مَتَّى 13 - كِتاب العَهد الجَّديد مِن الكِتاب المُقَدَّس

مَثَل المُزارِع

¹ في نَفس اليوم، يَسُوع مَرَق مِن البيت و قَعَد جَمب البَحَر.

² و ناس كَتيرين إتلَمّو حَولو، حَتّى دَخَل مُركَب و قَعَد فيهو. و النّاس كُلّو كانو واقفين عَلى الطَّرف.

³ و كَلَّمُم كَتير بِأمثال و قال: ”شوفو! المُزارِع مَرَق عَشان يَزرَع تيرابو.

⁴ و وَكِت ما هو يَزرَع، وَقَع شوَيَة تيراب عَلى الطَّرِيق. و الطُّيور جو و أكَلوهو.

⁵ و تيراب تاني وَقَع عَلى المَحَلّات الفيها حُجار، و ما كان ليهو تُراب كَتير. و قام طَوّالي عَشان التُّراب ما كان غَريق.

⁶ و لَكِن الشَّمِش لَمّا طَلَعَت حَرَقَت النَّبات. و بِقى يابِس، عَشان ما كان عِندو عِرق.

⁷ و تيراب تاني وَقَع في وَسط الشّوك. و الشّوك طَلَع و خَنَقو.

⁸ و تيراب تاني وَقَع عَلى التُّراب السَّمِح، و جاب ثِمار. واحِد مِنّو مِيَّه. و التّاني سِتّين. و التّاني تَلاتين.

⁹ العِندو إضنين، خَليهو يَسمَع.“

¹⁰ بَعدين التَّلاميذ قَرَّبو ليهو و قالو ليهو: ”لِشِنو تَكَلِّمُم بِأمثال؟“

¹¹ و رَدَّ و قال ليهُم: ”الله أدّا ليكُم تَعرِفو سِر مَلَكوت السَّما. و لَكِن ما أدّا ليهُم.

¹² عَشان العِندو، بِدّيهو زِيادَه، و بِكون عِندو كَتير. لَكِن الما عِندو، الحاجَه العِندو بياخُدوها مِنّو.

¹³ دا السَّبَب الأنا بَكَلِّمُم بِأمثال، عَشان يَعاينو و ما يَشوفو، و يَسمَعو و ما يَسمَعو ولّا يَفهَمو.

¹⁴ و تَمَّ فيهُم الكَلام القالو النَّبي إِشَعْيَاء: بِتَسمَعو سَمَع لَكِن ما بِتَفهَمو، و بِتعايِنو بِعُيونكُم لَكِن ما بِتشوفو.

¹⁵ عَشان قَلب النّاس ديل بِقى تَقيل، و إضنينُم تُقال عَن السَّمَع، و عُيونُم قَفَلوها، عَشان ما بِشوفو بِعُيونُم، و لا يَسمَعو بِإضنينُم، و لا يَفهَمو بِقُلوبُم، و لا يَرجَعو عَشان أشفيهُم.

¹⁶ لَكِن إنتو، مُبارَكَه عُيونكُم، عَشانُم يَشوفو، و إضنينكُم عَشانُم يَسمَعو.

¹⁷ الحَق، أقول ليكُم، أنبياء كُتار و الطَّيبين كانو عاوزين يَشوفو الحاجات الإنتو تَشوفوها، و ما شافوها. و كانو عاوزين يَسمَعو الإنتو تَسمَعوها، و ما سِمِعوهو.

¹⁸ أسمَعو إنتو، مَثَل المُزارِع.

¹⁹ لَمّا أي واحِد يَسمَع كِلمَة المَلَكوت و ما يَفهَما، الشَّرّير يَجي و يَمسِك المَزروع في قَلبو. دا الكان مَزروع عَلى الطَّرِيق.

²⁰ و المَزروع عَلى المَحَلّات الفيها حُجار، دا هو البِسمَع الكِلمَه و طَوّالي بِقبَلا بِفَرَح.

²¹ لَكِن ما ليهو عِرق في نَفسو، لَكِن يِستَنّى مُدَّه قَليلَه. و لَمّا التَّعب ولّا المُصيبَه حَصَلَت عَشان الكِلمَه، طَوّالي بِقَع.

²² و الكان مَزروع في وَسط الشّوك، دا هو البِسمَع الكِلمَه، و لَكِن مَشغوليّات الدُّنيا و مَحَبَّة المال تَكون كَتيرَه حَتّى يَمنَعو الكِلمَه، و تَكون بِدون ثِمار.

²³ و الكان مَزروع في التُّراب السَّمِح، هو البِسمَع الكِلمَه و بِفهَما. هو بِجيب ثِمار، الواحِد مِيَّه، و التّاني سِتّين، و التّاني تَلاتين.“

مَثَل القَش البَطّال

²⁴ و عَلَّمُم مَثَل تاني و قال: ”مَلَكوت السَّما زي زول زَرَع تيراب سَمِح في زِراعتو.

²⁵ و لَكِن وَكِت ما النّاس نايمين، عَدوهو جا و زَرَع قَش في وَسط الدُّرَه، و مَشى.

²⁶ و لَمّا الدُّرَه طَلَعَت و جابَت رؤوس، ظَهَر القَش كَمان.

²⁷ و خَدّامين سيد البيت جو و قالو ليهو: يا سَيِّد، ما زَرَعتَ تيراب سَمِح في زِراعتَك؟ كِدا، القَش جا مِن وين؟

²⁸ قال ليهُم: عَدو عَمَل دا. الخَدّامين قالو ليهو: عاوِزنا نَمشي نَجمَعو؟

²⁹ قال ليهُم: لا! عَشان وَكِت ما تَطَلِّعو القَش، يِمكِن تَطَلِّعو الدُّرَه كَمان.

³⁰ خَلّوهُم الإتنين يَكبَرو سَوا لِغايَة ما تَمَّ الوَكِت عَشان يَلِم الدُّرَه. و لَمّا وَكِت الحَصاد تَمَّ، أقول لِليَلِمّو الدُّرَه، لِمّو القَش في الأوَّل، و أربُطوهو عَشان يَحرَقوهو. و لَكِن الدُّرَه، لِمّوهو لِمَخزَني.“

مَثَل تيراب الخَردَل

³¹ و عَلَّمُم مَثَل تاني و قال: ”مَلَكوت السَّما زي تيراب الخَردَل، و زول اَخَدو و زَرَعو في زِراعتو.

³² و هو أصغَر التّيراب كُلّو. لَكِن لَمّا يَكبَر، هو أكبَر النَباتات و تَبقى شَجَرَه، حَتّى طُيور السَّما تَجي و تَقَنِّب في فُروعا.“

³³ و كَلَّمُم بِمَثَل تاني كَمان و قال: ”مَلَكوت السَّما زي خَميرَه أخَدَتا مَرَه و دَسَّتا في تلاتَه كيلات دَقيق لِغايَة ما إتخَمَّر كُلّو.“

³⁴ يَسُوع قال كُلّو دا لِلجَماعات بِأمثال. و بِدون مَثَل ما كان بِكَلِّمُم حاجَه.

³⁵ دا لِيَتِم القالو النَّبي: ”بَفتَح خَشمي بِأمثال. أقول الدَّسّوهو مِن وَكِت الله خَلَق الدُّنيا.“

³⁶ بَعدين خَلّى الجَّمَع و مَشى لِلبيت. و تَلاميذو قَرَّبو ليهو و قالو: ”وَرّينا مَعنى مَثَل القَش الفي الزِّراعَه.“

³⁷ و رَدَّ عَليهُم و قال: ”البِزرَع التّيراب الكَويس هو إبن الإنسان.

³⁸ و الزِّراعَه هي الدُّنيا، و التّيراب الكَويس يَعني أولاد المَلَكوت. و القَش هُم أولاد الشَّرّير.

³⁹ و العَدو الزَّرَعو، هو إبْلِيس. و وَكِت البِلِمّو الدُّرَه، هو آخِر الزَّمَن. و ديل البِلِمّوها، هُم المَلائكَه.

⁴⁰ زي ما القَش يِتلَمّا و يِنحَرِق، بِكون كِدا في آخِر الزَّمَن.

⁴¹ إبن الإنسان بِرَسِّل مَلائكَتو، و هُم بِلِمّو مِن مَلَكوتو كُلّو شي البِكون السَّبَب لِخَطيَّه و كُل اليَعمِلو حاجات بَطّالَه،

⁴² و بِرموهُم في فُرن النّار. هِناك بِكون البِكى و عَض السِّنون.

⁴³ في الوَكِت داك العادِلين بِنَوِّرو زي الشَّمِش في مَلَكوت أبوهُم. العِندو إضنين، خَليهو يَسمَع.

⁴⁴ مَلَكوت السَّما زي حاجَه غاليَه الدَسّوها في زِراعَه، و زول لِقاها و دَسّاها. و مِن فَرَحو، يَمشي و يَبيع كُل العِندو و يَشتَري الزِّراعَه دي.

⁴⁵ و كَمان، مَلَكوت السَّما زي تاجِر بِفَتِّش عَلى لولي جَميل.

⁴⁶ و لَمّا لِقى لولي غالي جِدّاً، مَشى و باع كُل العِندو و إشتَراهو.

مَثَل الشَّبَكَه

⁴⁷ كَمان، مَلَكوت السَّما زي شَبَكَه رَموها في البَحَر، و هي جَمَعَت سَمَك مِن كُلّو نوع.

⁴⁸ و لَمّا كانَت مَليانَه، الصَّيادين جَروها لِلطَّرَف، و قَعَدو و لَمّو السَّمَك الكَويس في قُفَف، لَكِن البَطّال رَموهو بَرَّه.

⁴⁹ بِكون زي دا في آخِر الزَّمَن. المَلائكَه بِمشو و بِفَرِّقو البَطّالين مِن بين الكوَيسين،

⁵⁰ و بِرموهُم في فُرن النّار. هِناك بِكون البِكى و عَض السِّنون.

⁵¹ فِهِمتو كُلّو دا؟“ قالو ليهو: ”أيوَه.“

⁵² و قال ليهُم: ”عَلى كِدا، كُلّو مُعَلِّم القانون البِقي تِلميذ في مَلَكوت السَّما، هو زي زول، سيد بيت، بِطَلِّع مِن المَخزَن بِتاعو حاجات غاليَه، جَديدَه و قَديمَه كَمان.“

⁵³ و لَمّا يَسُوع خَلَّص الأمثال ديل، مَرَق مِن هِناك.

⁵⁴ و جا لِوَطَنو و بِقى يَعَلِّمُم في بيت الرَّب حَتّى النّاس إستَغرَبو و قالو: ”الإنسان دا لِقى الحِكمَه دي و القُوّات مِن وين؟

⁵⁵ دا ما إبن النَّجّار؟ و ما إسِم أُمّو مَرْيَم؟ و ما أخوانو يَعْقُوب، و يُوسِف و سِمْعَان و يَهُوذَا؟

⁵⁶ و مُش كُلّو أخواتو مَعانا؟ و مِن وين الإنسان دا عِندو كُلّو دي؟“

⁵⁷ و كانو زَعلانين مِنّو. لَكِن يَسُوع قال ليهُم: ”ما في نَبي مُحتِرَم في وَطَنو و في بيتو، لَكِن بَرَّه مِن بيتو بَس.“

⁵⁸ و يَسُوع ما عَمَل قُوّات كَتيرَه هِناك، عَشان هُم ما عِندَهُم إيمان.