لُوقَا 8 - كِتاب العَهد الجَّديد مِن الكِتاب المُقَدَّس

مَثَل المُزارِع

¹ و بَعَد شوَيَه، كان بِمُر عَلى كُلّو مَدينَه و حِلَّه يَنادي و يَبَشِّر بِمَلَكوت الله. و الإتناشَر كانو مَعاهو،

² و كَمان بَعض مِن النِّسوان الهو شَفاهُم مِن أرواح شَرّيرَه و أمراض. مَرْيَم البِسَمّوها المَجْدَلِيَّه، الطَلَّع مِنَّها سَبعَه شياطين،

³ و يُوانّا مَرَة خوزا وَكيل هِيرُودُس، و سوزانّا، و تانيين كُتار كانو يَخدِموهو بِمالُم.

⁴ و لَمّا جَمَع كَبير إتلَمّى، و ناس جو ليهو مِن كُلّو بَلَد، هو عَلَّمُم بِمَثَل.

⁵ ”المُزارِع طَلَع عَشان يَزرَع تيرابو. و وَكِت هو يَزرَع، شوَيَه وَقَع في الطَّرِيق، و النّاس دَاسوهو، و طُيور السَّما أكَلتو.

⁶ و تاني وَقَع عَلى الحَجَر. و بَعَد ما قام، يبِس، عَشان ما كان عِندو مويَه،

⁷ و تاني وَقَع في وَسِط الشّوك. و الشّوك قام مَعاهو و خَنَقو.

⁸ و تاني وَقَع عَلى الأرض الكوَيسَه. و لَمّا قام، جاب ثِمار بِمِيَّة مَرَّه.“ و وَكِت كان بِتكَلَّم كِدا، نادى و قال: ”العِندو إضنين لِلسَّمَع، خَليهو يَسمَع.“

⁹ و سألوهو تَلاميذو، و قالو: ”مَعنى المَثَل دا شِنو؟“

¹⁰ و قال: ”الله أدّا ليكُم تَعرِفو أسرار مَلَكوت الله، لَكِن لِلتّانيين بِأمثال، عَشان يَعاينو و ما يَشوفو، و يَسمَعو و ما يَفهَمو.

¹¹ و دا هو المَثَل. التّيراب، هو كِلمَة الله.

¹² و ديلاك العَلى الطَّرِيق، هُم السِّمِعو. و بَعدين إبْلِيس يَجي و يَشيل الكِلمَه مِن قُلوبُم، عَشان ما يآمِنو و يَخلَصو.

¹³ و ديلاك العَلى الحَجَر، هُم البَعَد ما سِمِعو، يَقبَلو الكِلمَه بِفَرَح. و ديل ما عِندَهُم عُروق، اليأَمِنو لِمُدَّه، و وَكِت التَجرِبَه، يَرجَعو.

¹⁴ و التّيراب الوَقَع وَسِط الشّوك يَعني ديل اليَسمَعو. لَكِن لَمّا هُم بِمشو في طَرِيقُم، أفكار في حاجات الدُّنيا و أموالا و سُرورا يَمسِكو بيهُم، و ما يَقدَرو يَجيبو ثِمار.

¹⁵ و الفي الأرض الكوَيسَه، هُم البِقَلِب كوَيس و صالِح، بَعَد ما سِمِعو الكِلمَه، يَحفَظوها، و يَجيبو ثِمار بِالصَّبر.

¹⁶ و ما في زول بِوَلِّع لَمبَه و يَغَتّيها بِقُفَّه. و لا يَخُتّا تِحِت العَنقَرِيب، لَكِن يَخُتّا عَلى طَرَبيزَه، عَشان الدّاخِلين يَشوفو النّور.

¹⁷ و ما في شي مَدسوس الما بِكون باين، و لا في شي سِرّي الما بِكون مَعروف و ما بِظهَر.

¹⁸ عَلى كِدا، خَلّو بالكُم بِتَسمَعو كيف. عَشان العِندو يَدُّوهو. و الما عِندو، حَتّى البِفتَكِر هو عِندو، يَاخُدوهو مِنّو.“

¹⁹ و جو لِيهو أُمّو و أخوانو، و ما قِدرو يَجو قَريب مِنّو بِسَبَب النّاس الكُتار.

²⁰ و قالو ليهو: ”أُمَّك و أخوانَك واقفين بَرَّه دايرين يَشوفوك.“

²¹ و رَدَّ و قال ليهُم: ”أُمّي و أخواني هُم البِسمَعو كِلمَة الله و يَعمِلو بيها.“

يَسُوع يَسَكِّت الهَبوب

²² و في يوم مِن الأيام، دَخَل المُركَب، هو و تَلاميذو، و قال ليهُم: ”خَلّونا نَمشي لِلجَّمب الآخِر مِن البَحَر.“ و سافَرو.

²³ و وَكِت ما كانو مِسافِرِين، هو نام. و هَبوب شَديدَه نَزَلَت في البَحَر، و المُركَب إتمَلَت بِمويَه. و كانو في الخَطَر.

²⁴ و جو ليهو و قَوَّموهو مِن النّوم و قالو: ”يا مُعَلِّم، يا مُعَلِّم، نِحنا ماشين نَموت!“ و قام مِن النّوم و وَبَّخ الهَبوب و أمواج البَحَر. و الهَبوب سَكَتَت، و كان في سُكوت.

²⁵ و قال ليهُم: ”إيمانكُم وين؟“ و خافو و إتعَجَّبو، و قالو بَعضَهُم لِبَعض: ”دا هو مِنو اليأمُر الهَبوب و المويَه حَتّى يَطيعوهو؟“

شِفا راجِل فيهو شياطين

²⁶ و سافَرو لِبَلَد الجَدَريّين الهي قِدّام الجَّليل.

²⁷ و لَمّا مَرَق لِلأرض، قابَلو راجِل مِن البَلَد كان فيهو شياطين. و مِن مُدَّه طَويلَه، هو ما كان لِبِس هِدوم ولّا قَنَّب في البيت، لَكِن في القُبور.

²⁸ و لَمّا شاف يَسُوع، كورَك و وَقَع قِدّامو، و قال بِصوت عالي: ”مالي و مالَك، يا يَسُوع إبن الله العالي؟ أطلُب مِنَّك ما تَعَزِّبني.“

²⁹ عَشان هو أمَر الرّوح النَّجِس يَطلَع مِن الرّاجِل. عَشان مَرّات كَتيرَه كان يَمسِكو. و النّاس كانو يَحفَظوهو، و هو مَربوط بِجَنازِير. و لَكِن كان يَقطَع الرُّباط، و الشّيطان كان يَسوقو لِلخَلا.

³⁰ و يَسُوع سَألو: ”إسمَك شِنو؟“ و قال: ”لَجِيُون،“ عَشان شياطين كَتيرين كانو دَخَلو فيهو.

³¹ و طَلَبو مِنّو عَشان ما يأمُرُم يَمشو لِلحُفرَه الغَريقَه.

³² و كان هِناك مُراح كَداريك كَتيرَه ياكُل في الجَّبَل. و الشّياطين طَلَبو مِنّو إذن عَشان يدخُلو فيهُم. و أدّاهُم إذن.

³³ و الشّياطين طَلَعو مِن الرّاجِل، و دَخَلو في الكَداريك. و الكَداريك وَقَعو مِن مَحَل فوق لِلبَحَر و ماتو.

³⁴ و لَمّا الرُعاه شافو الحَصَل، هَرَبو، و خَبَّرو في المَدينَه و في الحِلَل.

³⁵ و النّاس مَرَقو عَشان يَشوفو الحَصَل، و جو لِيَسُوع. و لِقو الرّاجِل المَرَقو مِنّو الشّياطين قاعِد عِند كِرعين يَسُوع. و هو كان لابِس هِدوم و عَقلو كوَيس. و هُم خافو.

³⁶ و الشّافوهو خَبَّروهُم كيف العِندو الشّيطان بِقى طَيب.

³⁷ و كُلّو أهل بَلَد الجَدَريّين و السّاكنين جَمبُم طَلَبو مِنّو أن يَمرُق، عَشان خوف شَديد مَسَكُم. و دَخَل المُركَب و رَجَع.

³⁸ لَكِن الرّاجِل الطَلَعت مِنّو الشّياطين طَلَب مِنّو عَشان يَكون مَعاهو. لَكِن يَسُوع رَسَّلو و قال:

³⁹ ”أرجَع لِبيتَك و خَبِّر بِالحاجَه السَّوَّاها ليك الله.“ و مَشى يَنادي في البَلَد كُلَّها بِكَم سَوَّاهو ليهو يَسُوع.

⁴⁰ و وَكِت ما يَسُوع رَجَع، النّاس قِبلوهو عَشان كُلُّهُم كانو يَنتَظِروهو.

⁴¹ و شوف! راجِل إسمو يَايِرُس جا. و هو رَئيس بيت الرَّب. و وَقَع قِدّام يَسُوع و طَلَب مِنّو يَدخُل بيتو.

⁴² عَشان كانَت عِندو بِت وَحيدَه عُمُرا إتناشَر سَنَه تَقريباً، و كانَت قَريبَه مِن الموت. و وَكِت ما هو ماشي، ناس كُتار لَزُّوهو مِن كُلّو جَمب.

⁴³ و كانَت في مَرَه الدَّم نَزَل مِنَّها مُدَّة إتناشَر سَنَه، و ما في واحِد قِدِر يَشفيها.

⁴⁴ هي جات مِن وَراهو و لِمسَت طَرَف توبو. و طَوّالي دَمّا وَقَف.

⁴⁵ و يَسُوع قال: ”مِنو لِمِسني؟“ و لَمّا كُلُّهُم نَكَرو، بُطْرُس و الكانو مَعاهو قالو: ”يا مُعَلِّم، النّاس يَقَرِّبو مِنَّك يَضايقوك، و إنتَ بِتقول: ’مِنو اللِمِسني؟“

⁴⁶ لَكِن يَسُوع قال: ”زول لِمِسني، عَشان عِرِفتَ إنّو في قُدرَه طَلَعَت مِنّي.“

⁴⁷ و لَمّا المَرَه شافَت إنَّها ما إندَسَّت، جات تِتهَزَّ. و وَقَعَت قِدّامو، و كَلَّمَتو قِدّام كُل النّاس عَشان شِنو لِمسَتو، و كيف بِقَت طَيبَه طَوّالي.

⁴⁸ و قال ليها: ”يا بِتّي، إيمانِك شَفاكي. أمشي بِالسَّلام.“

⁴⁹ و وَكِت ما كان بِتكَلَّم، واحِد جا مِن بيت رَئيس بيت الرَّب، و قال ليهو: ”بِتَّك ماتَت. ما تَتَعِّب المُعَلِّم بَعَد دا.“

⁵⁰ و يَسُوع سِمِع و قال ليهو: ”ما تَخاف، آمِن بَس، و هي بِتكون كوَيسَه!“

⁵¹ و لَمّا وِصِل لِلبيت، ما خَلّى زول يَدخُل مَعاهو إلّا بُطْرُس و يُوحَنَّا و يَعْقُوب، و أبو البِت و أُمَّها.

⁵² و لَكِن كُل النّاس كانو يَبكو عَليها و يَكورِكو فِشانا. لَكِن يَسُوع قال: ”ما تَبكو! هي ما ماتَت لَكِن نايمَه.“

⁵³ و ضِحِكو عَليهو، عَشان كانو عارِفين هي ماتَت.

⁵⁴ لَكِن هو مَسَك إيدا و نادى و قال: ”يا بِت، قومي!“

⁵⁵ و رَجَعَت روحا، و قامَت طَوّالي. و أمَرُم يَدُّوها عَشان تَاكُل.

⁵⁶ و والِديها إستَغرَبو، و يَسُوع أمَرُم عَشان ما يَكَلِّمو زول بِالحَصَل.