مَتَّى 11 - كِتاب العَهد الجَّديد مِن الكِتاب المُقَدَّس

يَسُوع و يُوحَنَّا المَعمَدان

¹ و لَمّا يَسُوع خِلِص تَعليمو لِتَلاميذو الإتناشَر، مَرَق مِن هِناك عَشان يَعَلِّم و يَبَشِّر في بِلادُم.

² و يُوحَنَّا كان في السِّجِن. و لَمّا سِمِع بِأعمال المَسيح رَسَّل ليهو تَلاميذو

³ يَقولو ليهو: ”إنتَ هو الجّاي، ولّا نَنتَظِر واحِد تاني؟“

⁴ و رَدَّ يَسُوع و قال ليهُم: ”أمشو و خَبِّرو يُوحَنَّا بِالحاجات البِتَسمَعوها و بِتشوفوها:

⁵ العَميانين بِشوفو، و النّاس العُرُج بِمشو، و النّاس العِندَهُم عَيى الجِّزام بِقو نُضاف، و ناس طُرُش بِسمَعو، و المَيِّتين بِقومو، و المَساكين بِسمَعو الخَبَر الكَويس.

⁶ و مُبارَك الما يَقَع عَشانّي.“

⁷ و وَكِت ما كانو ماشين، يَسُوع بِقى يَكَلِّم النّاس الكَتير عَن يُوحَنَّا: ”مَرَقتو في الخَلا تَشوفو شِنو؟ قَش بِتهَزّو الهَبوب؟

⁸ لَكِن مَرَقتو تَشوفو شِنو؟ زول لابِس هِدوم سَمِح؟ شوفو! اللابسين هِدوم سَمِح، هُم في بُيوت المُلوك.

⁹ و لَكِن لِشِنو مَرَقتو؟ عَشان تَشوفو نَبي؟ أيوَه، أقول ليكُم، و أحسَن مِن نَبي.

¹⁰ دا هو المَكتوب عَنّو: شوف! أنا بَرَسِّل مُرسالي قِدَّامَك، البِحَضِّر ليك طَريقَك قِدَّامَك.

¹¹ الحَق أقول ليكُم، ما في بين المَولودين مِن النِّسوان زول أكبَر مِن يُوحَنَّا المَعمَدان. و لَكِن الأصغَر في مَلَكوت السَّما أكبَر مِنّو.

¹² و مِن أيام يُوحَنَّا المَعمَدان لِغايَة هَسَّع، مَلَكوت السَّما بِتقَدَّم بِقُوَّه. و النّاس الشُّداد يَمسِكوهو بِقُوَّه.

¹³ عَشان كُل الأنبياء و كُتُب القانون إتنَبّو لِغايَة يُوحَنَّا.

¹⁴ و إذا عاوزين تَقبَلوهو، دا هو إِيلِيَّا الماشي يَجي.

¹⁵ العِندو إضنين، خَليهو يَسمَع.

¹⁶ و لَكِن ناس الزَّمَن دا، هُم زي شِنو؟ هُم زي أولاد قاعِدين في السّوق، و بِنادو الأولاد التّانيين، و بِقولو:

¹⁷ ضَرَبنا ليكُم و ما رَقَصتو. و بَكينا ليكُم و ما بَكيتو.

¹⁸ عَشان يُوحَنَّا جا ما ياكُل و لا يَشرَب، و هُم بِقولو: عِندو شيطان.

¹⁹ و إبن الإنسان جا ياكُل و يَشرَب، و هُم بِقولو: دا راجِل طَمّاع و مَرّاسي، و بِحِب البِلِمّو الضَّريبَه و الخاطيين. و العِندو فَهم، أعمالو بِوَرّيهو.“

²⁰ بَعدين بِقى يَوَبِّخ المُدُن الهو عَمَل فيهُم أكتَر قُوّاتو، عَشانُم ما تابو.

²¹ ”حُزن ليكي، يا كُورَزِين، حُزن ليكي، يا بيت صَيدا. عَشان إذا كان القُوّات العَمَلوها فيكُم، عَمَلوها في صُور و صَيدا، كانو تابو مِن زَمان و لَبَسو الشَّوال، و خَتّو الرَّماد فوق راسُم.

²² و لَكِن أقول ليكُم، في يوم الحُكم، حالَة صُور و صَيدا بِتكون أحسَن مِن الحالَه البِتكون ليكُم.

²³ و إنتي، يا كَفْرَنَاحُوم، بِرفَعوكي لِلسَّما؟ بِنَزِّلوكي تِحِت لِلهاويَه. عَشان إذا كان الأعمال القَوّيَّه الكانو عَمَلوها فيكي، عَمَلوها في سَدوم، سَدوم كانَت قَعَدت لِغايَة اليوم دا.

²⁴ و لَكِن أقول ليكُم، في يوم الحُكم حالَة أرض سَدوم بِتكون أحسَن مِن الحالَه البِتكون ليكي.“

راحَه لِلتَّعبانين

²⁵ في الوَكِت داك يَسُوع قال: ”أشكُرَك، يا أبو، رَب السَّما و الأرض، عَشانَ إنتَ دَسيت الحاجات دي مِن الفاهمين و المِتعَلِّمين، و وَرّيتا لِلاطفال.

²⁶ أيوَه، يا أبو، عَشان دا طَيب قِدَّامَك.

²⁷ كُلّو شي مُسَلَّم لَي مِن أبوي. ما في واحِد يَعرِف الإبن إلّا الأبو. و لا واحِد يَعرِف الأبو إلّا الإبن، و أي واحِد الإبن عاوِز يَوَرّيهو ليهو.

²⁸ تَعالو لَي، يا كُل التَّعبانين و البِشيلو حاجات تَقيلَه، و أنا بَدّيكُم راحَه.

²⁹ شيلو نيرِي عَليكُم، و إتعَلَّمو مِنّي، عَشان انا لَيِّن، و قَلبي مِتواضَع، و بِتَلقو راحَه لِنُفوسكُم.

³⁰ عَشان نيرِي ما صَعب، و حِملي خَفيف.“