مَتَّى 22 - كِتاب العَهد الجَّديد مِن الكِتاب المُقَدَّس

مَثَل عَزومَة العِرس

¹ و يَسُوع كَلَّمُم مَرَّه تانيَه بِأمثال و قال:

² ”مَلَكوت السَّما زي مَلِك جَهَّز عَزومَة عِرس لِوَلَدو.

³ و رَسَّل خَدّامينو يَنادو المَعزومين لِلعَزومَه. و لَكِن هُم أبو يَجو.

⁴ و هو رَسَّل خَدّامين تانيين و قال ليهُم: قولو لِلمَعزومين: شوفو، أنا جَهَّزتَ الغَدا. ضَبَحتَ تيراني و البَقَر السَّمين، و كُلّو شي جاهِز. تَعالو لِلعِرس.

⁵ و لَكِن ما خَلّو بالُم مِن الكَلام، و مَشو، واحِد لِزِراعَتو، و تاني لِشُغلو.

⁶ و الباقين مَسَكو خَدّامينو و شَتَموهُم و كَتَلوهُم.

⁷ و المَلِك بِقى زَعلان جِدّاً، و رَسَّل جيشو و كَتَل النّاس ديلاك الكَتَلو خَدّامينو، و حَرَق مَدينَتُم.

⁸ بَعدين قال لِخَدّامينو: ’عَزومَة العِرس جاهِزَه، و لَكِن المَعزومين ما مُستَحِقّين.

⁹ عَشان كِدا، أمشو لِلسِّكَك الكَبيرَه، و كُل البِتَلقوهُم هِناك، نادوهُم.‘

¹⁰ و الخَدّامين ديلاك مَرَقو لِلسِّكَك، و لَمّو كُل النّاس اللِقوهُم، البَطّالين و الكوَيسين. و مَحَل العِرس كان مَليان بِالضُّيوف.

¹¹ و لَكِن لَمّا المَلِك دَخَل عَشان يَشوف الضُّيوف، شاف زول هِناك ما كان لابِس هِدوم العِرس.

¹² و قال ليهو: ’يا صاحِب، كيف دَخَلتَ هِنا بِدون ما تَلبَس هِدوم العِرس؟‘ و هو سَكَت.

¹³ بَعدين المَلِك قال لِلخَدّامين: أربُطو إيدينو و كِرعينو، و أرموهو بَرَّه في الضُّلُمَّه. هِناك بِيَبكو و بِعَضّو الأسنان.

¹⁴ عَشان هو يَنادي ناس كُتار، لَكِن يَختار ناس قَليلين.“

الضَّريبَه لِقَيصَر

¹⁵ بَعدين الفَرِّيسِيِّين مَشو و إتكَلَّمو مَعَ بَعض كيف يَمسِكوهو بِكَلامو.

¹⁶ و هُم رَسَّلو ليهو تَلاميذُم مَعَ الهيروديسين. و هُم قالو: ”يا مُعَلِّم، نِحنا عارفين إنتَ تَقول الحَق، و تَعَلِّم سِكَّة الله بِالحَق. و إنتَ ما تَغَيِّر كَلامَك عَشان فِكر النّاس، عَلَشانَك ما تَعمِل فارِق بين النّاس.

¹⁷ عَشان دا، كَلِّمنا. تَفتَكِر شِنو؟ هو بِالقانون أن نَدفَع الضَّريبَه لِقَيصَر ولّا لا؟“

¹⁸ لَكِن يَسُوع عِرِف فِكرُم البَطّال، و قال: ”يا مُنافِقين، لِشِنو تَجَرِّبوني؟

¹⁹ وَرّوني قِرِش الضَّريبَه.“ جابو ليهو قِرِش.

²⁰ و سألُم و قال: ”صورَة مِنو عَليهو؟ و كِتابَة مِنو؟“

²¹ قالو ليهو: ”بِتاعَت قَيصَر.“ بَعدين قال ليهُم: ”أدّو لِقَيصَر حاجات قَيصَر، و أدّو لِلَّه حاجات الله.“

²² و لَمّا سِمِعو دا، إستَغرَبو. و خَلّوهو و مَرَقو.

الزَّواج في القيامَه

²³ في نَفس اليوم، الصَدّوقيين قَرَّبو ليهو، هُم البِقولو ما في قيامَه. و سألوهو و قالو:

²⁴ ”يا مُعَلِّم، مُوسَى قال: إذا زول بِموت و ما عِندو أولاد، أخوهو لازِم يِتزَوَّج مَرَتو و يَجيب أولاد لِأخوهو.

²⁵ و كانو في سَبعَه أخوان بينَنا. و الأوَّل إتزَوَّج و مات، و ما كان عِندو أولاد. عَشان كِدا، أخوهو أخَدا.

²⁶ و زي ما حَصَل لِلأخو الأوَّل، كِدا حَصَل لِلتاني و التّالِت، لِغايَة السّابِع.

²⁷ و بَعَد ما كُلَّهُم ماتو، المَرَه ماتَت كَمان.

²⁸ و في القيامَه، هي بِتكون مَرَة مِنو مِن السَّبعَه؟ عَشان كُلَّهُم إتزَوَّجو بيها.“

²⁹ و يَسُوع رَدَّ عَليهُم و قال: ”إنتو غَلطانين عَشان ما عارفين الكُتُب و لا قُوَّة الله.

³⁰ عَشان في القيامَه، النّاس ما بِزَوِّجو و لا بِتزَوَّجو، لَكِن بِكونو زي مَلائكَه في السَّما.

³¹ و في خُصوص القيامَه مِن بين المَيِّتين، ما قَريتو الكَلام القالو ليكُم الله؟

³² أنا إلَه إِبْرَاهِيم، و إلَه إِسْحَاق، و إلَه يَعْقُوب. هو ما إلَه ناس مَيِّتين لَكِن إلَه ناس حَيين.“

³³ و لَمّا النّاس الكُتار سِمِعوهو، إستَغرَبو مِن تَعليمو.

الأمر الأكبَر

³⁴ و لَكِن لَمّا الفَرّيسيّين سِمِعو إنّو سَكَّت الصَدّوقيين، إتلَمّو سَوا.

³⁵ و واحِد مِنَّهُم، و هو قاضي القانون، سَألو عَشان يَجَرِّبو.

³⁶ و قال ليهو: ”يا مُعَلِّم، ياتو أمر هو الأكبَر في القانون؟“

³⁷ و قال ليهو: ”حِب الرَّب إلَهَك بِكُلّو قَلبَك، و بِكُلّو نَفسَك، و بِكُلّو فِكرَك.

³⁸ دا الأمر الأكبَر و الأوَّل.

³⁹ و الأمر التّاني زيهو، حِب جارَك زي ما بِتحِب نَفسَك.

⁴⁰ بِالأوامِر ديل، كُل القانون و الأنبياء بِعَلِّقو.“

⁴¹ و وَكِت ما الفَرِّيسِيِّين إتلَمّو، يَسُوع سألُم

⁴² و قال: ”تَفتَكِرو شِنو في المَسيح؟ هو إبن مِنو؟“ قالو ليهو: ”هو إبن دَاوُد.“

⁴³ قال ليهُم: ”عَلى كِدا، كيف دَاوُد بِالرّوح بِسَميهو رَب؟ و يَقول:

⁴⁴ الرَّب قال لِرَبّي، أقعُد عَلى يَميني، لِغايَة ما أخُت عُدوانَك تِحِت كِرعينَك.

⁴⁵ إذا دَاوُد يَسَمّيهو رَب، كيف هو يَكون إبنو؟“

⁴⁶ و ما في واحِد قِدِر يَرُد عَليهو كِلمَه واحدَه. و مِن اليوم داك ما في واحِد قِدِر يَسألو سؤَال تاني.