مَتَّى 19 - كِتاب العَهد الجَّديد مِن الكِتاب المُقَدَّس

الطّلاق

¹ و لَمّا يَسُوع كَمَّل الكَلام دا، مَرَق مِن الجَّليل و مَشى لِمَحَل اليَهُودِيَّه، غادي الأُرْدُنّ.

² و ناس كَتيرين تِبِعوهو، و هو شَفاهُم هِناك.

³ و الفَرّيسيّين قَرَّبو ليهو عَشان يَجَرِّبوهو، و قالو: ”القانون بِخَلّي راجِل يَطَلِّق مَرَتو لِكُلّو سَبَب؟“

⁴ رَدَّ عَليهُم و قال: ”ما قَريتو هو الخَلَقُم مِن البِدايَه خَلَقُم راجِل و مَرَه؟

⁵ و قال: عَشان كِدا، الرّاجِل بِسيب أبوهو و أُمّو و يَكون واحِد مَعَ مَرَتو، و الأتنين يَبقو جِسِم واحِد.

⁶ كِدا، هُم ما إتنين بَعَد دا، لَكِن جِسم واحِد. عَلَشان كِدا، الجَّمَعو الله، ما تَخَلّو إنسان يَفَرِّقو.“

⁷ قالو ليهو: ”لِشِنو مُوسَى أمَر لِلرّاجِل يَدّي شَهادَة طَلاق و يَخَلّيها؟“

⁸ قال ليهُم: ”مُوسَى أدّاكُم إذن تَطَلِّقو نِسوانكُم عَشان قُلوبكُم بِقو قَوّيين. و لَكِن مِن الأوَّل ما كان زي دا.

⁹ و أقول ليكُم، البِطَلِّق مَرَتو إلّا لَمّا عَمَلَت الزِّنا، و بِتزَوَّج مَرَه تانيَه، هو بيَعمِل الزِّنا.“

¹⁰ و التَّلاميذ قالو ليهو: ”إذا كان الحالَه بين الرّاجِل و مَرَتو زي دي، أحسَن ما يِتزَوَّج.“

¹¹ و قال ليهُم: ”مُش كُل النّاس يَقدَرو يَقبَلو الكَلام دا، لَكِن هُم الأدّوهو ليهُم بَس.

¹² عَشان في خِصيان مَولودين زي دا مِن بُطون أُمَّهاتُم. و في خِصيان خَصوهُم النّاس. و في خِصيان خَصو نُفوسُم فِشان مَلَكوت السَّما. اليَقدَر يَقبَل دا، خَليهو يَقبَلو.“

يَسُوع و الأولاد

¹³ بَعدين قَدَّمو ليهو أولاد عَشان يَخُت إيدينو عَليهُم و يَصَلّي. لَكِن التَّلاميذ كَلَّموهُم شَديد.

¹⁴ لَكِن يَسُوع قال: ”خَلّو الأولاد يَجو لَي، و ما تَمنَعوهُم، عَشان مَلَكوت السَّما لِأولاد زي ديل.“

¹⁵ و خَتَّ إيدينو فوقُم و مَرَق مِن هِناك.

الشّاب الغَني

¹⁶ و شوف! واحِد قَرَّب ليهو و قال: ”يا مُعَلِّم، شِنو الحاجَه الكوَيسَه اللازِم أعمِلا عَشان بِكون عِندي الحَياة الأبَديَّه؟“

¹⁷ و يَسُوع قال ليهو: ”لِشِنو تسألني عَن الحاجات الكوَيسَه؟ الكَويس هو واحِد بَس. و إذا عاوِز تَدخُل الحَياة، أحفَظ الأوامِر.“

¹⁸ قال ليهو: ”ياتو في الأوامِر؟“ و يَسُوع قال: ”ما تَكتُل، ما تَزني، ما تَسرِق، ما تَشهَد بِالكِضِب.

¹⁹ إحتَرِم أبوك و أُمَّك، و، حِب جيرانَك زي ما تَحِب نَفسَك.“

²⁰ و الشّاب قال ليهو: ”حَفَظتو كُلّو دي. شِنو ناقِص لَي بَعَد دا؟“

²¹ و يَسُوع قال ليهو: ”إذا كان عاوِز تَكون تَمام، أمشي، و بيع مالَك، و أَدِّي القُروش مِنّو لِلمَساكين، و بِكون عِندَك كَنز في السَّما. و تَعال أتبَعني.“

²² و لَمّا الشّاب سِمِع الكَلام دا، مَرَق حَزين، عَشان كان عِندو مال كَتير.

²³ و يَسُوع قال لِتَلاميذو: ”الحَق أنا بَقول ليكُم: صَعَب لِزول غَني أن يَدخُل مَلَكوت السَّما.

²⁴ و أنا بَقول ليكُم كَمان، بِكون أسهَل لِجَمَل يَدخُل في عين إبرَه مِن أن غَني يَدخُل مَلَكوت الله.“

²⁵ و لَمّا التَّلاميذ سِمِعو الكَلام دا، إستَغرَبو كَتير و قالو: ”كان كِدا، مِنو يَقدَر يَخلَص؟“

²⁶ يَسُوع عايَن ليهُم و قال ليهُم: ”دا ما مُمكِن عِند النّاس، و لَكِن عِند الله كُلّو شي مُمّكِن.“

²⁷ بَعدين بُطْرُس رَدَّ عَليهو و قال: ”شوف! خَلّينا كُلّو شي و تِبِعناك. بِكون لينا شِنو؟“

²⁸ يَسُوع قال ليهُم: ”الحَق أنا بَقول ليكُم: في الزَّمَن الجَّديد، لَمّا إبن الإنسان يَقعُد عَلى كُرسي المَلِك في مَجدو، إنتو كَمان التَّبَعتوني بِتَقعُدو عَلى إتناشَر كُرسي، و تَحكُمو عَلى قَبايل إِسْرَائِيل الإتناشَر.

²⁹ و كُلّو واحِد الخَلّى بُيوت ولّا أخوان ولّا أخوات ولّا أبو ولّا أُم ولّا أولاد ولّا زِراعات فِشان إسمي، هو بياخُد مِيَّة مَرَّه، و بِتكون ليهو الحَياة الأبَديَّه.

³⁰ و لَكِن كَتيرين مِن النّاس الفي الأوَّل بِكونو في الآخِر، و كَتيرين مِن النّاس الفي الآخِر بِكونو في الأوَّل.