مَتَّى 15 - كِتاب العَهد الجَّديد مِن الكِتاب المُقَدَّس

النَّضيف و الما نَضيف

¹ بَعدين، فَرّيسيِّين و مُعَلِّمين القانون جو لِيَسُوع مِن أُورُشَلِيم، و قالو:

² ”تَلاميذَك بِكَسِّرو حَديث الشُّيوخ لِشِنو؟ عَشان ما بِغَسِّلو إيدينُم قُبّال ما ياكلو.“

³ يَسُوع رَدَّ و قال ليهُم: ”و إنتو، لِشِنو تَكَسِّرو أمر الله فِشان حَديثكُم؟

⁴ عَشان الله قال: إحتَرِم أبوك و أُمَّك، و كَمان: أي واحِد البقول لَعنَه عَلى أبوهو ولّا أُمّو، لازِم يَكتُلوهو.

⁵ لَكِن إنتو تَقولو واحِد ما لازِم يَحتَرِم أبوهو إذا يَقول لِأبوهو ولّا أُمّو: المَساعَدَه الأنا كُنتَ ساعَدتَكُم بيها، هي هَدِيَّه لِلَّه.

⁶ و كِدا، تَبَطِّلو كَلام الله عَلَشان حَديثكُم.

⁷ يا مُنافِقين، إِشَعْيَاء إتنَبّأ تَمام عَنكُم لَمّا قال:

⁸ النّاس ديل بِحتَرِموني بِخَشمُم، و لَكِن قُلوبُم بَعيدَه جِدّاً مِنّي.

⁹ يَحمَدوني ساكِت و بِعَلِّمو أوامِر بِتاع النّاس بَس.“

¹⁰ و نادى النّاس و قال ليهُم: ”أسمَعو و أفهَمو:

¹¹ البِدخُل الخَشم ما بِنَجِّس الزّول، لَكِن البِطلَع مِن الخَشم، دا بِنَجِّس الزّول.“

¹² بَعدين التَّلاميذ قَرَّبو ليهو و قالو ليهو: ”بِتَعرِف الفَرِّيسِيِّين كانو زَعلانين لَمّا سِمِعو الكَلام دا؟“

¹³ و رَدَّ يَسُوع و قال: ”كُلّو نَبات، إذا أبوي الفي السَّما ما زَرَعَه، بِطَلِّعوها.

¹⁴ خَلّوهُم. هُم ناس عَميانين بِسوقو عَميانين. و إذا عَميان بِسوق عَميان، هُم الإتنين يَقَعو في حُفرَه.“

¹⁵ و لَكِن بُطْرُس قال ليهو، ”وَرّينا مَعنى المَثَل.“

¹⁶ و يَسُوع قال: ”إنتو كَمان لِسَّع بِدون فَهم؟

¹⁷ ما تَفهَمو كُل البِدخُل الخَشم بِمشي لِلبَطُن، و بَعدين بِمرُق مِنّو؟

¹⁸ و لَكِن البِمرُق مِن الخَشم يَجي مِن القَلب، و دا بِنَجِّس الزّول.

¹⁹ عَشان مِن القَلب يَجو الأفكار البَطّالَه، و الكَتل، و الزِّنا، و الأخلاق البَطّالَه، و السِّرقَه، و الشَّهادَه الكَضّابَه، و الشَّتيمَه.

²⁰ دي هي الحاجات البِنَجِّسو الزّول. و لَكِن البياكُل بِدون ما بِغَسِّل إيدينو دا ما يَنَجِّس الزّول.“

إيمان المَرَه مِن كَنعان

²¹ و يَسُوع مَرَق مِن هِناك و مَشى بَراهو لِقِسم صُور و صَيدا.

²² و شوف! مَرَه كَنعانيَه مِن المَحَل داك، طَلَعَت و كُورَكَت: ”يا سَيِّد، إبن دَاوُد، كون رَحيم لَي. شيطان بِعَذِّب بِتّي شَديد جِدّاً.“

²³ لَكِن ما رَدَّ عَليها بِكِلمَه. و تَلاميذو قَرَّبو ليهو و طَلَبو ليهو و قالو: ”خَلِيها تَمشي، عَشان هي بِتكورِك وَرانا.“

²⁴ و رَدَّ عَليها و قال: ”أنا مَرَسَّل بَس لِلخِرفان المَوَدَّرين مِن بيت إِسْرَائِيل.“

²⁵ لَكِن هي جات و رَكَعَت قِدّامو و قالَت: ”يا سَيِّد، ساعِدني.“

²⁶ رَدَّ عَليها و قال: ”ما كوَيس ياخُد عيش الأولاد و يَرميهو لِلكِلاب الصُّغار.“

²⁷ قالَت ليهو: ”أيوَه، يا سَيِّد، لَكِن الكِلاب الصُّغار بياكلو مِن الباقي البِقَع مِن طَرَبيزَة سَيِّدُم.“

²⁸ بَعدين يَسُوع رَدَّ عَليها و قال: ”يا سِت، إيمانِك عَظيم. خَليهو بِكون ليكي زي ما إنتي عاوزَه.“ و بِتّا بِقَت تَمام مِن السّاعَه ديك.

يَسُوع يَدّي أكل لِلأربَعَة آلاف

²⁹ و يَسُوع مَرَق مِن هِناك، و مَشى عَلى طَرف بَحَر الجَّليل. و طَلَع لِلجَّبَل و قَعَد هِناك.

³⁰ و ناس كُتار قَرَّبو ليهو، و جابو مَعاهُم العُرُج، و النّاس اليَمشو بِعَصايَه، و العَميانين، و الما بِقدَرو يِتكَلَّمو، و تانيين كُتار. و سَلَّموهُم ليهو. و هو شَفاهُم،

³¹ حَتّى النّاس إستَغرَبو لَمّا شافو النّاس الما بِتكَلَّمو، و النّاس الكانو بِيَمشو بِعَصايَه بِقو طَيبين، و العُرُج بِمشو، و العَميانين بِشوفو. و هُم مَجَّدو الله بِتاع إِسْرَائِيل.

³² بَعدين يَسُوع نادى تَلاميذو و قال ليهُم: ”أنا عِندي رَحمَه عَلى النّاس، عَشانُم مَعاي تلاتَه أيام هَسَّع، و ما عِندَهُم أكل. و أنا ما عاوِز أرَسِّلُم جَعانين، عَشان يِمكِن يَقَعو في السِّكَّه.“

³³ و التَّلاميذ قالو ليهو: ”مِن وين نَلقى في الخَلا عيش كِفايَه لِلنّاس ديل؟“

³⁴ و يَسُوع قال ليهُم: ”عِندَكُم كَم رَغيف؟“ قالو: ”سَبعَه، و شوَيَه مِن سَمَك صَغَيِر.“

³⁵ و يَسُوع أمَر النّاس يَقعُدو عَلى الأرض،

³⁶ و أخَد السَّبعَه رَغِفان و السَّمَك. و بَعَد ما شَكَر الله، كَسَّرَه، و أدّاها لِلتَّلاميذ. و التَّلاميذ أدّوهُم لِلنّاس.

³⁷ و كُلَّهُم أكَلو و شَبَعو. و رَفَعو مِن باقي الكِسرَه، سَبعَه قُفَف مَليانَه.

³⁸ النّاس الأكَلو كانو أربَعَة آلاف راجِل، و كَمان نِسوان و أولاد.

³⁹ و بَعَد ما رَسَّل النّاس، رِكِب المُركَب و مَشى لِمَحَل مَجدان.