مَتَّى 21 - كِتاب العَهد الجَّديد مِن الكِتاب المُقَدَّس

الدُّخول في النَّصر

¹ و لَمّا قَرَّبو لِأُورُشَلِيم و وِصِل بيت فاجي، في جَبَل الزّيتون، يَسُوع رَسَّل إتنين مِن تَلاميذو

² و قال ليهُم: ”أمشو لِلحِلَّه القِدّامكُم، و طَوّالي بِتَلقو حُمارَه مَربوطَه، و جَنى مَعاها. فِكّوهُم و جيبوهُم لَي.

³ إذا أي واحِد بِقول ليكُم حاجَه، كَلِّموهو: الرَّب مُحتاج ليهُم، و هو بِرَسِّلُم طَوّالي.“

⁴ و دا عَشان يَتِم الكَلام القالو النَّبي:

⁵ ”قولو لِبِت صِهيون: شوفي، المَلِك بِتاعِك بِجي ليك وَديع، و راكِب عَلى حُمارَه. و عَلى دَحَش، جَنى حُمارَه.“

⁶ و التَّلاميذ مَشو و عَمَلو زي ما يَسُوع أمَرُم.

⁷ و جابو الحُمارَه و الدَّحَش، و خَتّو هِدُومُم عَليهُم و يَسُوع قَعَد فوقُم.

⁸ و الجَّمَع الكَبير فَرَشو هِدُومُم في السِّكَّه، و ناس تانيين قَطَعو فُروع مِن الشَّجَر و فَرَشوها في السِّكَّه.

⁹ و النّاس المَشو قِدّامو و النّاس المَشو وَراهو كورَكو: ”أُوصَنّا لِإبن دَاوُد! مُبارَك الجّاي بِإسم الرَّب! أُوصَنّا في العالي.“

¹⁰ و لَمّا يَسُوع دَخَل أُورُشَلِيم، كُل المَدينَه إتحَرَّك. و سَألو و قالو: ”دا مِنو؟“

¹¹ و النّاس رَدّو و قالو: ”دا يَسُوع، النَّبي مِن نَاصِرَه الجَّليل.“

يَسُوع في الهيكَل

¹² و يَسُوع دَخَل مَحَل الهيكَل و طَرَد كُل النّاس الكانو بِبيعو و بِشتَرو في الهيكَل. و قَلَب طَرَبيزات النّاس الكانو بِبَدِّل القُروش و كَراسي النّاس الكانو بِبيعو الحَمام.

¹³ و قال ليهُم: ”مَكتوب: بِسَمّو بيتي بيت لِلصَّلاه. لَكِن إنتو عامِلينو بيت لِحَراميَّه.“

¹⁴ و العَميانين و النّاس العُرُج قَرَّبو ليهو في مَحَل الهيكَل، و هو شَفاهُم.

¹⁵ و لَكِن لَمّا القُسُس الكُبار و مُعَلِّمين القانون شافو الحاجات العَجيبَه الهو عَمَلا، و شافو الأولاد بِكورِكو في مَحَل الهيكَل: ”أُوصَنّا لِإبن دَاوُد،“ كانو زَعلانين.

¹⁶ و قالو ليهو: ”بِتَسمَع الكَلام الأولاد ديل بِقولو؟“ و يَسُوع قال: ”أيوَه. ما قَريتو: مِن خُشوم أولاد و أطفال جَهَّزتَ الحَمد؟“

¹⁷ و خَلّاهُم و مَرَق مِن المَدينَه دي لِبيت عَنيا، و نام هِناك.

شَجَرَة التّين يِبسَت

¹⁸ و في الصَّباح، وَكِت ما كان في السِّكَّه راجِع لِلمَدينَه، كان جَعان.

¹⁹ و لَمّا شاف شَجَرَة تين جَمب السِّكَّه، قَرَّب ليها، و لَكِن ما لِقى حاجَه فيها إلّا وَرَق بَس. و قال ليها: ”ما بِكون ثِمار مِنَّك تاني مَرَّه لِلأبَد.“ و طَوّالي الشَّجَرَه يِبسَت.

²⁰ لَمّا التَّلاميذ شافو دا، إستَغرَبو و قالو: ”كيف الشَّجَرَه يِبسَت طَوّالي؟“

²¹ يَسُوع رَدَّ و قال ليهُم: ”أقول ليكُم الحَق، إذا عِندَكُم إيمان، و ما تَشِكّو في قُلوبكُم، إنتو ما بِتَعمِلو بَس الأنا عَمَلتو لِلشَّجَرَه، لَكِن إذا بِتقولو لِلجَّبَل دا: أمشي، أرمي نَفسَك في البَحَر، بِكون كِدا.

²² و إذا بِتصَدِّقو، كُل الإنتو بِتَطلُبو ليهو في الصَّلاه، بِتَقبَلوهو.“

²³ و لَمّا دَخَل مَحَل الهيكَل، القُسُس الكُبار و شُيوخ النّاس قَرَّبو ليهو وَكِت ما هو كان بِعَلِّم النّاس. و قالو ليهو: ”بِتَعمِل الحاجات دي بِياتا سُلطَه؟ و مِنو أدّاك السُّلطَه دي؟“

²⁴ يَسُوع رَدَّ عَليهُم و قال: ”و أنا كَمان بَسألكُم سؤَال واحِد. إذا إنتو بِترُدّو عَلي، أنا كَمان بَكَلِّمكُم بِياتا سُلطَه أعمِل الحاجات دي.

²⁵ مَعموديَّة يُوحَنَّا كانَت مِن وين؟ مِن السَّما؟ ولّا مِن النّاس؟“ و فَكَّرو في نُفوسُم و قالو: ”إذا نَقول، مِن السَّما، هو بِقول: لِشِنو ما صَدَّقتو بيهو؟

²⁶ و لَكِن إذا نَقول: مِن النّاس، نِحنا خايفين مِن النّاس، عَشان كُلُّهُم بِقولو يُوحَنَّا نَبي.“

²⁷ عَشان دا، هُم رَدّو عَلى يَسُوع و قالو: ”ما بِنَعرِف.“ و هو كَمان قال ليهُم: ”و لا أنا بَقول ليكُم بِياتا سُلطَه بَعمِل الحاجات دي.

مَثَل الوَلَدين

²⁸ تَفتَكِرو شِنو؟ كان في راجِل عِندو وَلَدين. و هو مَشى لِلأوَّل و قال ليهو: يا وَلَدي، أمشي النَّهار دا و إشتَغِل في الجِّنينَه بِتاعَت العِنَب.

²⁹ هو رَدَّ عَليهو و قال: أنا ما بَمشي. لَكِن بَعدين تاب و مَشى.

³⁰ بَعدين أبوهو مَشى لِلتاني و قال نَفس الكَلام. و رَدَّ عَليهو و قال: أنا بَمشي، يا سَيِّد. لَكِن هو ما مَشى.

³¹ ياتو مِن الإتنين عَمَل إرادَة الأبو؟“ قالو: ”الأوَّل.“ يَسُوع قال ليهُم: ”أقول ليكُم الحَق. النّاس البِلِمّو الضَّريبَه و النِّسوان البَطّالات بِدخُلو مَلَكوت الله قُبّالكُم.

³² عَلَشان يُوحَنَّا جا ليكُم ماشي في سِكَّة البِر، و إنتو ما صَدَّقتو بيهو. لَكِن النّاس البِلِمّو الضَّريبَه و النِّسوان البَطّالات صَدَّقو بيهو. و إنتو، لَمّا شُفتو الحاجات ديل، ما تُبتو و ما صَدَّقتو بيهو.

مَثَل المُزَارِعين البَطّالين

³³ أسمَع مَثَل تاني. كان في سيد بيت، و هو زَرَع جِنينة العِنَب. و خَتَّ زَريبَه حَولا. و حَفَر عَصارَه لِلعِنَب، و بَنى بيت حَرس. و بَعدين أجَّرا لِمُزَارِعين و سافَر.

³⁴ و لَمّا وَكِت الثَّمار قَرَّب، رَسَّل خَدّامينو لِلمُزارعين عَشان ياخُدو ثَمَرو.

³⁵ و المُزارعين مَسَكو خَدّامينو، و ضربو الواحِد دا، و كَتَلو داك، و رَمو حُجار عَلى تاني.

³⁶ و بَعدين، هو رَسَّل ليهُم خَدّامين تانيين، أكتَر مِن الوَكِت الأوَّل. و المُزارعين عَمَلو ليهُم زي ما عَمَلو في الأوَّل.

³⁷ في الآخِر، رَسَّل ليهُم وَلَدو و قال: هُم بِحتَرِمو إبني.

³⁸ و لَكِن لَمّا المُزارعين شافو الإبن، قالو بَعضَهُم لِبَعض: دا هو البِقبَل المال مِن أبوهو. تَعالو، نَكتُلو و ناخُد كُلّو مالو.

³⁹ و أخَدوهو و رَموهو بَرَّه مِن الجِّنينَه و كَتَلوهو.

⁴⁰ عَلى كِدا، لَمّا صاحِب جِنينة العِنَب بِجي، بيَعمِل شِنو لِلمُزارعين؟“

⁴¹ قالو ليهو: ”هو بِكتُل النّاس البَطّالين ديلاك كَتل بَطّال، و يَأجِّر جِنينة العِنَب لِمُزَارِعين تانيين بِدّوهو الثَّمار بِتاعو في وَكتو.“

⁴² يَسُوع قال ليهُم: ”ما قَريتو أبَداً في الكِتاب؟ الحَجَر البَنّايين أبو، هو بِقى راس الرُّكن. الرَّب عَمَل دا، و هو عَجيب قِدّامنا.

⁴³ عَشان دا أقول ليكُم، بياخُد مَلَكوت الله مِنَّكُم و بِدّيهو لِناس تانيين يَجيبو ثَمَرو.“

⁴⁴ و الزّول اليَقَع عَلى الحَجَر دا، بِتكَسَّر. و لَكِن لَمّا الحَجَر داك يَقَع عَلى أي زول، بِكَسِّرو حِتَّه حِتَّه.

⁴⁵ و لَمّا القُسُس الكُبار و الفَرّيسيّين سِمِعو أمثال يَسُوع، عِرِفو هو كان بِتكَلَّم عَنُّم.

⁴⁶ و لَمّا جَرَّبو يَمسِكوهو، خافو مِن الجُّموع، عَشان النّاس قالو هو نَبي.