مَتَّى 2 - كِتاب العَهد الجَّديد مِن الكِتاب المُقَدَّس

زيارَة المَجوس

¹ و لَمّا يَسُوع كان مَولود في بيت لَحَم الفي يَهُودِيَّه، في أيام هِيرُودُس المَلِك، شوف! مَجوس مِن الشَّرق جو لِأُورُشَلِيم

² و قالو: ”وين هو المَولود مَلِك اليَهود؟ عَشان شُفنا النَّجمَه بِتاعتو في الشَّرق و جينا عَشان نَعبُدو.“

³ لَمّا المَلِك هِيرُودُس سِمِع دا، فَكَّر كَتير فيهو، و كُلّو ناس أُورُشَلِيم مَعاهو.

⁴ و جَمَع كُل القُسُس الكُبار و مُعَلِّمين القانون، و سألُم: ”المَسيح بِكون مَولود وين؟“

⁵ و قالو ليهو: ”في بيت لَحَم الفي يَهُودِيَّه، فِشان دا القالو النَّبي:

⁶ و إنتي، يا بيت لَحَم، بَلَد يَهُوذَا، ما الأصغَر بين مُديرين يَهُوذَا. عَلَشان مِنِّك يَجي مُدير يَحكُم عَلى النّاس بِتاع إِسْرَائِيل.“

⁷ بَعَد دا، هِيرُودُس نادى المَجوس بِالسِّر، و إتعَلَّم مِنَّهُم وَكِت النَّجمَه طَلَعَت.

⁸ و رَسَّلُم لِبيت لَحَم و قال: ”أمشو و فَتِّشو بِأي طَريق عَلى الوَلَد. و لَمّا تَلقوهو، جيبو لَي الخَبَر، عَلَشان أنا كَمان بَجي و أعبُدو.“

⁹ و لَمّا هُم سِمِعو مِن المَلِك، مَشو. و شوف، النَّجمَه الهُم شافوها في الشَّرق مَشَت قِدّامُم لِغايَة ما جات، و وَقَفَت فوق المَحَل الكان فيهو الوَلَد.

¹⁰ و لَمّا شافو النَّجمَه، كانو مَبسوطين شَديد جِدّاً.

¹¹ و دَخَلو البيت و شافو الوَلَد مَعَ أُمّو مَرْيَم. و رَكَعو و عَبَدوهو. بَعَد دا، فَتَحو حاجاتُم الغاليَه و قَدَّمو ليهو هَدايا: دَهَب و لُبان و بَخور.

¹² و الله كَلَّمُم عَن الخَطَر في حِلِم عَشان ما يَرجَعو لِهِيرُودُس. و هُم مَشو بِسِكَّه تانيَه لِبَلَدُم.

الهُروب لِمَصر

¹³ و بَعَد ما مَشو، شوف، مَلاك الرَّب جا لِيُوسِف في حِلِم و قال: ”قوم، أُخُد الوَلَد و أُمّو و أمشي قَوام لِمَصر، و أقعُد هِناك لِغايَة ما أقول ليك، عَلَشان هِيرُودُس عاوِز يَفَتِّش عَلى الوَلَد عَشان يَكتُلو.“

¹⁴ و هو قام و أخَد الوَلَد و أُمّو بِاللّيل و مَشى لِمَصر.

¹⁵ و هو قَعَد هِناك لِغايَة ما مات هِيرُودُس، عَشان يَتِم الكَلام الرَّب قال بِالنَّبي: ”مِن مَصر ناديت وَلَدي.“

¹⁶ بَعدين، لَمّا هِيرُودُس شاف أن المَجوس ما إحتَرَموهو، كان زَعلان جِدّاً جِدّاً، و رَسَّل و كَتَل كُل الأولاد الكانو في بيت لَحَم، و في كُلّو مَحَل القَريب مِنّو، الأولاد العُمر بِتاعُم كان سَنَتين و أقَل مِن دا، زي الوَكِت الكان عِندو خَبَر مِن المَجوس.

¹⁷ في الوَكِت دا، تَمَّ الكَلام القالو إِرْمِيَا النَّبي:

¹⁸ ”سِمِعو صوت في الرَّامَه، الحُزن و البِكى كَتير. رَاحِيل تَبكي لِأولادا و أبَت تَكون مَبسوطَه، عَلَشان هُم ما في.“

الرُّجوع لِنَاصِرَه

¹⁹ و لَكِن لَمّا هِيرُودُس مات، شوف، مَلاك الرَّب جا في حِلِم لِيُوسِف في مَصر

²⁰ و قال: ”قوم و أُخُد الوَلَد و أُمّو و أمشي لِبَلَد إِسْرَائِيل، عَشان الكانو يَفَتِّشو عَلى نَفس الوَلَد ماتو.“

²¹ و قام و أخَد الوَلَد و أُمّو، و جا لِبَلَد إِسْرَائِيل.

²² و لَكِن لَمّا هو سِمِع أن أَرْخِيلاوُس كان يَحكُم عَلى اليَهُودِيَّه بَدَل أبوهو هِيرُودُس، خاف يَمشي هِناك. و عَشان الله كَلَّمو عَن الخَطَر في حِلِم، مَشى لِقِسم الجَّليل.

²³ و جا و قَعَد في المَدينَه الإسِما النَّاصِرَه، عَشان يَتِم القالو الأنبياء: ”بِسَمّوهو ناصِري.“