مَتَّى 10 - كِتاب العَهد الجَّديد مِن الكِتاب المُقَدَّس

يَسُوع يَرَسِّل الإتناشَر

¹ و نادى تَلاميذو الإتناشَر و أدّاهُم سُلطَه عَشان يَطَلِّعو الأرواح النَّجسَه و يَشفو كُلّو مَرَض و كُلّو عَيى.

² أهُم ديل أسامي الإتناشَر رَسول: الأوَّل، سِمْعَان السَّمّوهو بُطْرُس، و أنْدَرَاوُس أخوهو. و يَعْقُوب، إبن زَبَدي، و يُوحَنَّا أخوهو.

³ فِيلُبُّس و بَرْثُلْمَاوُس. تُومَا، و مَتَّى الكان بِلِم الضَّريبَه. يَعْقُوب إبن حَلْفَى، و تَدَّاوُس.

⁴ سِمْعَان الْقَانَوِي، و يَهُوذَا الإِسْخَرْيُوطِي السَّلَّمو لِعُدوانو.

⁵ الإتناشَر ديل، يَسُوع رَسَّلُم و أمَرُم و قال: ”ما تَمشو لِناس الدُّنيا، و لا تَدخُلو أي بَلَد بِتاعَة السّامِريّين.

⁶ و لَكِن بِدالو، أمشو لِلخِرفان الإتوَدَّرو مِن بيت إِسْرَائِيل.

⁷ و وَكِت ما إنتو ماشين، بَشِّرو و قولو: مَلَكوت السَّما قَرَّب.

⁸ أشفو العَيّانين، قَوِّمو المَيِّتين، نَضِّفو العِندَهُم الجِّزام، طَلِّعو الشّياطين. أخَدتو مَجّاناً، أدّو مَجّاناً.

⁹ ما تاخُدو دَهَب ولّا فِضَّه ولّا نَحاس مَعاكُم،

¹⁰ ولّا كيس لِلسَّفَر، ولّا توبين، ولّا جِزَم، ولّا عَصايَه. عَشان الشَّغال مُستَحِق أكلو.

¹¹ و أي مَدينَه ولّا حِلَّه دَخَلتوها فَتِّشو عَلى زول مُستَحِق، و أقعُدو في بيتو لِغايَة ما تَمرُقو.

¹² و لَمّا تَدخُلو البيت، سَلِّمو عَليهو.

¹³ و إذا أهل البيت مُستَحِقّين، خَلّي سَلامكُم يَستَنّى عَليهو. و لَكِن إذا ما مُستَحِقّين، خَلّي سَلامكُم يَرجَع ليكُم.

¹⁴ و إن كان أي زول ما يَقبَلكُم، ولّا يَسمَع كَلامكُم، أطلَعو بَرَّه مِن البيت دا ولّا مِن المَدينَه ديك و هِزّو التُّراب مِن رِجلينكُم.

¹⁵ بِالحَق أقول ليكُم، في يوم الحُكم، حالَة سَدوم و عَمورَه بِتكون أحسَن مِن حالَة المَدينَه ديك.

¹⁶ شوف! أرَسِّلكُم زي خِرفان في وَسط مَرفَعين. عَشان كِدا، كونو شاطرين زي الدَّبايب و لَكِن بُسَطاء زي الحَمام.

¹⁷ لَكِن خَلّو بالكُم مِن النّاس، عَشانُم بِسَلِّموكُم لِلمَجالِس، و بِجلِدوكُم في بِيوت الرَّب بِتوعُم،

¹⁸ و بِسوقوكُم قِدّام مُديرين و مُلوك فِشانّي أنا، عَشان تَشهَدو قِدّامُم و قِدّام ناس الدُّنيا.

¹⁹ و لَمّا يَسَلِّموكُم، ما تَفَكِّرو كَتير كيف تِتكَلَّمو ولّا بِتقولو شِنو. عَشان في السّاعَه ديك، بِدّي ليكُم البِتكَلَّمو بيهو.

²⁰ عَشان ما إنتو البِتكَلَّمو، لَكِن روح أبوكُم، هو البِتكَلَّم فيكُم.

²¹ الأخو بِسَلِّم أخوهو لِلموت، و الأبو، وَلَدو. و الأولاد بِقومو عَلى والِدينُم و يَكتُلوهُم.

²² و كُل النّاس بِكرَهوكُم عَشان إسمي. لَكِن البِشِد حيلو لِلآخِر، هو بِخلَص.

²³ و لَمّا يَطرُدوكُم مِن المَدينَه دي، أجرو لِلتّانيَه. الحَق أقول ليكُم، إنتو ما بِتَمشو لِكُلّو بِلاد إِسْرَائِيل قُبّال ما يَجي إبن الإنسان.

²⁴ التِّلميذ ما أحسَن مِن المُعَلِّم، ولّا الخَدّام أحسَن مِن سيدو.

²⁵ كِفايَه لِلتِّلميذ أن يَكون زي مُعَلِّمو، و الخَدّام زي سيدو. إذا كان سَمّو رَب البيت بَعلَزَبول، كيف بِالأكتَر ناس بيتو.

²⁶ كِدا، ما تَخافوهُم. ما في حاجَه مَقفولَه الما بِتكون مَفتوحَه، و لا مَدسوسَه الما بِتكون مَعروفَه.

²⁷ البَقول ليكُم في الضُّلُمَّه، قُولوهو في النّور. و التَسمَعوهو في الأضان، نادو بيهو فوق البِيوت.

²⁸ و ما تَخافو مِن اليَكتُلو الجِّسِم و لَكِن ما يَقدَرو يَكتُلو النَفس. لَكِن خافو مِن اليَقدَر يَكتُل النَّفس و الجِّسِم، هُم الإتنين، في جَهَنَّم.

²⁹ ما بِبيعو طيرين صُغار بِمِليم؟ و لا واحِد مِنَّهُم بِقَع عَلى الأرض بِدون مَعرِفَة أبوكُم.

³⁰ و لَكِن إنتو، عَدَد شَعرات رُسيكُم كُلَّها مَعروف.

³¹ عَلى كِدا، ما تَخافو. إنتو أحسَن مِن طُيور كَتيرَه.

³² كِدا، كُل البِشهَد بي قِدّام النّاس، أنا كَمان بَشهَد بيهو قِدّام أبوي الفي السَّما.

³³ لَكِن البِنكِرني قِدّام النّاس، أنا كَمان بَنكِرو قِدّام أبوي الفي السَّما.

³⁴ ما تَفتَكِرو أنا جيت عَشان أجيب سَلام عَلى الأرض. ما جيت عَشان أجيب سَلام، لَكِن سيف.

³⁵ فِشان أنا جيت عَشان أفَرِّق الإنسان مِن أبوهو، و البِت مِن أُمَّها، و مَرَة الوَلَد مِن نَسيبَتا.

³⁶ و عُدوان الإنسان بِكون أهل بيتو.

³⁷ البِحِب أبوهو ولّا أُمّو أكتَر مِنّي ما مُستَحِقّني. و البِحِب وَلَدو ولّا بِتو أكتَر مِنّي ما مُستَحِقّني.

³⁸ و الما بياخُد صَليبو و يَتبَعني ما مُستَحِقّني.

³⁹ البِحفَظ نَفسو بِوَدِّرا، و البِوَدِّر نَفسو عَشانّي بِحفَظا.

⁴⁰ البِقبَلكُم بِقبَلني، و البِقبَلني بِقبَل الرَّسَّلني.

⁴¹ البِقبَل نَبي بِإسم نَبي، بِقبَل أُجرَة نَبي. و البِقبَل الزّول البار بِإسم زول بار، بِقبَل أُجرَة زول بار.

⁴² و أي واحِد البِدّي لِواحِد مِن الصُّغار ديل كُبّايَة مويَه باردَه بَس، بِإسم تِلميذ، الحَق أقول ليكُم، هو ما يَوَدِّر أُجرَتو أبَداً.“