مَتَّى 14 - كِتاب العَهد الجَّديد مِن الكِتاب المُقَدَّس

موت يُوحَنَّا المَعمَدان

¹ في الوَكِت داك، هِيرُودُس، رَئيس مُديرِيَّه، سِمِع بِخَبَر يَسُوع.

² و قال لِخَدّامينو: ”دا هو يُوحَنَّا المَعمَدان. هو قام مِن بين المَيِّتين! دا السَّبَب هو عِندو قُوَّه أن يَعمِل القُوّات دي.“

³ عَشان هِيرُودُس مَسَك يُوحَنَّا و رَبَطو و خَتّاهو في السِّجِن فِشان هِيرُودِيَا، مَرَة أخوهو فِيلُبُّس.

⁴ عَشان يُوحَنَّا كان يَقول ليهو: ”ما بِالقانون تاخُدا ليك.“

⁵ و لَمّا كان عاوِز يَكتُلو، خاف مِن النّاس، عَشان هُم كانو يَقولو هو نَبي.

⁶ و لَمّا جا عيد ميلاد هِيرُودُس، بِت هِيرُودِيَا رَقَصَت قِدّام النّاس، و هِيرُودُس كان مَبسوط مِنَّها.

⁷ عَشان دا، هو وَعَد بِحَلَف يَدّيها أي شي الهي بِتَطلُب مِنّو.

⁸ و هي، بَعَد ما أُمَّها كَلَّمَتا، قالَت: ”أدّيني هِنا في صينيَّه راس يُوحَنَّا المَعمَدان.“

⁹ و المَلِك كان حَزين عَلى دا. لَكِن عَشان الحَلَف بِتاعو و ضُيوفو، أمَر أن يَدُّوهو ليها.

¹⁰ و رَسَّل و قَطَع راس يُوحَنَّا في السِّجِن.

¹¹ و جابو رَاسو في صَحَن و أدّوهو لِلبِت. و هي شالَتو لِأُمَّها.

¹² و تَلاميذ يُوحَنَّا جو و اَخَدو جِسمو و دَفَنوهو. بَعدين مَشو و خَبَّرو يَسُوع.

يَسُوع يَدّي أكل لِلخَمسَة آلاف

¹³ و لَمّا يَسُوع سِمِع دا، مَرَق مِن هِناك في مُركَب لِلخَلا بَراهو. و لَكِن لَمّا النّاس سِمِعوهو، تِبِعوهو عَلى كُراعُم مِن البِلاد.

¹⁴ و لَمّا يَسُوع وِصِل لِلطَّرَف، شاف ناس كُتار. و كان عِندو رَحمَه في قَلبو، و شَفى الكانو عَيّانين.

¹⁵ و لَمّا بِقى المِسا، التَّلاميذ قَرَّبو ليهو و قالو: ”المَحَل دا خَلا، و الوَكِت فات. خَلّي النّاس يَمرُقو عَلَشان يَمشو لِلبِلاد و يَشتَرو أكِل لِنُفوسُم.“

¹⁶ لَكِن يَسُوع قال ليهُم: ”ما ضَروري هُم يَمشو. إنتو أدّوهُم أكل.“

¹⁷ و قالو ليهو: ”عِندَنا هِنا خَمسَه رَغِفان بَس و سَمَكتين.“

¹⁸ و قال: ”جيبُم هِنا لَي.“

¹⁹ و أمَر النّاس يَقعُدو عَلى القَش. بَعدين أخَد الخَمسَه رَغِفان و السَّمَكتين، و عايَن لِلسَّما و بارَك، و كَسَّر الرَّغِفان و أدّاها لِلتَّلاميذ، و التَّلاميذ أدّوها لِلنّاس.

²⁰ و كُلَّهُم أكَلو و كانو شَبعانين. و رَفَعو الباقي مِن الكِسرَه، إتناشَر قُفَّه مَليانَه.

²¹ و النّاس الأكَلو كانو خَمسَة آلاف راجِل تَقريباً، و كَمان نِسوان و أولاد.

يَسُوع يَمشي عَلى البَحَر

²² و طَوّالي أمَر التَّلاميذ عَشان يدخُلو المُركَب، و يَمشو قِدّامو لِلجَّمب التّاني، وَكِت ما يَرَسِّل النّاس.

²³ و بَعَد ما رَسَّل النّاس، طَلَع لِلجَّبَل بَراهو عَشان يَصَلّي. و لَمّا بِقى المِسا، كان هِناك بَراهو.

²⁴ لَكِن المُركَب كانَت مَسافَه بَعيدَه مِن الطَرَف، و موج المويَه كانَت تَضرُب عَليها، عَشان الهَبوب كانَت ضِد المُركَب.

²⁵ و بين السّاعَه تلاتَه و السّاعَه سِتَّه في الصَّباح، يَسُوع جا ليهُم ماشي عَلى البَحَر.

²⁶ و لَمّا التَّلاميذ شافوهو ماشي عَلى البَحَر، كانو بِخافو خوف شَديد و قالو: ”هو روح!“ و كورَكو مِن الخوف.

²⁷ لَكِن طَوّالي يَسُوع كَلَّمُم و قال: ”شِدّو حيلكُم. أنا هو. ما تَخافو.“

²⁸ و بُطْرُس رَدَّ عَليهو و قال: ”يا رَب، إذا دا إنتَ، آمُرني أن أجي ليك عَلى المويَه.“

²⁹ و يَسُوع قال: ”تَعال.“ و بُطْرُس نَزَل مِن المُركَب و مَشى عَلى المويَه، و جا لِيَسُوع.

³⁰ لَكِن لَمّا شاف الهَبوب الشَّديدَه، خاف، و بَدا يَنزِل تِحِت في المويَه. و كورَك و قال: ”يا رَب، خَلِّصني.“

³¹ و طَوّالي، يَسُوع مَدَّ إيدو و مَسَك بيهو، و قال ليهو: ”يا قَليل الإيمان، لِشِنو ما صَدَّقتَ؟“

³² و لَمّا دَخَلو المُركَب، الهَبوب سَكَتَت.

³³ و الكانو في المُركَب عَبَدوهو و قالو: ”بِالحَق، إنتَ إبن الله.“

³⁴ و لَمّا قَطَعو البَحَر، جو لِأرض جَنِّيسَارَت.

³⁵ و لَمّا ناس المَكان دا عِرفوهو، رَسَّلو الخَبَر لِكُل المَحَل داك و جابو ليهو كُل العَيّانين،

³⁶ و طَلَبو ليهو يَخَلّي العَيّانين يَلمَسو طَرف توبو بَس. و كُل اللَمَسوهو بِقو طَيبين.