مَتَّى 12 - كِتاب العَهد الجَّديد مِن الكِتاب المُقَدَّس

رَب السَّبِت

¹ في الوَكِت داك، يَسُوع فات في السَّبِت في وَسط الزِّراعَه. و كانو تَلاميذو جَعانين و بِقو يَقطَعو العيش الريف و ياكلوها.

² و لَكِن لَمّا الفَرّيسيّين شافو داك، قالو ليهو: ”شوف! تَلاميذَك يَعمِلو شي ما بِالقانون في يوم السَّبِت.“

³ و يَسُوع رَدَّ و قال ليهُم: ”إنتو ما قَريتو العَمَلو دَاوُد لَمّا كان جَعان، هو و الكانو مَعاهو؟

⁴ هو دَخَل بيت الله، و هُم أكَلو الرَغِفان المُقَدَّسَه الما بِالقانون أن ياكلوهو، هو ولّا المَعاهو كَمان، لَكِن القُسُس بَس.

⁵ ولّا، ما قَريتو في القانون كيف القُسُس في السَّبِت في الهيكَل يَنَجِّسو السَّبِت و هُم بِدون خَطيَّه؟

⁶ أقول ليكُم، في واحِد هِنا أكبَر مِن الهيكَل.

⁷ و إذا عِرِفتو المَعنى دا: أنا داير رَحمَه، ما ضَبيحَه، ما كُنتو حَكَمتو عَلى النّاس البِدون خَطيَّه.

⁸ عَلَشان إبن الإنسان هو رَب السَّبِت.“

⁹ و مَرَق مِن هِناك و دَخَل بيت الرَّب بِتاعُم.

¹⁰ و شوف! كان في زول إيدو يابسَه. و سألوهو و قالو: ”هو بِالقانون يَشفي زول في يوم السَّبِت؟“ قالو كِدا عَشان يَشتَكوهو.

¹¹ قال ليهُم: ”ياتو زول فيكُم يَكون عِندو خَروف واحِد، و هو وَقَع في حُفرَه في يوم السَّبِت، و ما يَمسِكو و يَرفَعو؟

¹² و الزّول، كيف هو أحسَن مِن الخَروف! كِدا، هو بِالقانون أن يَعمِل حاجَه كوَيسَه في يوم السَّبِت.“

¹³ بَعدين قال لِلزّول: ”مِد إيدَك.“ و الزّول مَدّاها، و إيدو بِقَت كوَيسَه زي التّانيَه.

¹⁴ و لَكِن الفَرِّيسِيِّين مَرَقو و إتكَلَّمو مَعَ بَعض عَليهو كيف يَكتُلوهو.

¹⁵ يَسُوع عِرِف دا و مَرَق مِن هِناك. و ناس كُتار تِبِعوهو. و هو شَفى كُلَّهُم،

¹⁶ و أمَرُم عَشان ما يَكَلِّمو النّاس هو مِنو.

¹⁷ و دا عَشان يَتِم الكَلام القالو النَّبي إِشَعْيَاء:

¹⁸ ”شوف! خَدّامي الأنا إختِرتو، حَبيبي الأنا مَبسوط بيهو. بَخُت روحي عَليهو، و هو بِخَبِّر ناس الدُّنيا بِالعدل.

¹⁹ هو ما بِشاكِل و لا بِكورِك، و لا واحِد بِسمَع صوتو في السِّكَك.

²⁰ هو ما بِقطَع القَش المَكسور، و لا بِبَطِل نور اللَّمبَه الضَعيف، لِغايَة ما يَجيب العَدل لِلغَلَبَه.

²¹ و في إسمو ناس الدُّنيا يَصَدِّقو.“

يَسُوع و بَعلَزَبول

²² بَعدين جابو ليهو زول كان فيهو شيطان، و هو عَميان و أبكَم. و يَسُوع شَفاهو حَتّى هو قِدِر يتكَلَّم و يَشوف.

²³ و كُل النّاس إستَغرَبو و قالو: ”يِمكِن دا إبن دَاوُد؟“

²⁴ و لَكِن الفَرِّيسِيِّين، لَمّا سِمِعو، قالو: ”الرّاجِل دا ما يَطَلِّع الشّياطين إلّا بِبَعلَزَبول، رَئيس الشّياطين.“

²⁵ و يَسُوع عِرِف أفكارُم و قال ليهُم: ”كُلّو مَملَكَه مِنقَسمَه عَلى نَفسا بِتَخسَر. و كُلّو مَدينَه ولّا بيت مِنقَسِم عَلى نَفسو ما بِكون ثابِت.

²⁶ و إذا كان الشّيطان يَطَلِّع الشّيطان، هو إنقَسَم عَلى نَفسو. كِدا، كيف مَملَكتو بِتَثبُت؟

²⁷ و إذا أنا بَطَلِّع الشّياطين بِبَعلَزَبول، أولادكُم بِطَلِّعوهُم بِمِنو؟ عَلَشان كِدا، هُم بِيَحكُمو عَليكُم.

²⁸ و لَكِن إذا أنا بِروح الله بَطَلِّع الشّياطين، دا يَعني مَلَكوت الله جا ليكُم.

²⁹ ولّا كيف واحِد بِقدَر يَدخُل بيت راجِل قَوّي و بِشيل مالو، إلّا هو بِربُط الرّاجِل القَوّي في الأوَّل؟ بَعدين بِشيل مالو.

³⁰ الما مَعاي هو عَدو لَي، و الما بِجمَع مَعاي هو بِفَرتِك.

³¹ عَلَشان كِدا، أقول ليكُم، كُلّو خَطيَّه و كَلام بَطّال عَلى الرَّب بِتكون مَغفورَه لِلنّاس. و لَكِن الكَلام البَطّال عَلى الرّوح ما بِكون مَغفور.

³² و اليَقَول كِلمَه بَطّالَه ضِد إبن الإنسان، بِكون مَغفور ليهو. و لَكِن اليَقول ضِد الرّوح القُدُس ما بِكون مَغفور ليهو، ما في الزَّمَن دا ولّا في الزَّمَن الجّاي.

³³ أعمِل الشَّجَرَه كوَيسَه، و بِكون عِندَها ثِمار كوَيس. ولّا أعمِل الشَّجَرَه بَطّالَه، و بِكون عِندَها ثِمار بَطّال. عَشان الشَّجَرَه مَعروفَه مِن ثَمَرا.

³⁴ يا أولاد الدَّبايب، كيف تَقدَرو تِتكَلَّمو كِلمات كوَيسَه و إنتو ناس بَطّالين؟ عَشان الخَشم بِتكَلَّم بِحاجات البيها القَلب يَكون مَليان.

³⁵ الزّول الطَّيب، بِطَلِّع حاجات طَيبَه مِن قَلبو الطَّيب. و الزّول البَطّال، بِطَلِّع حاجات بَطّالَه مِن قَلبو البَطّال.

³⁶ أقول ليكُم، في يوم الحُكم، النّاس بِدّو حِساب عَن كُلّو كِلمَه بَطّالَه الهُم إتكَلَّمو بيها.

³⁷ عَشان بِكَلامَك الله بِفِكَّك و بِكَلامَك الله بِيَحكُم عَليك.“

عَلامَة يونان

³⁸ بَعدين بَعض مِن مُعَلِّمين القانون و الفَرّيسيّين قالو ليهو: ”يا مُعَلِّم، عاوِزين نَشوف عَلامَه مِنَّك.“

³⁹ لَكِن رَدَّ و قال ليهُم: ”ناس الزَّمَن دا البَطّالين و اليَعمِلو الزِّنا يَطلُبو عَلامَه. و لَكِن الله ما بِدّيهُم عَلامَه إلّا عَلامَة يونان النَّبي.

⁴⁰ عَشان زي ما كان يونان في بَطن السَّمَك الكَبيرَه تَلاتَة أيام و تلاتَه لِيال، كِدا يَكون إبن الإنسان في جُوَّه الأرض تَلاتَة أيام و تلاتَه لِيال.

⁴¹ رُجال نِينَوَى بِقومو يوم الحُكم مَعَ ناس الزَّمَن دا، و يَحكُمو عَليهُم. عَشان هُم تابو لَمّا يونان خَبَّرُم. و شوف! واحِد أكبَر مِن يونان في هِنا.

⁴² مَلِكَة الجَّنوب بِتقوم يوم الحُكم مَعَ ناس الزَّمَن دا و تَحكُم عَليهُم، عَشان هي جات مِن آخِر الدُّنيا عَشان تَسمَع فَهم سُلَيْمَان. و شوف! واحِد أكبَر مِن سُلَيْمَان في هِنا!

⁴³ الرّوح النَّجِس بَعَد ما يَطلَع مِن الزّول، يَفوت في المَحَلّات الما فيها مويَه، و بِفَتِّش عَلى راحَه. و لَكِن ما بِلقاها.

⁴⁴ بَعدين بِقول: أنا بَرجَع لِبيتي المَرَقتَ مِنّو. و لَمّا يَجي، يَلقاهو فاضي، نَضيف، و جاهِز.

⁴⁵ و بَعدين هو يَمشي يَجيب مَعاهو سَبعَه أرواح تانيين أكعَب مِنّو. و يدخُلو و يَسكُنو هِناك. و حالَة الزّول دا الأخيرَه بِتكون أكعَب مِن اوَّل. و بِكون كِدا لِناس الزَّمَن دا البَطّالين.“

⁴⁶ وَكِت ما كان لِسَّع بِكَلِّم النّاس، شوف، أُمّو و أخوانو وَقَفو بَرَّه، عاوِزين يِتكَلَّمو مَعاهو.

⁴⁷ و واحِد قال ليهو: ”أُمَّك و أخوانَك واقفين بَرَّه عاوزين يِتكَلَّمو مَعاك.“

⁴⁸ لَكِن رَدَّ عَليهو و قال: ”مِنو هي أُمّي، و مِنو هُم أخواني؟“

⁴⁹ و مَدَّ إيدو لِتَلاميذو و قال: ”أهُم ديل أُمّي و أخواني!

⁵⁰ عَشان البيَعمِل إرادَة أبوي الفي السَّما، هو أخوّي، و أُختي، و أُمّي.“