مَتَّى 17 - كِتاب العَهد الجَّديد مِن الكِتاب المُقَدَّس

التَّغيير المَجيد

¹ و بَعَد سِتَة أيام، يَسُوع أخَد مَعاهو بُطْرُس و يَعْقُوب و يُوحَنَّا أخوهو. و قادُم لِجَبَل عالي بَراهُم.

² و شَكلو كان مَغَيَّر، و وَشّو إتنَوَّر زي الشَّمِش، و هِدومو بِقى أبيَض زي النّور.

³ و شوف! مُوسَى و إِيلِيَّا ظَهَرو ليهُم يِتكَلَّمو مَعاهو.

⁴ و بُطْرُس رَدَّ و قال لِيَسُوع: ”يا رَب، كوَيس لينا نَكون هِنا. إذا إنتَ داير، بَعمِل تلاتَه خيام هِنا، واحدَه ليك، و واحدَه لِمُوسَى، و واحدَه لِإِيلِيَّا.“

⁵ و وَكِت ما كان لِسَّع يتكَلَّم، شوف! سَحابَه لامعَه عَمَلَت ضُل عَليهُم. و صوت مِن السَّحابَه قال: ”دا هو إبني الحَبيب، و أنا مَبسوط مِنّو. أسمَعو ليهو.“

⁶ لَمّا التَّلاميذ سِمِعو دا، وَقَعو عَلى وُشوشُم، و خافو جِدّاً.

⁷ لَكِن يَسُوع جا و لِمِسُم و قال: ”قُومو، و ما تَخافو.“

⁸ و لَمّا رَفَعو عُيونُم، ما شافو واحِد إلّا يَسُوع بَس.

⁹ و وَكِت ما هُم نازِلين مِن الجَّبَل، يَسُوع أمَرُم و قال: ”ما تَكَلِّمو أي واحِد عَن الرّؤيَه، لِغايَة ما إبن الإنسان يَقوم مِن بين المَيِّتين.“

¹⁰ و التَّلاميذ سألوهو و قالو: ”إذا كِدا، لِشِنو مُعَلِّمين القانون يَقولو إِيلِيَّا لازِم بِجي في الأوَّل؟“

¹¹ رَدَّ عَليهُم و قال: ”إِيلِيَّا جاي و بِرَجِّع كُلّو شي.

¹² لَكِن أقول ليكُم، إِيلِيَّا جا هَسَّع، و ما عِرفوهو، لَكِن عَمَلو ليهو كُل الهُم دايرينو. زي دا، إبن الإنسان كَمان بِتعَذَّب مِنَّهُم.“

¹³ في الوَكِت داك، التَّلاميذ فِهمو هو قال ليهُم عَن يُوحَنَّا المَعمَدان.

شِفا الوَلَد المِتعَذَّب

¹⁴ و لَمّا جو لِلجَّماعَه، زول قَرَّب ليهو و رَكَع قِدّامو و قال:

¹⁵ ”يا رَب، كون رَحيم لِوَلَدي، عَشان هو عِندو العَيى البِتَرميهو تِحِت، و بِتعَذَّب جِدّاً. عَشان مَرّات كَتيرَه يَقَع في النّار، و مَرّات كَتيرَه يَقَع في المويَه.

¹⁶ و جِبتو لِتَلاميذَك، و ما قِدرو يَشفوهو.“

¹⁷ و يَسُوع رَدَّ و قال: ”يا أولاد الزَّمَن دا، البِدون إيمان و رُسيكُم قَوّيَّه، لِمِتين بَكون مَعاكُم؟ لِمِتين أنا بَتحَمَّلكُم؟ جيبو لَي هِنا.“

¹⁸ و يَسُوع كَلَّمو شَديد، و الشّيطان طَلَع مِنّو. و الوَلَد بِقى طَيب طَوّالي.

¹⁹ بَعدين التَّلاميذ جو لِيَسُوع بَراهُم، و قالو: ”لِشِنو نِحنا ما قِدِرنا نَطَلِّعو؟“

²⁰ و قال ليهُم: ”عَلَشان إيمانكُم قَليل. عَشان بِالحَق أقول ليكُم، إذا كان ليكُم إيمان زي تيراب خَردَل، بِتقولو لِلجَّبَل دا: إتحَرَّك مِن هِنا لِلمَحَل هِناك، و هو يِتحَرَّك. و ما في حاجَه بِتكون ما مُمكِن ليكُم.

²¹ و لَكِن النوع دا ما بِطلَع إلّا بِالصَّلاه و الصّوم.“

²² و وَكِت ما يَمشو في الجَّليل، يَسُوع قال ليهُم: ”إبن الإنسان بِتسَلَّم لِإيدين النّاس.

²³ و هُم بِيَكتُلوهو، و هو بِقوم في اليوم التّالِت.“ و هُم كانو حَزنانين جِدّاً.

²⁴ و لَمّا جو لِكَفْرَنَاحُوم، النّاس البِلِمّو الرّيال قَرَّبو لِبُطْرُس و قالو ليهو: ”مُعِلِّمَك ما يَدفَع الضَّريبَه؟“

²⁵ قال: ”أيوَه.“ و لَمّا دَخَل البيت، يَسُوع إتكَلَّم في الأوَّل و قال: ”تَفتَكِر شِنو، يا سِمْعَان؟ مِن مِنو ياخُدو مُلوك الدُّنيا رُسوم الجُّمرُك ولّا الضَّريبَه؟ مِن أولادُم ولّا مِن الغَريبين؟“

²⁶ بُطْرُس قال: ”مِن الغَريبين.“ يَسُوع قال ليهُم: ”عَلى كِدا الأولاد حُرّين.

²⁷ لَكِن عَشان ما نَزَعِّلُم، أمشي لِلبَحَر و أرمي جَبادَه. أُخُد أوَّل سَمَك البِتَطلَع. و لَمّا تَفتَح خَشما، بِتَلقى ريال. أُخدو، و أدّيهو ليهُم فِشانّي و فِشانَك.“