِن الأصغَر ديل، ما عَمَلتوهو لَي.

⁴⁶ بَعدين ديل بِمشو لِلجِّزا الأبَديَّه، و لَكِن البارين بِمشو لِلحَياة الأبَديَّه.“